ភ្នំពេញៈ ធនាគារកសិកម្ម និងអភិវឌ្ឍន៍ជនបទ (ARDB) ដែលគ្រប់គ្រងដោយរដ្ឋនឹងសិក្សាសំណើរបស់សហព័ន្ធស្រូវអង្ករកម្ពុជា (CRF) ក្នុងការបង្កើនទុនកម្ចីពិសេសពីរដ្ឋាភិបាល ដើម្បីប្រមូលទិញស្រូវនៅរដូវប្រមូលផលខាងមុខនេះ ដែលជាវិធានការមួយដើម្បីសម្រេចបានតាមទិសដៅនាំចេញប្រមាណ ៨០០ ០០០ តោននៅឆ្នាំនេះ។
លោក សុង សារ៉ន ប្រធាន CRF បានចូលរួមប្រជុំជាមួយប្រធានធនាគារកសិកម្ម និងអភិវឌ្ឍន៍ជនបទ (ARDB) កាលពីថ្ងៃពុធ ពិភាក្សាអំពីស្ថានការបច្ចុប្បន្ននៃទីផ្សារស្រូវអង្ករ និងការប្រមូលផល ដើម្បីសិក្សាពីលទ្ធភាពនៃការផ្ដល់ទុនកម្ចីពីរដ្ឋាភិបាលក្នុងរដូវកាលប្រមូលផលស្រូវខាងមុខនេះ បានប្រាប់ភ្នំពេញប៉ុស្ដិ៍ថា ដោយសារតែរដូវប្រមូលផលនឹងមកដល់នៅពេលខ្លីខាងមុខនេះ ទាមទារឲ្យមានការបង្កើនកម្ចីបន្ថែមទៀតដល់វិស័យស្រូវអង្ករ ដើម្បីផ្តល់លទ្ធភាពមានមូលនិធិគ្រប់គ្រាន់ដើម្បីទិញស្រូវពីកសិករ។
លោកលើកឡើងថា៖ «យើងពេញចិត្តនឹងរដ្ឋាភិបាលដែលបន្តបញ្ចេញកម្ចីពិសេសសម្រាប់វិស័យស្រូវអង្ករ ដើម្បីប្រមូលស្រូវពីកសិករ ដើម្បីធ្វើឲ្យមានស្ថិរភាពដល់តម្លៃស្រូវ។ ដូច្នេះសម្រាប់រដូវប្រមូលផលនឹងចូលមកដល់ក្នុងពេលឆាប់ៗ យើងបានស្នើទៅធនាគារកសិកម្ម និងអភិវឌ្ឍន៍ជនបទឲ្យលើកយកសំណើរបស់យើងនៃការបង្កើនទំហំកម្ចីពិសេសទៅរដ្ឋាភិបាល ដោយសារតែនៅឆ្នាំនេះ យើងគ្រោងនឹងនាំចេញប្រហែល ៨០០ ០០០ តោន ដូច្នេះវាទាមទារឲ្យយើងត្រូវមានប្រាក់ចន្លោះពី ៨០ ទៅ ១០០ លានដុល្លារ ដើម្បីសម្រេចបានតាមទិសដៅនាំចេញ»។
ជាមួយគ្នានេះដែរ CRF ក៏បានស្នើទៅ ARDB ចំពោះការស្នើសុំលើការពន្យារពេលការកំណត់ពេលវេលានៃការសងកម្ចី យ៉ាងហោចណាស់ ១២ ខែ ដើម្បីអាចឲ្យពួកគេមានពេលវេលាគ្រប់គ្រាន់ក្នុងការទិញស្រូវពីកសិករ និងមានលទ្ធភាពគ្រប់គ្រាន់សម្រាប់ការសងប្រាក់កម្ចី។
លោក កៅ ថាច ប្រធាន ARDB បានប្រាប់ភ្នំពេញប៉ុស្ដិ៍ថា លោកនឹងសិក្សាលើសំណើនេះ ជាពិសេសលោកនឹងសិក្សាអំពីទិន្នផលនៅក្នុងរដូវប្រមូលផលខាងមុខនេះ។
លោកបញ្ជាក់ថា៖ «យើងចាំបាច់ត្រូវសិក្សាអំពីទិន្នផលនៃការប្រមូលផលសម្រាប់រដូវប្រមូលផលខាងមុខនេះសិន មុននឹងយើងដាក់សំណើទៅរដ្ឋាភិបាលសម្រាប់ការបង្កើនទំហំកម្ចី»។
លោកថ្លែងថា៖ «យើងចាំបាច់ត្រូវយល់ដឹងឲ្យបានច្បាស់លាស់ថា តើទិន្នផលប្រមូលផលនៅពេលខាងមុខតម្រូវឲ្យយើងបង្កើនកម្ចីបន្ថែមទៀតសម្រាប់វិស័យស្រូវអង្ករឬអត់?»។
លោកបន្ថែមថា នៅពេលការសិក្សាបញ្ចប់ លោកនឹងដាក់សំណើទៅរដ្ឋាភិបាល ទាំងការបង្កើនទំហំកម្ចី និងពេលវេលាសម្រាប់ការសង។
កម្ពុជាបាននាំចេញអង្ករជាង ៤២៦ ០៧៣ តោនទៅទីផ្សារអន្តរជាតិនៅរយៈពេល ៧ ខែដំបូងឆ្នាំ ២០២០ ដោយកើនឡើងជាង ៣៨ ភាគរយ ធៀបនឹង ៣០៨ ០១៣ តោនក្នុងរយៈពេលដូចគ្នាកាលពីឆ្នាំ ២០១៩។ នេះបើយោងតាមទិន្នន័យបានពីក្រសួងកសិកម្ម រុក្ខាប្រមាញ់ និងនេសាទ។
ប្រទេសចិននៅតែជាទីផ្សារធំជាងគេសម្រាប់អង្ករកម្ពុជាដោយនាំចូល ១៥៥ ៣២៧ តោន ស្មើនឹង ៣៦,៤៦ ភាគរយនៃការនាំចេញអង្ករសរុបរបស់កម្ពុជា ខណៈដែលទីផ្សារអឺរ៉ុបបាននាំចូល ១៤៤ ២៤៧ តោន (៣៣,៨៥ ភាគរយ) តំបន់អាស៊ានបាននាំចូល ៥៧ ០៦៤ តោន (១៣,៣៩ ភាគរយ) និងទិសដៅផ្សេងទៀតមានចំនួន ៦៩ ៤៣៥ តោន (១៦,៣ ភាគរយ)។
ទិន្នន័យបង្ហាញដែរថា កាលពីឆ្នាំ ២០១៩ កម្ពុជាបាននាំចេញអង្ករ ៦២០ ១០៦ តោន ធ្លាក់ចុះ ០,៩៧ ភាគរយធៀបនឹង ៦២៦ ២២៥ តោនកាលពីឆ្នាំ ២០១៨៕ LA