.jpg)
លោក Liu Kun រដ្ឋមន្ដ្រីក្រសួងហិរញ្ញវត្ថុរបស់ប្រទេស ចិន ត្រូវបានក្រុមប្រឹក្សាភិបាលរបស់ធនាគារ AIIB ជ្រើសរើសធ្វើជាប្រធានក្រុមប្រឹក្សាភិបាល។ AFP
ក្រុងលុចសំបួៈ ធនាគារវិនិយោគហេដ្ឋារចនាសម្ព័ន្ធអាស៊ី (AIIB) ដែលផ្តួចផ្ដើមបង្កើតឡើងដោយប្រទេស ចិន កាលពីថ្ងៃសៅរ៍បានអនុម័តសមាជិកភាពរបស់ប្រទេស បេណាំង ជីប៊ូទី និង រវ៉ាន់ដា ដែលធ្វើឲ្យសមាជិកភាពដែលទទួលបានអនុម័តសរុបរបស់ធនាគារនេះកើនឡើងដល់ ១០០ ប្រទេស។
សេចក្ដីសម្រេចនេះត្រូវបានធ្វើឡើងជាឯកច្ឆនដោយក្រុមប្រឹក្សាភិបាលរបស់ធនាគារ AIIB នៅក្នុងកិច្ចប្រជុំប្រចាំឆ្នាំលើកទី៤ របស់ខ្លួននៅទីក្រុងលុចសំបួ។
សមាជិកមិនមែនស្ថិតក្នុងតំបន់អាស៊ីទាំង ៣ ប្រទេសនេះនឹងចូលរួមជាផ្លូវការជាមួយធនាគារ AIIB នៅពេលប្រទេសទាំងនេះបំពេញបានតាមលក្ខខណ្ឌតម្រូវនីតិវិធីក្នុងស្រុក និងប្រាក់កក់មូលធនលើកដំបូងជាមួយធនាគារនេះ។
នៅពេលនេះ ក្រុមប្រឹក្សាភិបាលរបស់ធនាគារ AIIB បានជ្រើសរើសលោក Liu Kun រដ្ឋមន្ដ្រីក្រសួងហិរញ្ញវត្ថុរបស់ប្រទេស ចិន ធ្វើជាប្រធានក្រុមប្រឹក្សាភិបាល។
លោក Liu បានឲ្យដឹងក្នុងកិច្ចប្រជុំប្រចាំឆ្នាំរបស់ធនាគារនេះថា ជាមួយចំនួនសមាជិកដែលអនុម័តកើនឡើងដល់ ១០០ ប្រទេស និងទំហំនៃការផ្ដល់ហិរញ្ញប្បទានដែលអនុម័តកើនឡើងដល់ ៨,៥ ពាន់លានដុល្លារអាមេរិក AIIB បានក្លាយជាសមាជិកដ៏សំខាន់មួយនៃប្រព័ន្ធអភិវឌ្ឍន៍អន្តរជាតិ។
លោក Liu បានសរសើរការរីកចម្រើនដែលធនាគារ AIIB សម្រេចបានក្នុងអំឡុង ៣ ឆ្នាំចុងក្រោយនេះ ដោយបញ្ជាក់ថា ធនាគារ AIIB ត្រូវបានផ្ដល់ឋានៈជាអ្នកសង្កេតការណ៍អចិន្រ្តៃយ៍ ដោយមហាសន្និបាតអង្គការសហប្រជាជាតិ។
មកដល់ពេលនេះ ធនាគារបានអនុម័តគម្រោង ៤៦ ក្នុងប្រទេសជាសមាជិកចំនួន ១៨ តម្លៃសរុប ៨,៥ ពាន់លានដុល្លារ៕ People''s Daily/LA
