ភ្នំពេញៈ ធនាគារអភិវឌ្ឍន៍ជនបទ និងកសិកម្ម (ARDB) ដែលគ្រប់គ្រងដោយរដ្ឋ បានបញ្ចេញមូលនិធិ ៥០ លានដុល្លារ ជាផ្លូវការសម្រាប់ការផ្ដល់កម្ចីដល់សហគ្រាសធុនតូច និងមធ្យម (SME) នៅក្នុងវិស័យកសិឧស្សាហកម្ម។
ថ្លែងនៅក្នុងពិធីចុះហត្ថលេខាលើអនុស្សរណៈនៃការយោគយល់គ្នាជាមួយសមាគមសហគ្រិនស្ដ្រីកម្ពុជា (CWEA) សមាគមសហគ្រិនវ័យក្មេងកម្ពុជា (YEAC) និងសមាគមអ្នកវិនិយោគកម្ពុជា (CIC) កាលពីថ្ងៃចន្ទ លោក កៅ ថាច អគ្គនាយក RDB បានឲ្យដឹងថា SME អាចខ្ចីប្រាក់បានរហូតដល់ ៣០០ ០០០ ដុល្លារ ជាមួយនឹងអត្រាការប្រាក់ ៦ ភាគរយសម្រាប់ទុនបង្វិល និង ៦,៥ ភាគរយសម្រាប់ទុនវិនិយោគក្នុង ១ ឆ្នាំ។
លោក កៅ ថាច បានឲ្យដឹងថា SME ជាង ៥០០ ០០០ នៅកម្ពុជានឹងទទួលបានអត្ថប្រយោជន៍ពីមូលនិធិនេះ ហើយ SME អាចស្នើសុំមូលនិធិនេះចាប់ពីពេលនេះតទៅ។ លោកថ្លែងថា៖ «មូលនិធិនេះមានបំណងក្នុងការបង្កើនចង្វាក់ផលិត និងដើម្បីរក្សាសមត្ថភាពប្រកួតប្រជែងនៅក្នុងវិស័យ SME។ RDB នឹងផ្ដល់កម្ចីមានអត្រាការប្រាក់ទាប និងហានិភ័យទាបពេលសងត្រឡប់»។
លោកស្រី អេង លីគង់ ប្រធានសមាគមសហគ្រិនស្ដ្រីកម្ពុជា (CWEA) បានឲ្យដឹងថា ខណៈលទ្ធភាពក្នុងការទទួលបានហិរញ្ញប្បទានរបស់ SME នៅមានកម្រិត [មូលនិធិនេះ] នឹងធ្វើឲ្យមានភាពងាយស្រួលសម្រាប់ SME ក្នុងការទទួលបានហិរញ្ញប្បទាន។ លោកស្រីបន្តថា៖ «ខ្ញុំគិតថាប្រាក់ ៣០០ ០០០ ដុល្លារ នឹងជួយដើម្បីពង្រីកអាជីវកម្មរបស់ពួកគេ»។
របាយការណ៍សាជីវកម្មហិរញ្ញវត្ថុអន្តរជាតិ ដែលបានចេញផ្សាយកាលពីខែសីហាបានឲ្យដឹងថា សហគ្រិនស្ដ្រីរបស់ប្រទេសកម្ពុជាបន្តជួបការពិបាកដោយសារតែលទ្ធភាពទទួលបានហិរញ្ញវត្ថុនៅមានកម្រិតសម្រាប់ការពង្រីកអាជីវកម្ម។ មានតែ ៣ ភាគរយប៉ុណ្ណោះមានលទ្ធភាពទទួលបានឥណទានពីគ្រឹះស្ថានមីក្រូហិរញ្ញវត្ថុ និងធនាគារ។
របាយការណ៍នេះប៉ាន់ប្រមាណថា តម្រូវការឥណទានពីសហគ្រិនស្ដ្រីបច្ចុប្បន្នមានចំនួន ៤,២ ពាន់លានដុល្លារ ស្មើនឹងជិត ៦៣ ភាគរយ នៃថវិកាជាតិសម្រាប់ឆ្នាំ ២០១៩ ដែលមានចំនួន ៦,៧ ពាន់លានដុល្លារ របស់ប្រទេស កម្ពុជា។
ការអង្កេតមួយដោយក្រសួងឧស្សាហកម្មក្នុងចំណោមសហគ្រាស ៧១ នៅកម្ពុជាបានរកឃើញថា ពួកគេត្រូវការជំនួយផ្នែកស្រាវជ្រាវទីផ្សារ ការអភិវឌ្ឍសេវា ការវេចខ្ចប់ ការទទួលយកបច្ចេកវិទ្យា ធនធានមនុស្ស ការទទួលបានកម្លាំងពលកម្ម ការទទួលបានហិរញ្ញវត្ថុ ការចុះបញ្ជីអាជីវកម្ម ការបង់ពន្ធ និងការកែលម្អស្ដង់ដាអនាម័យ។
លោក មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុបានឲ្យដឹងកាលពីសប្តាហ៍មុនថា ជា ធនាគារ SME ដែលមានដើមទុនដំបូង ១០០ លានដុល្លារត្រូវបានរំពឹងថានឹងចាប់ផ្ដើមដំណើរការក្នុងពេលឆាប់ៗនេះ។ លោកថ្លែងថា៖ «យើងកំពុងរង់ចាំអាជ្ញាប័ណ្ណពីធនាគារជាតិនៃកម្ពុជា ហើយយើងនឹងចាប់ផ្ដើមដំណើរការក្នុងពេលឆាប់ៗ។ ធនាគារនេះមានគោលបំណងក្នុងការផ្ដល់ជំនួយហិរញ្ញវត្ថុដល់ SME ក្នុងស្រុកជាមួយនឹងអត្រាការប្រាក់ទាប»៕LA