.jpg)
ទិដ្នភាពក្នុងហាងលក់សៀវភៅរបស់ក្រុមហ៊ុន Amazon ក្នុងទីក្រុងញូវយ៉ក។ រូបថត AFP
ក្រុងឌុយប្លាំងៈ ក្រុមហ៊ុន Amazon បានឲ្យដឹងកាលពីថ្ងៃចន្ទថា ខ្លួននឹងបង្កើតការងារជាង ១ ០០០ កន្លែងបន្ថែមទៀតនៅប្រទេសអៀរឡង់ ក្នុងរយៈពេលពីរឆ្នាំក្រោយ ដែលបង្កើនវត្តមានរបស់ខ្លួនកាន់តែច្រើននៅក្នុងប្រទេសចាយប្រាក់អឺរ៉ូមួយនេះ។
ក្រុមហ៊ុនលក់រាយតាមអុីនធឺណិតឈានមុខគេរបស់អាមេរិកមួយនេះបានឲ្យដឹងនៅក្នុងសេចក្ដីប្រកាសព័ត៌មានមួយថា ការងារថ្មីនេះនឹងត្រូវបានបង្កើតឡើងក្នុងការិយាល័យថ្មីមួយនៅភាគកណ្ដាលទីក្រុងឌុយប្លាំង ព្រមទាំងទីតាំង ៣ ផ្សេងទៀតនៅតំបន់ជាយក្រុងរបស់ប្រទេសនេះ។
ការងារទាំងនេះនឹងរួមមានវិស្វករអភិវឌ្ឍសូហ្វវែរ បុគ្គលិកទិន្នន័យកណ្ដាល និងមុខងារព័ត៌មានវិទ្យាសម្រាប់ទាំងនៅក្រុមហ៊ុន Amazon និងនៅក្រុមហ៊ុន Amazon Web Services (AWS)។
លោក Mike Beary នាយកក្រុមហ៊ុនប្រចាំប្រទេសអៀរឡង់របស់ក្រុមហ៊ុន AWS បានថ្លែងថា៖ «មានអ្នកមានទេពកោសលជាច្រើននៅក្នុងប្រទេសអៀរឡង់ ដែលជួយដល់ពួកយើងក្នុងការធ្វើឲ្យលើសពីទិសដៅកំណើនអ្នកមានទេពកោសលរបស់យើង មុនពេលគ្រោងទុក»។
លោកថ្លែងថា៖ «ប្រទេសអៀរឡង់គឺជាកន្លែងដ៏ធំមួយក្នុងការធ្វើពាណិជ្ជកម្ម វប្បធម៌ច្នៃប្រឌិតរបស់ប្រទេសនេះ និងជំនាញបច្ចេកវិទ្យាជាច្រើនចម្រុះគ្នា ធ្វើឲ្យប្រទេសនេះក្លាយជាទីតាំងដ៏ល្អបំផុតសម្រាប់ការពង្រីកអាជីវកម្មយ៉ាងរហ័សរបស់យើង»។
សេចក្ដីប្រកាសកាលពីថ្ងៃចន្ទ នឹងបន្ថែមចំនួនការងារនៅក្រុមហ៊ុន Amazon ដល់ជាង ២ ៥០០ កន្លែងក្នុងប្រទេសអៀរឡង់។
លោកនាយករដ្ឋមន្ដ្រីអៀរឡង់ Leo Varadkar បានថ្លែងថា៖ «ការសម្រេចចិត្តរបស់ក្រុមហ៊ុន Amazon ក្នុងការនាំយកការងារ ១ ០០០ កន្លែងផ្សេងទៀតដល់ប្រទេសអៀរឡង់ បញ្ជាក់ពីបេសកកម្មរបស់យើងក្នុងការធ្វើឲ្យប្រទេសនេះក្លាយជាសេដ្ឋកិច្ចឌីជីថល ប្រកបដោយនវានុវត្តន៍មួយ និងក្លាយជាប្រទេសនាំមុខគេលើពិភពលោកសម្រាប់វិស័យបច្ចេកវិទ្យា»។
លោកបន្ថែមថា៖ «ការបង្កើតការងារថ្មីៗទាំងនេះ និងការប្ដេជ្ញាចិត្តរបស់ក្រុមហ៊ុនក្នុងការវិនិយោគលើការស្រាវជ្រាវ និងនវានុវត្តន៍នៅទីនេះ គឺជាមូលដ្ឋានគ្រឹះក្នុងការរក្សាកេរ្ដិ៍ឈ្មោះរបស់ប្រទេសអៀរឡង់ជាមជ្ឈមណ្ឌលបច្ចេកវិទ្យាសម្រាប់តំបន់អឺរ៉ុប៕ AFP/LA
