.jpg)
កសិករប្រមូលស្រូវដាក់ក្នុងការុង រង់ចាំរថយន្តមកដឹកយកទៅរោងម៉ាស៊ីន។ រូបថត រ៉ាហ៊ីម
ភ្នំពេញ៖ ក្រុមហ៊ុន អេមរុ រ៉ាយស៍ (AMRU Rice) ដែលជាក្រុមហ៊ុនកែច្នៃនាំចេញអង្ករទៅទីផ្សារអន្តរជាតិ មានផែនការប្រមូលទិញស្រូវសរីរាង្គ (ប្រភេទផ្ការំដួល និងប្រភេទអង្ករស) ឱ្យបានចំនួន ១៥ ០០០ តោន ក្នុងឆ្នាំ ២០២០ ពីសហគមន៍ចុះកិច្ចសន្យានៅក្នុងខេត្តព្រះវិហារ។
ក្រុមហ៊ុននឹងផ្តល់តម្លៃពិសេសដល់ប្រជាកសិករដែលដាំដុះស្រូវសរីរាង្គប្រភេទផ្ការំដួល និងប្រភេទអង្ករស ដោយផ្តល់តម្លៃបន្ថែមចាប់ពី ១៥-៣០ ភាគរយ ឬចន្លោះពី ១៧០ ទៅ ២៥០ រៀល ក្នុង ១ គីឡូក្រាមពីលើតម្លៃទីផ្សារស្រូវក្នុងតំបន់ដែលឈ្មួញប្រមូលទិញ។ ក្រុមហ៊ុននឹងទិញស្រូវផ្ការំដួលសរីរាង្គក្នុងតម្លៃ ១ ២៧០-១ ៥៥០ រៀល ក្នុង ១ គីឡូក្រាម។ ការផលិតស្រូវសរីរាង្គនឹងផ្តល់ចំណូលខ្ពស់ជាងការផលិតស្រូវប្រភេទធម្មតា។
ក្រុមហ៊ុនបានឱ្យដឹងថា៖ «សហគមន៍ដែលចុះកិច្ចសន្យាជាមួយនឹងក្រុមហ៊ុនមិនត្រឹមតែទទួលបាននូវនិរន្តរភាពទីផ្សារ និងចំណូលប៉ុណ្ណោះទេ ប៉ុន្តែពួកគាត់ថែមទាំងអាចទទួលបាននូវការបណ្តុះបណ្តាលពីក្រុមហ៊ុនលើជំនាញទន់ផ្សេងៗ និងការអនុវត្តជាក់ស្តែងផងដែរ»។
ក្រុមហ៊ុន អេមរុ រ៉ាយស៍ បានចាប់ផ្តើមគម្រោងស្រូវសរីរាង្គនៅក្នុងខេត្តព្រះវិហារ កាលពីឆ្នាំ ២០១៤ ដោយមានសហគមន៍ចំនួន ៨ ខណៈបច្ចុប្បន្នកើនដល់ ២២។
ក្រុមហ៊ុនបញ្ជាក់ថា៖ «ការចុះកិច្ចសន្យាកសិកម្មជាមួយសហគមន៍នឹងជួយធានាបាននូវគុណភាពស្តង់ដា និងទីផ្សារសម្រាប់សហគមន៍»។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ការចរចាតម្លៃគោលស្រូវសរីរាង្គ និងកិច្ចសន្យាកសិកម្មរវាងក្រុមហ៊ុន និងសហគមន៍ទាំងអស់ទទួលបានការសម្របសម្រួលពីមន្ទីរកសិកម្ម រុក្ខាប្រមាញ់ និងនេសាទ ខេត្តព្រះវិហារ និងសហភាពសហគមន៍កសិកម្មព្រះវិហារមានជ័យជាដៃគូសហការរបស់ក្រុមហ៊ុន អេមរុ រ៉ាយស៍។
លោកថ្លែងថា៖ «កិច្ចសន្យាកសិកម្មនឹងជួយពង្រឹងស្តង់ដាសរីរាង្គ បច្ចេកទេសការដាំដុះ ការធ្វើផែនការទិញលក់ ការកត់ត្រាហិរញ្ញវត្ថុ និងការគ្រប់គ្រងជាដើម»។
យោងតាមមន្ទីរកសិកម្ម ខេត្តព្រះវិហារ នៅទូទាំងខេត្តព្រះវិហារមានសហគមន៍កសិកម្ម ៣៣ បានចុះកិច្ចសន្យាផលិត និងផ្គត់ផ្គង់ស្រូវសរីរាង្គសរុបចំនួន ២២ ១៩៥ តោន ដែលមានសមាជិកសហគមន៍ផលិតសរុបចំនួន ៦ ១៩៧ គ្រួសារ លើទំហំផ្ទៃដីសរុប ២០ ២៩៦ ហិកតា សម្រាប់លក់ឱ្យក្រុមហ៊ុនឯកជនចំនួន ០៤ រួមានក្រុមហ៊ុន អេមរុ រ៉ាយស៍ (AMRU Rice) ក្រុមហ៊ុន ស៊ីកនេតឈ័រ អហ្វ អេស៊ា (Signatures of Asia) ក្រុមហ៊ុន ហ្គោលដេន រ៉ាយស៍ (Golden Rice) និងរោងម៉ាស៊ីន សារ៉ាវ៉ាន់ កំពង់ធំ។
អង្ករកម្ពុជាបាននាំចេញផ្លូវការកើនពី ៥៣៨ ០០០ តោន ដល់ជាង ៦២០ ០០០ តោន ក្នុងឆ្នាំ ២០១៩ គិតជាមធ្យមមានកំណើន ១៥,២៤ ភាគរយនៅក្នុងរយៈពេល ៥ ឆ្នាំ៕ LA
