ការរីករាលដាលជំងឺកូវីដ ១៩ កំពុងតែបង្កផលប៉ះពាល់ដល់សេដ្ឋកិច្ចពិភពលោក តំបន់ រួមទាំងប្រទេសកម្ពុជាផងដែរ ខណៈដែលមេដឹកនាំទាំងអស់កំពុងមមាញឹកក្នុងការចាក់បញ្ចូលកញ្ចប់ថវិកានានាដើម្បីធ្វើឲ្យមានស្ថិរភាព សេដ្ឋកិច្ច និងគាំពារកម្មវិធីសង្គមក្នុងការកាត់បន្ថយហានិភ័យទាំងនេះ។
លោក ម៉ៃ គុណមករា ការីនិពន្ធព័ត៌មានសេដ្ឋកិច្ចកាសែតភ្នំពេញប៉ុស្ដិ៍បានជួបសម្ភាសលោក Anthony Galliano អគ្គនាយកក្រុមហ៊ុន Cambodia Investment Managment ដោយជជែកអំពីប្រសិទ្ធភាពនៃការលើកទឹកចិត្តពន្ធ និងកញ្ចប់ថវិកាដែលរដ្ឋាភិបាលបានដាក់ចេញក្នុងការទប់ទល់នៃការធ្លាក់ចុះនៃសេដ្ឋកិច្ច។
តើលោកសង្កេតឃើញថាប៉ះពាល់ដោយសារតែជំងឺកូវីដ១៩ដល់សេដ្ឋកិច្ចយ៉ាងដូចម្ដេចដែរ?
ខ្ញុំមានការបារម្ភយ៉ាងខ្លាំងជាមួយនឹងទំនុកចិត្តវិជ្ជមាន និងសុទិដ្ឋិនិយមដែលមិនពិតថា សេដ្ឋកិច្ចពិភពលោកនឹងស្ទុះងើបឡើងវិញយ៉ាងរហ័សនៅក្នុងទម្រង់អក្សរ V។ ការសន្មតនេះគឺបញ្ជាក់តាមការងើបឡើងវិញនៃផ្សារហ៊ុន។
កម្ពុជាបានធ្វើសមាហរណកម្មទៅក្នុងសេដ្ឋកិច្ចពិភពលោកដែលបានធ្វើឲ្យវិស័យសំខាន់ៗជាច្រើនដូចជាទេសចរណ៍ កាត់ដេរ និងអចលនទ្រព្យអាចពឹងផ្អែកខ្លាំងលើភាពល្អប្រសើរនៃសេដ្ឋកិច្ចទីផ្សារអាមេរិក អឺរ៉ុប និងអាស៊ី។ ជាមួយបណ្ដាប្រទេសជាច្រើនទើបងើបចេញពីការបិទចរាចរណ៍ ព្រំដែន និងព្រលានយន្តហោះភាគច្រើន យើងអាចរំពឹងថា ដំណើរផ្លូវដ៏វែងឆ្ងាយក្នុងការស្ទុះងើបឡើងវិញនៅក្នុងវិស័យទេសចរណ៍ ប្រហែលជានៅក្នុងឆ្នាំ ២០២២។ ច្បាស់ណាស់ពិភពលោកនឹងស្ទុះងើបឡើងវិញ ហើយសកម្មភាពសេដ្ឋកិច្ច និងត្រឡប់ទៅរកប្រក្រតីភាពឡើងវិញ វាគ្រាន់តែមិនកើនឡើងរហ័សដូចការព្យាករនោះទេ ដូច្នេះរដ្ឋាភិបាលចាំបាច់ត្រូវត្រៀមសម្រាប់រយៈពេលវែង។
កាលពីខែមីនា រដ្ឋាភិបាលបានប្រកាសនូវកញ្ចប់ថវិកាប្រមាណ ២ ពាន់លានដុល្លារ រួចហើយតាមរយៈការលើកទឹកចិត្តពន្ធ តើកញ្ចប់ថវិកានេះនឹងជួយកាត់បន្ថយហានិភ័យសេដ្ឋកិច្ចយ៉ាងដូចម្ដេចដែរ?
