.jpg)
លោក Stephen Burega (កណ្ដាល) នាយកប្រតិបត្តិ Angkor Resources Corp។ រូបថត ហ្វេសប៊ុក
ភ្នំពេញ: ក្រុមហ៊ុន Angkor Resources Corp ប្រមូលមូលនិធិបាន ១ លានដុល្លារ ពីការលក់ភាគហ៊ុនទៅឲ្យវិនិយោគិនអន្តរជាតិសម្រាប់យកមកអភិវឌ្ឍគម្រោងប្រេង និងឧស្ម័នក្នុងប្លុក ៨ របស់កម្ពុជាជាអាជ្ញាប័ណ្ណថ្មីដែលក្រុមហ៊ុននេះទើបទទួលបាន។ នេះបើតាមនាយកប្រតិបត្តិក្រុមហ៊ុន។
លោក Stephen Burega នាយកប្រតិបត្តិ Angkor Resources Corp បានឲ្យដឹងថាមកដល់ពេលនេះក្រុមហ៊ុន EnerCam Exploration Ltd ដែលជាបុត្រសម្ព័ន្ធរបស់ខ្លួនបានប្រមូលមូលនិធិបាន ១ លានដុល្លារ ដើម្បីផ្តល់ឲ្យការអភិវឌ្ឍប្រេង និងឧស្ម័នក្នុងប្លុក ៨ តាមរយៈការលក់ភាគហ៊ុនឯកជនរបស់ក្រុមហ៊ុន EnerCam Resources Singapore Pty. Ltd. ទៅឲ្យវិនិយោគិនអន្តរជាតិផ្សេងៗគ្នា។ នេះបើតាមសេចក្តីប្រកាសព័ត៌មានរបស់ក្រុមហ៊ុន។
សេចក្តីប្រកាសព័ត៌មានបានឲ្យដឹងថា ក្រុមហ៊ុន EnerCam Resources Singapore Pty. Ltd. ជាក្រុមហ៊ុនឯកជនរួមបញ្ចូលគ្នាមួយនៅសិង្ហបុរីដោយក្រុមហ៊ុន Angkor ជាម្ចាស់កាន់កាប់ភាគហ៊ុន ១០០ ភាគរយ លើអាជ្ញាប័ណ្ណសម្បទានប្រេង និងឧស្ម័ននៅកម្ពុជា។ មុនពេលលក់ហ៊ុន ភាគហ៊ុន ១០០ ភាគរយ របស់ក្រុមហ៊ុន EnerCam Singapore ត្រូវបានកាន់កាប់ដោយក្រុមហ៊ុន EnerCam Exploration Ltd ជាបុត្រសម្ព័ន្ធរបស់ Angkor។
ក្រុមហ៊ុន EnerCam Exploration Ltd បានដាក់លក់ភាគហ៊ុនរហូតដល់ ២,៥ លានភាគហ៊ុន ក្នុងចំណោមភាគហ៊ុនសរុប ១០ លាន របស់ក្រុមហ៊ុន EnerCam Singapore ដែលលក់ក្នុងតម្លៃ ១ ដុល្លារ ក្នុងមួយហ៊ុន ដើម្បីផ្តល់ហិរញ្ញប្បទានដល់ក្រុមហ៊ុនទើបបង្កើតថ្មីសម្រាប់ការរុករកប្រេង និងឧស្ម័នក្នុងប្លុក ៨។
មូលនិធិនឹងត្រូវប្រើសម្រាប់បង់ថ្លៃអាជ្ញាប័ណ្ណការទិញស៊ីស្មិកដែលមានស្រាប់ និងទិន្នន័យភូមិសាស្ត្រ តំបន់រុករក និងការចំណាយលើប្រតិបត្តិការជាទូទៅ។
ក្រុមហ៊ុន Angkor Resources Corp គឺជាក្រុមហ៊ុនចុះបញ្ជីក្នុងផ្សារហ៊ុន TSX-Venture Exchange នៅទីក្រុងតូរ៉ុនតូ ប្រទេស កាណាដា និងជាក្រុមហ៊ុនរុករករ៉ែឈានមុខគេនៅកម្ពុជាដោយគ្រប់គ្រងលើផ្ទៃដីទំហំធំលើអាជ្ញាប័ណ្ណរុករកប្រេង និងឧស្ម័នដែលមានផ្ទៃដី ៧ ៣០០ គីឡូម៉ែត្រការ៉េនៅកម្ពុជា៕LA
