ភ្នំពេញៈ ធនាគារអភិវឌ្ឍន៍ជនបទ និងកសិកម្ម (ARDB) អាចនឹងបញ្ចេញឥណទានពិសេសចំនួន ២០ លានដុល្លារជាលើកដំបូង ចាប់តាំងពីធនាគារគ្រប់គ្រងដោយរដ្ឋនេះបានប្រកាសបញ្ចេញមូលនិធិ ៥០ លានដុល្លារ សម្រាប់ផ្តល់កម្ចីដល់សហគ្រាសខ្នាតតូច និងមធ្យមក្នុងវិស័យកសិឧស្សាហកម្ម។
លោក កៅ ថាច អគ្គនាយក ARDB បានឲ្យដឹងថា បច្ចុប្បន្ន ARDB ទទួលបានពាក្យស្នើសុំកម្ចីពីសហគ្រាសខ្នាតតូច និងមធ្យមចំនួន ១៥៣ ក្នុងរង្វង់ទឹកប្រាក់ប្រមាណ ២០ លានដុល្លារ ដែលក្នុងចំណោមនោះ ARDB បានអនុម័តរួចរាល់ប្រមាណ ៥០ ម៉ឺនដុល្លារ ហើយសល់ពីនោះអនុម័តជាបន្តទៀត។
លោកថ្លែងថា៖ «ខ្ញុំគិតថា ឥណទាននេះនឹងជួយបានច្រើនដល់វិស័យកសិកម្ម និងបងប្អូនប្រជាកសិករ។ យើងនឹងបន្តចុះផ្សព្វផ្សាយនៅតាមមូលដ្ឋានបន្ថែមទៀតដើម្បីឲ្យគាត់ដឹង និងទទួលបានឥណទាននេះ»។
ARDB បានបញ្ចេញមូលនិធិ ៥០ លានដុល្លារជាផ្លូវការកាលពីខែមីនា សម្រាប់ផ្តល់កម្ចីដល់សហគ្រាសនៅក្នុងវិស័យកសិឧស្សាហកម្មក្នុងអត្រាការប្រាក់ទាបដែលសហគ្រិនអាចខ្ចីប្រាក់ចាប់ពី ១ ម៉ឺនដុល្លារទៅ ៣០ ម៉ឺនដុល្លារដើម្បីយកទៅពង្រីកអាជីវកម្ម។
យោងតាមសេចក្តីប្រកាសព័ត៌មានរបស់រដ្ឋាភិបាល ដែលចេញផ្សាយកាលពីថ្ងៃអង្គារបានឲ្យដឹងថា រាជរដ្ឋាភិបាលបានសម្រេចធ្វើការបញ្ចុះអត្រាការប្រាក់ពី ៦ ភាគរយមកត្រឹម ៥ ភាគរយ ក្នុង ១ ឆ្នាំសម្រាប់ទុនបង្វិល និងពី ៦,៥ ភាគរយ មក ៥,៥ ភាគរយ សម្រាប់ទុនវិនិយោគ ដោយមិនគិតកម្រៃសេវាផ្សេងៗ។
សេចក្តីប្រកាសព័ត៌មានបានបន្តថា រដ្ឋាភិបាលក៏សម្រេចកែសម្រួលរយៈពេលឥណទានអតិបរមាពី ៥ ឆ្នាំទៅ ៧ ឆ្នាំសម្រាប់ទុនវិនិយោគ ខណៈរក្សាទុករយៈពេលខ្លីអតិបរមា ២ ឆ្នាំសម្រាប់ទុនបង្វិល។ ទន្ទឹមនឹងនេះរដ្ឋក៏សម្រេចបន្តមិនអនុញ្ញាតឲ្យអតិថិជនដែលទទួលបានកម្ចីពីកម្មវិធីមូលនិធិពិសេស យកកម្ចីទៅប្រើប្រាស់ធ្វើបុនហិរញ្ញប្បទាន (Refinancing)។
ជាមួយគ្នានេះសហគ្រាសខ្នាតតូច និងមធ្យមដែលមិនទាន់ចុះបញ្ជីផ្លូវការក៏អាចដាក់ពាក្យស្នើសុំឥណទានបានដែរ ដោយតម្រូវឲ្យបំពេញលក្ខខណ្ឌចុះបញ្ជីតាមក្រោយក្នុងរយៈពេល ១ ខែបន្ទាប់ពីទទួលបានឥណទាន ខណៈរដ្ឋាភិបាលបានពង្រីកវិសាលភាពនៃការផ្តល់ឥណទានដល់បណ្តុំសហគ្រាសខ្នាតតូច និងមធ្យម (SME Cluster) ដោយលើកទឹកចិត្តពួកគេឲ្យប្រើប្រាស់សេវាបច្ចេកទេសរបស់មជ្ឈមណ្ឌលសហគ្រិនខ្មែរ (Khmer Entrepreneur) ដើម្បីសម្រួលដល់ការទទួលបានឥណទាននេះ។
របាយការណ៍សាជីវកម្មហិរញ្ញវត្ថុអន្តរជាតិ (IFC) ដែលចេញផ្សាយកាលពីខែសីហាឆ្នាំមុនបានឲ្យដឹងថា សហគ្រិនស្ដ្រីនៅកម្ពុជាបន្តជួបការពិបាកដោយសារតែលទ្ធភាពទទួលបានហិរញ្ញវត្ថុនៅមានកម្រិតសម្រាប់ការពង្រីកអាជីវកម្ម។ មានតែ ៣ ភាគរយប៉ុណ្ណោះមានលទ្ធភាពទទួលបានឥណទានពីគ្រឹះស្ថានហិរញ្ញវត្ថុ។
ការអង្កេតមួយដោយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ក្នុងចំណោមសហគ្រាស ៧១ នៅកម្ពុជាបានរកឃើញថា ពួកគេត្រូវការជំនួយផ្នែកស្រាវជ្រាវទីផ្សារ ការអភិវឌ្ឍសេវា ការវេចខ្ចប់ ការទទួលយកបច្ចេកវិទ្យា ធនធានមនុស្ស ការទទួលបានកម្លាំងពលកម្ម ការទទួលបានហិរញ្ញវត្ថុ ការចុះបញ្ជីអាជីវកម្ម ការបង់ពន្ធ និងកែលម្អស្ដង់ដាអនាម័យ៕ LA