The Phnom Penh Post Search

Search form




Logo of Phnom Penh Post newspaper Phnom Penh Post - AIIB ផ្តល់​កម្ចី​សម្រាប់​កែ​លម្អ​សេវា​អ៊ីនធឺណិត​នៅ​កម្ពុជា

AIIB ផ្តល់​កម្ចី​សម្រាប់​កែ​លម្អ​សេវា​អ៊ីនធឺណិត​នៅ​កម្ពុជា

Content image - Phnom Penh Post
អតិថិជន​កំពុង​ស្វែង​រក​ទិញ​ផលិតផល​តាម​អនឡាញ ​នា​ពេល​កន្លង​មក​​​។ ភ្នំពេញ ប៉ុស្តិ៍

AIIB ផ្តល់​កម្ចី​សម្រាប់​កែ​លម្អ​សេវា​អ៊ីនធឺណិត​នៅ​កម្ពុជា

ភ្នំពេញៈ​ ធនាគារ​វិនិយោគ​ហេដ្ឋា​រចនា​សម្ព័ន្ធ​អាស៊ី (AIIB​)​ ​ដែល​ផ្តួច​ផ្តើម​ដោយ​ចិន​បាន​ផ្តល់​​កម្ចី​​ ​៧៥ ​លាន​ដុល្លារ ​ជា​លើក​ដំបូង​​ឲ្យ​ក្រុមហ៊ុន​បណ្តាញ​​ខែ្ស​​អុបទិក​ (FOCN) នៅ​កម្ពុជា​ ដើម្បី​កែ​លម្អ​​ល្បឿន​អ៊ីនធឺណិត​​។ នេះ​បើ​តាម​សេចក្តី​ប្រកាស​ព័ត៌មាន​​របស់​​ AIIB ​កាល​ពី​ថ្ងៃ​សុក្រ​​។

AIIB ​ឲ្យ​ដឹង​ថា ​គម្រោង​នេះ​បាន​​បណ្តាក់​ទុន​លើ​ការ​អូស​ខ្សែ​​​បណ្តាញ​អុបទិក​ក្រោម​ដី​សរុប​ប្រវែង ​​២ ០០០ ​គីឡូ​ម៉ែត្រ​ ​​គ្រប​ដណ្តប់​​​នៅ​តាម​ទីក្រុង​ធំៗ ​តាម​តំបន់​ជាយ​ក្រុង​ និង​នៅ​ទី​ជនបទ​របស់​ប្រទេស ​កម្ពុជា។

គម្រោង​នេះ​ត្រូវ​បាន​​រំពឹង​ថា​​នឹង​គាំទ្រ​ដល់​ផែនការ​អភិវឌ្ឍន៍​វិស័យ​បច្ចេកវិទ្យា ​ព័ត៌មានវិទ្យា​ និង​ទូរគមនាគមន៍​ (ICT) ​របស់​រដ្ឋាភិបាល ​ដែល​គ្រោង​នឹង​សម្រេច​ឲ្យ​បាន​នៃ​ការ​គ្រប​ដណ្តប់​សេវា​អ៊ីនធឺណិត ​១០០ ​ភាគរយ ​នៅ​ទីក្រុង ​និង ​៧០ ​ភាគរយ ​នៅ​ជនបទ​។​ នេះ​បើ​យោង​​តាម​សេចក្តី​ប្រកាស​ព័ត៌មាន​របស់ ​AIIB។

តាម​ធនាគារ​ AIIB ​បាន​ឲ្យ​ដឹង​ថា ​ការ​សាងសង់​បណ្តាញ​ខ្សែ​កាប្លិ៍​អុបទិក​នេះ​នឹង​​កាត់​តាម​​ខេត្ត​ចំនួន ​៥ គឺ​ ខេត្ត​កំពត ​ព្រៃវែង​ ត្បូងឃ្មុំ ​កំពង់ធំ ​និង​ខេត្ត​​ពោធិ៍សាត់​។ ​នេះ​បើ​យោង​តាម​​សេចក្តី​ប្រកាស​ព័ត៌មាន​។​