កិច្ចខិតខំប្រឹងប្រែងរហូតមកដល់បច្ចុប្បន្នរបស់រដ្ឋាភិបាល ពិតជាបានជួយយ៉ាងខ្លាំង ប៉ុន្តែជាអកុសលយើងរស់នៅក្នុងសេដ្ឋកិច្ចពិភពលោក និងការដើរថយក្រោយនៃសេដ្ឋកិច្ចទូទាំងពិភពលោក នៅពេលនេះកំពុងបង្កផលអាក្រក់បំផុត ដែលយើងបានមើលឃើញចាប់តាំងពីការធ្លាក់ចុះសេដ្ឋកិច្ចកន្លងមក។ ទាំងនេះត្រូវបានរំពឹងថា វាគ្រាន់តែកើតមានក្នុងរយៈពេលខ្លី និងមិនខ្លាំង និងទូលាយនោះទេ ប៉ុន្តែសេដ្ឋកិច្ចរបស់កម្ពុជានឹងបន្តត្រូវការការលើកទឹកចិត្តបន្ថែមទៀត ព្រោះវិស័យកាត់ដេរ និងទេសចរណ៍មានភាពទន់ខ្សោយខ្លាំង។
សេដ្ឋកិច្ចពិភពលោកនឹងស្ទុះងើបឡើងវិញយ៉ាងឆាប់រហ័សត្រឡប់ទៅរកប្រក្រតីកម្មរាងអក្សរ V ខណៈដែលយើងទាំងអស់គ្នាសង្ឃឹមថា នេះជាការពិត ហើយរដ្ឋាភិបាលភាគច្រើនកំពុងចាក់បញ្ចូលសាច់ប្រាក់ដើម្បីជួយបញ្ហានេះ រដ្ឋាភិបាលកម្ពុជាគួរតែមានផែនការ «B» ក្នុងករណីសេនារីយោនេះមិនអាចទៅរួចនិងសម្រេចបាន។
រដ្ឋាភិបាលក៏បានផ្ដល់ការលើកលែងពន្ធសម្រាប់វិស័យដែលរងផលប៉ះពាល់។ តើការលើកលែងពន្ធនេះនឹងធ្វើឲ្យមានស្ថិរភាពដូចម្ដេច?
រដ្ឋាភិបាលបានអនុវត្តវិធានការលើកលែងពន្ធសម្រាប់ក្រុមហ៊ុន ដើម្បីកាត់បន្ថយផលប៉ះពាល់ហិរញ្ញវត្ថុអវិជ្ជមាន ដោយសារជំងឺកូវីដ១៩ ដែលភាគច្រើនគាំទ្រវិស័យបដិសណ្ឋារកិច្ច កាត់ដេរ អាកាសចរណ៍ និងអប់រំ ហើយក៏៏ផ្ដល់ការគាំទ្រផ្នែកហិរញ្ញវត្ថុសម្រាប់កម្មករនៅក្នុងវិស័យទាំងនេះផងដែរ។ សម្រាប់ការផ្តល់ជូននេះក៏ត្រូវបានមើលឃើញថាវាបានគាំទ្រជាពិសេស ដោយសារវិស័យទាំងនេះងាយរងផលប៉ះពាល់ខ្លាំងបំផុត និងមានផលប៉ះពាល់តៗគ្នា និងរីករាលដាលដល់វិស័យផ្សេងទៀត ជាពិសេសវិស័យអចលនទ្រព្យ លក់រាយ និងវិស័យហិរញ្ញវត្ថុ។
យើងសង្កេតឃើញថា ស្ថិរភាពប្រាក់ចំណូលពន្ធនៅត្រីមាសទី ១ ក៏ផ្ដល់លទ្ធភាពដល់រដ្ឋាភិបាលក្នុងការផ្ដល់ការលើកទឹកចិត្តពន្ធបន្ថែមទៀតដល់វិស័យផ្សេងៗមួយចំនួនទៀត ខណៈដែលផលប៉ះពាល់សេដ្ឋកិច្ចអវិជ្ជមានដោយសារតែវីរុសនេះ និងការរីករាលដាលទៅផ្នែកផ្សេងទៀតនៃសេដ្ឋកិច្ច៕LA