.jpg)
ភ្នំពេញៈ គ្រឹះស្ថានមីក្រូហិរញ្ញវត្ថុ AMK និង EMQ ដែលមានមូលដ្ឋាននៅទីក្រុងហុងកុង ដែលជាក្រុមហ៊ុនប្រព័ន្ធទូទាត់ហិរញ្ញវត្ថលំដាប់ពិភពលោកកាលពីថ្ងៃអង្គារបានប្រកាសកិច្ចព្រមព្រៀងភាពជាដៃគូដើម្បីជួយសម្រួលការផ្ទេរប្រាក់ឆ្លងដែននៅទូទាំងអាស៊ីអាគ្នេយ៍។ កិច្ចព្រមព្រៀងនេះក៏នឹងអាចឲ្យអតិថិជនរបស់ AMK ផ្ទេរប្រាក់បានភ្លាមៗជាមួយនឹងជម្រើសកាន់តែច្រើនផងដែរ។
ស្ថិតក្រោមភាពជាដៃគូនេះ អតិថិជន AMK នៅកម្ពុជានឹងអាចផ្ទេរប្រាក់បានភ្លាមៗ និងទទួលបានជម្រើសការទូទាត់កាន់តែច្រើនដែលរួមមានការទទួលបានសាច់ប្រាក់ភ្លាមៗ ការដាក់ប្រាក់បញ្ញើនៅធនាគារដៃគូ ការដាក់ប្រាក់បញ្ញើនៅក្នុងការទូទាត់ ឬការផ្ញើប្រាក់ទៅផ្ទះ ដើម្បីជួយក្រុមគ្រួសាររបស់ពួកគេនៅទូទាំងតំបន់អាស៊ីអាគ្នេយ៍ផងដែរ។ ការសហការនេះនឹងបង្កើតឲ្យមានសេដ្ឋកិច្ចប្រកបដោយបរិយាប័ន្ន សម្រាប់តំបន់មួយដែលមានប្រជាជន ២៧ ភាគរយមានលទ្ធភាពទទួលបានសេវាហិរញ្ញវត្ថុ។
លោក Max Liu សហស្ថាបនិក និងជាអគ្គនាយក EMQ បានឲ្យដឹងថា ប្រាក់ផ្ញើពីបរទេសផ្ដល់ការជួយគាំទ្រគ្រួសាររាប់លាននៅប្រទេសកំពុងអភិវឌ្ឍន៍ ជាពិសេសនៅក្នុងតំបន់អាស៊ីអាគ្នេយ៍ដែលក្រុមហ៊ុន EMQ មានការប្ដេជ្ញាចិត្តរយៈពេលវែងក្នុងការផ្ដល់ការផ្ទេរប្រាក់ឆ្លងកាត់ ព្រំដែនមានតម្លៃទាប សុវត្ថិភាព និងអាចទុកចិត្តបានដល់សហគមន៍នៅក្នុងតំបន់នេះ។
លោក Max Liu ថ្លែងថា៖ «តាមរយៈការតភ្ជាប់ AMK ដោយផ្ទាល់ជាមួយបណ្ដាញទូទាត់ពិភពលោករបស់យើង យើងនឹងផ្ដល់ដល់អតិថិជនរបស់យើងនូវលទ្ធភាពជម្រើសល្អបំផុត និងភាពបត់បែនក្នុងការផ្ញើប្រាក់ទៅផ្ទះ ដោយភាពងាយស្រួលក្នុងរយៈពេលតែប៉ុន្មាននាទីប៉ុណ្ណោះ។ យើងរីករាយក្នុងការធ្វើដៃគូជាមួយ AMK លើការងារនេះ»។
លោក គា បូរាណ អគ្គនាយក AMK ឲ្យដឹងថា ភាពជាដៃគូនេះនឹងពង្រីកសេវាគ្រឹះស្ថានរបស់លោកទៅដល់តំបន់ និងពិភពលោកតាមរយៈការផ្ដល់ជូនអតិថិជននូវសេវាកាន់តែរហ័ស ងាយស្រួល និងសុវត្ថិភាព។
លោក បូរាណ លើកឡើងថា៖ «ភាពជាដៃគូជាមួយក្រុមហ៊ុន EMQ បង្ហាញនូវព្រឹត្តិការណ៍ដ៏សំខាន់នៅក្នុងដំណាក់កាលកំណើនជាបន្តបន្ទាប់របស់យើង ខណៈយើងនៅតែបន្តពង្រីកវត្តមានរបស់យើងនៅទូទាំងបណ្ដាប្រទេសដែលទទួលបានឈានមុខគេរបស់ពិភពលោក ដើម្បីបម្រើតម្រូវការអតិថិជនរបស់យើងឲ្យបានល្អបំផុត»។
គិតត្រឹមដំណាច់ឆ្នាំ ២០១៩ AMK មានការិយាល័យ ១៤៩ កន្លែងមានបុគ្គលិកជាង ៣ ០០០ នាក់ ម៉ាស៊ីន ATM ៥៦ គ្រឿង និងភ្នាក់ងារជាង ៥ ៥០០ កន្លែងនៅទូទាំងប្រទេស។
គិតត្រឹមពេលនោះអតិថិជន AMK មានជាង ៩០០ ០០០ នាក់ ជាមួយផលបត្រកម្ចីជាង ៣១៥ លានដុល្លារ និងប្រាក់បញ្ញើជាង ១៨០ លានដុល្លារ។ AMK ក៏ផ្ដល់ការធានារ៉ាប់រងខ្នាតតូចលើសុខភាព និងគ្រោះថ្នាក់ដល់អតិថិជនដែលទទួលយកកម្ចីរបស់ខ្លួនជាង ៣២៥ ០០០ នាក់ នៅទូទាំងប្រទេស៕LA
