ភ្នំពេញៈ ក្រុមហ៊ុនផលិតយន្តហោះ Airbus បានបង្ហាញការចាប់អារម្មណ៍របស់ខ្លួនចំពោះទីផ្សារអាកាសចរណ៍កម្ពុជា ខណៈចំនួនភ្ញៀវទេសចរបរទេស និងចំនួននៃការធ្វើដំណើរតាមផ្លូវអាកាសរបស់ប្រជាជនខ្មែរកំពុងមានការកើនឡើង។ នេះបើតាមតំណាងក្រុមហ៊ុន Airbus។
ក្នុងសន្និសីទសាព័ត៌មានស្តីពីកម្មវិធីដំណើរកម្សាន្តផ្សព្វផ្សាយបង្ហាញនៅក្នុងតំបន់អាស៊ីប៉ាស៊ីហ្វិកនៃប្រភេទយន្តហោះថ្មី Airbus A220 នៅអាកាសយានដ្ឋានអន្តរជាតិកាលពីថ្ងៃម្សិលមិញ លោក Connor Buott អ្នកវិភាគទីផ្សារជាន់ខ្ពស់ផ្នែកយន្តហោះខ្នាតតូចរបស់ក្រុមហ៊ុន Airbus និយាយថា ទីតាំងភូមិសាស្ត្រដែលស្ថិតនៅចន្លោះតំបន់មជ្ឈិមបូព៌ា ជប៉ុន និងអូស្ត្រាលី និងកំណើនសេដ្ឋកិច្ចក្នុងប្រទេសបានធ្វើឲ្យក្រុមហ៊ុន Airbus ចាប់អារម្មណ៍ក្នុងការយកយន្តហោះប្រភេទថ្មីរបស់ខ្លួន Airbus A220 មកដាក់បង្ហាញនៅកម្ពុជា បើទោះបីជាមកដល់ពេលនេះនៅមិនទាន់មានការបញ្ជាទិញក៏ដោយ។
លោកថ្លែងថា៖ « កម្ពុជាជាទីផ្សារតូច តែមានសក្តានុពលខ្ពស់។ ប៉ុន្តែយើងរំពឹងថានឹងមានការបញ្ជាទិញនៅពេលបន្ទាប់ពីការយកមកបង្ហាញនេះ»។
នៅកម្ពុជាបច្ចុប្បន្នមានយន្តហោះ Airbus ចំនួន ២៧ កំពុងមានប្រតិបត្តិការដោយក្រុមហ៊ុនក្នុងស្រុកចំនួន ៦។ ក្រុមហ៊ុន Airbus បានព្យាករថា ការដឹកជញ្ជូនតាមផ្លូវអាកាសនឹងមានកំណើនខ្ពស់នៅកម្ពុជា ខណៈការដឹកជញ្ជូន អ្នកដំណើរនឹងមានអត្រាកំណើនជាង ៧ ភាគរយ ក្នុង ១ ឆ្នាំ សម្រាប់រយៈពេល ២០ ឆ្នាំខាងមុខ។
ទិន្នន័យពីក្រសួងទេសចរណ៍កាលពីខែកញ្ញាបង្ហាញថានៅកម្ពុជាមានជើងហោះហើរអន្តរជាតិចំនួន ៨៣០ លើកក្នុង ១ សប្តាហ៍ ចំណែកការហោះហើរក្នុងស្រុកមានចំនួន ១៥៣ លើក។ ក្រុមហ៊ុនអាកាសចរណ៍កំពុងធ្វើប្រតិបត្តិការមានសរុបចំនួន ៤៩ ហោះទៅ ៨៦ គោលដៅ ក្នុងប្រទេសចំនួន ១២។ ចំនួននេះមានការកើនឡើងយ៉ាងច្រើន បើធៀបទៅនឹងរយៈពេល ៤-៥ ឆ្នាំកន្លងមក។
របាយការណ៍ក្រសួងទេសចរណ៍បានឲ្យដឹងទៀតថាក្នុងរយៈពេល ៨ ខែ ឆ្នាំ ២០១៩ ភ្ញៀវទេសចរបរទេសដែលមកទស្សនាកម្ពុជាសរុប ៤,៣ លាននាក់ កើនឡើង ១០,៤ ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៨។ ភ្ញៀវទេសចរបរទេសដែលធ្វើដំណើរមកកម្ពុជាតាមរយៈផ្លូវអាកាសមានចំនួន ៣,១ លាននាក់កើនឡើង ១៦,៦ ភាគរយ។
លោក Connor Buott បានប្រាប់ទៀតថាកំណើនភ្ញៀវទេសចរបរទេសដែលធ្វើដំណើរមកកម្ពុជាក៏ជាផ្នែកមួយដែលធ្វើឲ្យក្រុមហ៊ុនចាប់អារម្មណ៍ក្នុងការយកផលិតផលរបស់ខ្លួនមកបង្ហាញផងដែរ។
លោកបន្តថា ក្រុមហ៊ុនមានបំណងនាំមកប្រទេសកម្ពុជានូវយន្តហោះប្រភេទថ្មី Airbus A220 ដែលជាយន្តហោះខ្នាតតូច ទំនើបចុងក្រោយគេរបស់ក្រុមហ៊ុន Airbus ដែលអាចផ្ទុកអ្នកដំណើរបាន ១០០-១៥០ នាក់ និងមានសមត្ថភាពហោះហើរដោយមិនឈប់បានចម្ងាយ ៦ ៣០០ គីឡូម៉ែត្រ។
បច្ចុប្បន្នយន្តហោះប្រភេទនេះកំពុងមានប្រតិបត្តិការចំនួន ៩០ គ្រឿង ដែលប្រតិបត្តិដោយក្រុមហ៊ុនធំៗចំនួន ៧ រួមមាន SWISS, AriBaltic, Korean Air, Delta Air Lines, Air Tanzania និង EgyptAir។ ជាមួយគ្នានោះ Airbus A220 កំពុងទទួលការបញ្ជាទិញចំនួន ៥២៥ គ្រឿង ពីក្រុមហ៊ុនធំៗចំនួន ២២ ជុំវិញពិភពលោក។
បើតាមលោក Connor Buott តាមការព្យាកររបស់ក្រុមហ៊ុន Airbus នៅឆ្នាំ ២០៣៧ ការធ្វើដំណើរតាមផ្លូវអាកាសនៅតំបន់អាស៊ីប៉ាស៊ីហ្វិកនឹងមានកំណើនជិត ២,៣ ដង ហើយចំនួនយន្តហោះនៅតំបន់អាស៊ីនឹងត្រូវការយន្តហោះរហូតដល់ជាង ១៥ ៩០០ គ្រឿង៕LA