តាម​ព័ត៌មាន​សង្ខេប​ស្តីពី​គម្រោង​របស់ ​AIIB​ បណ្តាញ​​ខ្សែ​​អុបទិក​​ប្រហែល ​១ ០០០ ​គីឡូម៉ែត្រ ​គ្រប​ដណ្តប់​នៅ​តំបន់​ជាយ​ក្រុង​ ដែល​មិន​សូវ​មាន​បណ្តាញ​អ៊ីនធឺណិត​​ឲ្យ​ប្រសើរ​ឡើង ​និង​ខ្សែ​បណ្តាញ​អុបទិក​ក្រោម​ដី​ប្រហែល ១ ​០០០ ​គីឡូ​​​ម៉ែត្រ​ទៀត ​សម្រាប់​ផ្តល់​ការ​​គ្រប​ដណ្តប់​នៅ​ទីក្រុង​ធំៗ​។​

ពុំ​មាន​ព័ត៌មាន​លម្អិត​ពី​ក្រុមហ៊ុន ​Fiber ​Optic​ Communication ​Network​ Co.,​ Ltd​ (FOCN) ​ទេ ខណៈ​គេហទំព័រ​របស់​ក្រុមហ៊ុន​នេះ​ស្ថិត​ក្នុង​ដំណើរការ​អភិវឌ្ឍន៍ ​(under construction)​។​

ទោះបី​យ៉ាង​នេះ​ក្ដី ​កាល​ពី​ខែ​មីនា ​ឆ្នាំ ​២០១៩ ​ក្រសួង​សេដ្ឋកិច្ច​ និង​ហិរញ្ញវត្ថុ​បាន​​ចុះ​ហត្ថលេខា​លើ​កិច្ច​សន្យា​ស្តីពី​ការ​ផ្គត់ផ្គង់​គម្រោង​អ៊ីនត្រាណិត ​ជាមួយ​ក្រុមហ៊ុន ​Cambodia​ Fiber Optic Communication Network Co., Ltd (CFOCN) ​ដើម្បី​ជំរុញ​អនុវត្ត​កម្មវិធី​កែ​ទម្រង់​ការ​គ្រប់គ្រង ​ហិរញ្ញវត្ថុ​សាធារណៈ ​ស្រប​តាម​​បរិការណ៍​អភិវឌ្ឍន៍​សេដ្ឋកិច្ច​ឌីជីថល​ក្នុង​យុគ​នៃ​បដិវត្តន៍​ឧស្សាហកម្ម​ទី៤​។ ​នេះ​បើ​​តាម​គេហ​ទំព័រ​របស់​ក្រសួង​សេដ្ឋកិច្ច​។ ​គេហទំព័រ​របស់​ CFOCN​ ស្ថិត​ក្នុង​ដំណើរការ​អភិវឌ្ឍន៍​ដែរ​។​

យោង​តាម​សេចក្តី​ប្រកាស​ព័ត៌មាន​របស់​​ AIIB ​គម្រោង​​ខ្សែ​កាប្លិ៍​អុបទិក​ក្រោម​ដី​នឹង​ចំណាយ​ ៣៥ ​លានដុល្លារ ​សម្រាប់​គម្រោង​ឆ្នាំ ២០១៩​ និង​ ៣៥ ​​លាន​ដុល្លារ​ទៀត ​សម្រាប់​ឆ្នាំ ២០២០​ ខណៈ ​៥ ​លាន​​សម្រាប់​ចំណាយ​ផ្សេងៗ​។
លោក ​Dong-ik Lee ​នាយក​ទូទៅ​ផ្នែក​ប្រតិបត្តិ​ការ​វិនិយោគ​​របស់ ​AIIB ​ថ្លែង​​ថា ធនាគារ​​ AIIB ​រំពឹង​ថា ​គម្រោង​នេះ​​នឹង​បង្កើត​ប្រសិទ្ធភាព​សេដ្ឋកិច្ច​ និង​​ជួយ​សម្រួល​ប្រព័ន្ធ​ពាណិជ្ជកម្ម​​បែប​ឌីជីថល​នៅ​កម្ពុជា​​។

