.jpg)
កងកម្លាំងពេលចុះជួយច្រូតស្រូវរបស់ប្រជាពលរដ្ឋដែលត្រូវបានទឹកជំនន់ជន់លិច នៅខេត្តបន្ទាយមានជ័យកាលពីចុងខែកញ្ញា ឆ្នាំ ២០២០។ រូបថត សហការី
ភ្នំពេញ: ធនាគារអភិវឌ្ឍន៍ជនបទ និងកសិកម្ម (ARDB) ដែលគ្រប់គ្រងដោយរដ្ឋនឹងបញ្ចេញឥណទានចំនួន ៣០ លានដុល្លារបន្ថែមទៀត សម្រាប់អាជីវកម្មស្រូវអង្ករនៅកម្ពុជាចាប់ពីខែក្រោយនេះ ដើម្បីជាដើមទុនប្រមូលទិញស្រូវបង្កើនសន្និធិ ដែលធ្វើឱ្យទុនក្នុងវិស័យស្រូវអង្ករឡើងដល់ជាង ២០០ លានដុល្លារ។
លោក កៅ ថាច អគ្គនាយក ARDB បានប្រាប់ ភ្នំពេញ ប៉ុស្តិ៍ កាលពីថ្ងៃអាទិត្យថា ការបញ្ចេញថវិកាបន្ថែមនេះត្រូវបានធ្វើឡើងក្នុងគោលបំណងដើម្បីដោះស្រាយបញ្ហាខ្វះខាតទុនរបស់ម្ចាស់សហគ្រាសរោងម៉ាស៊ីនកិនស្រូវនៅក្នុងរដូវប្រមូលផលសម្រាប់ខែវិច្ឆិកា និងធ្នូខាងមុខនេះ។
លោកថ្លែងថា៖ «តាមផែនការយើងនឹងបញ្ចេញឥណទាននេះក្នុងខែវិច្ឆិកា ព្រោះជារដូវប្រមូលផលស្រូវសែនក្រអូប និងផ្ការំដួល យើងសង្ឃឹមថា មូលនិធិនេះនឹងជួយឱ្យម្ចាស់រោងម៉ាស៊ីនកិនស្រូវទិញស្រូវបានច្រើនពីកសិករ»។
លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជាបានស្វាគមន៍ចំពោះរដ្ឋាភិបាលដែលផ្តល់ឥណទានបន្ថែមទៀតតាមការស្នើសុំរបស់សហព័ន្ធស្រូវអង្ករកម្ពុជា ដើម្បីដោះស្រាយបញ្ហាកង្វះទុននារដូវប្រមូលផលខាងមុខនេះ។ ឥណទាននេះនឹងឆ្លើយតបទៅនឹងតម្រូវការរបស់ម្ចាស់រោងម៉ាស៊ីនកិនស្រូវដែលជួបបញ្ហាកង្វះទុនបង្វិលពេលប្រមូលផលស្រូវ។
លោកថ្លែងថា៖ «យើងអបអរសាទរដែលរដ្ឋាភិបាលនឹងបញ្ចេញឥណទានបន្ថែមទៀតដែលវានឹងជួយផ្តល់លទ្ធភាពឱ្យម្ចាស់រោងម៉ាស៊ីនកិនស្រូវទិញស្រូវបន្ថែមទៀត។ សមាជិករបស់យើងជួបបញ្ហាកង្វះទុនស្ទើរតែគ្រប់គ្នា ហើយ យើងគ្រាន់តែស្នើខ្ចីទុនបន្ថែមដោយផ្អែកទៅតាមស្ថានភាពទីផ្សារនាំចេញអង្ករប៉ុណ្ណោះ។ ប្រសិនបើទីផ្សារអង្ករមិនសូវល្អយើងក៏មិនហ៊ានស្នើសុំកម្ចីច្រើនបន្ថែមទៀតដែរ»។
លោក ឃី ឆៃវ៉ាត់ ប្រធានគ្រប់គ្រងទូទៅនៃរោងម៉ាស៊ីនកិនស្រូវអេមរុរ៉ាយស៍ ប្រចាំខេត្តបាត់ដំបងសង្ឃឹមថា ការបញ្ចេញថវិកានេះនឹងចំពេលដែលម្ចាស់រោងម៉ាស៊ីនកិនស្រូវភាគច្រើនត្រូវការទុនសម្រាប់ទិញស្រូវនៅក្នុងរដូវប្រមូលផលខាងមុខនេះ។
លោកបន្ថែមថា៖ «ខ្ញុំយល់ថារាល់ការបញ្ចេញថវិកានេះវាចំទិសដៅរបស់រោងម៉ាស៊ីនកិនស្រូវដែលត្រូវការទុននៅពេលនេះគ្រាន់តែថាតើថវិកានេះប្រើប្រាស់ចំគោលដៅ ឬក៏អត់ទេអ៊ីចឹងយើងត្រូវការធ្វើសវនកម្មឱ្យបានពិតប្រាកដ»។
លោកបានបន្ថែមថា គ្រោះទឹកជំនន់បានធ្វើឱ្យប៉ះពាល់ដល់ការប្រមូលផល និងទិន្នផលស្រូវយ៉ាងខ្លាំងនៅតាមខេត្តពោធិ៍សាត់ បាត់ដំបង និងបន្ទាយមានជ័យដែលបានរងផលប៉ះពាល់ធ្ងន់ធ្ងរដោយសារជំនន់ទឹកភ្លៀង។
លោកបញ្ជាក់៖ «រោងម៉ាស៊ីនកិនស្រូវមួយចំនួនប្រឈមនឹងជន់លិចនៅខេត្តបន្ទាយមានជ័យ ហើយប្រសិនបើស្រូវខូចខាតទៀតវានឹងប៉ះពាល់ធ្ងន់ធ្ងរដល់វិស័យកសិកម្ម»។
បើតាមលោក កៅ ថាច គិតមកដល់ពេលនេះរដ្ឋាភិបាលបានបញ្ចេញឥណទានជិត ២០០ លានដុល្លារ ហើយសម្រាប់ជួយដោះស្រាយបញ្ហាកង្វះទុននៅក្នុងវិស័យស្រូវអង្ករ។
របាយការណ៍ CRF បង្ហាញថា រយៈពេល ៩ ខែ កម្ពុជាទទួលបានចំណូលពីការនាំចេញអង្ករចំនួនជាង ៣២៨ លានដុល្លារកើន ១០,៤៣ ភាគរយ ធៀបនឹងរយៈពេលដូចគ្នានៃឆ្នាំមុនមាន ២៩៧ លានដុល្លារ៕ LA