លោក​​បញ្ជាក់​ថា​​៖ «ប្រាក់​កម្ចី​នេះ​ស្រប​ទៅ​នឹង​ការ​កៀរគរ​មូលធន​ឯកជន​ជា​អាទិភាព​​របស់​​​ធនាគារ ​AIIB ហើយ​មាន​សារៈសំខាន់​សម្រាប់​វិនិយោគិន​ និង​ស្ថាប័ន​ហិរញ្ញវត្ថុ​​អន្តរជាតិ​​»។

លោក ​D.​J.​ Pandian ​អនុប្រធាន​ និង​ប្រធាន​ផ្នែក​វិនិយោគ​​របស់​ធនាគារ​ AIIB ​ បាន​ដឹង​ក្នុង​សេចក្តី​ប្រកាស​ព័ត៌មាន​ថា ​ការ​កែលម្អ​ការ​​តភ្ជាប់​គឺ​ជា​អាណត្តិ​​ដ៏​សំខាន់​របស់​AIIB​។ ​

លោក​ថ្លែង​ថា៖ «គម្រោង​នេះ​នឹង​រួម​ចំណែក​​ក្នុង​ការ​ជំរុញ​​កម្ពុជា​ក្នុង​ការ​ភ្ជាប់​បណ្តាញ​ឌីជីថល ​និង​​ជួយ​អភិវឌ្ឍ ​និង​ពង្រីក​វិស័យ​ទូរគមនាគមន៍​ និង​​ ​ICT​​ របស់​ប្រទេស​នេះ ​ដោយ​រំពឹង​ថា​នឹង​ផ្តល់​ប្រយោជន៍​ដល់​អ្នក​ប្រើប្រាស់​ និង​ក្រុមហ៊ុន​»។

លោក ​អ៊ឹម ​វុត្ថា ​អ្នក​នំាពាក្យ​និយតករ​ទូរគមនាគម៍​កម្ពុជា ​(TRC) បាន​ឲ្យ​ដឹង​ថា​ គម្រោង​តភ្ជាប់​បណ្តាញ​អុបទិក​របស់​ក្រុមហ៊ុន​ឯកជន ​ដែល​ទទួល​បាន​កម្ចី​ពី AIIB បាន​ដើរ​ស្រប​គ្នា​​ទៅ​នឹង​យុទ្ធសាស្ត្រ​ឧស្សាហកម្ម​​ជំនាន់​ទី៤ ​របស់​រដ្ឋាភិបាល​។​

លោក​ថ្លែង​ថា​៖ «បច្ចុប្បន្ន​យុទ្ធសាស្ត្រ​ចតុកោណ​របស់​រដ្ឋាភិបាល​​បាញ់​ឆ្ពោះ​ទៅ​លើ​សេដ្ឋកិច្ច​​ឌីជីថល​ ជា​ឧស្សាហក​ម្ម​ជំនាន់​ទី៤​ ដើម្បី​ដើរ​បាន​យើង​ត្រូវ​​មាន​បណ្តាញ ​5G​ ដូច្នេះ ​វិនិយោគិន​ចាប់​អារម្មណ៍​ទៅ​លើ​ការ​​វិនិយោគ​បណ្តាញ​ខែ្ស​អុបទិក​»។

បើ​តាម​លោក​ អ៊ឹម ​វុត្ថា ​នៅ​ឆមាស​ទី១​ ឆ្នាំ ​២០១៩​ ​ចំនួន​អ្នក​ប្រើប្រាស់​អ៊ីនធឺណិត​សរុប​នៅ​​កម្ពុជា​មាន​ជាង ​១៣ ​លាន​នាក់ ​ដែល​ភាគ​ច្រើន​​ប្រើប្រាស់​តាមរយៈ​​ទូរស័ព្ទ​ចល័ត​។ ​

លោក​​បន្ត​ថា បច្ចុប្បន្ន​មាន​​ក្រុមហ៊ុន​បរទេស​ដែល​ផ្តល់​សេវា​ទូរគមនាគមន៍​​​ខ្សែ​អុបទិក​​ក្រោម​​សមុទ្រ​​ចំនួន​ ៤​ ​នៅ​កម្ពុជា​ និង​ក្រុមហ៊ុន​​ខ្សែ​អុបទិក​ក្រោម​ដី​ក្នុង​ស្រុក​មាន​ចំនួន​ ៣​៕LA

អត្ថបទគួរចាប់អារម្មណ៍