ភ្នំពេញៈ ភាគហ៊ុនធនាគារអេស៊ីលីដា ២៥ ភាគរយ ដែលកាន់កាប់ដោយ ASA អាចនឹងត្រូវចុះបញ្ជីជួញដូរជាផ្លូវការនៅផ្សារភាគហ៊ុនកម្ពុជានៅខែក្រោយ ខណៈតំណាងក្រុមហ៊ុន ASA បានបញ្ជាក់កាលពីថ្ងៃចន្ទថា ខ្លួនបានបំពេញលក្ខខណ្ឌស្ទើរទាំងស្រុងគិតមកទល់ពេលនេះដើម្បីបានការអនុញ្ញាតចុះបញ្ជីជួញដូរជាផ្លូវការ។
លោក នេត ពិសិដ្ឋ ប្រធានក្រុមប្រឹក្សាភិបាល ASA ឲ្យដឹងថា ASA បានបញ្ចប់នីតិវិធីបោះផ្សាយមូលបត្រជាសាធារណៈលើកដំបូងប្រហែល ៩៦ ភាគរយហើយ និងមានទំនុកចិត្តថា ភាគហ៊ុននេះនឹងអាចជួញដូរក្នុងផ្សារមូលបត្រនៅខែវិច្ឆិកា។
លោកបន្តថា ការងារដែលនៅសល់គឺគ្រាន់តែអំពីការកំណត់តម្លៃភាគហ៊ុន ត្រូវចុះបញ្ជីនៅ CSX មុនពេលដាក់បញ្ចូលការសម្រេចចិត្តទៅក្នុងឯកសារបង្ហាញ ដើម្បីស្វែងរកការយល់ព្រមពីគណៈកម្មការមូលបត្រកម្ពុជា (SECC) តែប៉ុណ្ណោះ។
លោកថ្លែងថា៖ «ការដាក់លក់ភាគហ៊ុនរបស់ ASA គឺជាការទន្ទឹងរបស់សាធារណជនដែលចង់មានឱកាស រកស៊ីជាមួយធនាគារអេស៊ីលីដា។ ឆាប់ៗខាងមុខ ពួកគាត់អាចដាក់ទុនវិនិយោគក្នុងរូបភាព [ទិញលក់ភាគហ៊ុន] នេះវិញ បើសិនគាត់មិនចង់បានវិនិយោគតាមការដាក់ប្រាក់បញ្ញើ»។
លោក ពិសិដ្ឋ បានបញ្ជាក់ថា ASA នឹងចុះបញ្ជីភាគហ៊ុនទាំងអស់របស់ខ្លួននៅ CSX ប៉ុន្តែបានថ្លែងថា លោកមិនអាចបង្ហាញព័ត៌មានលម្អិតអំពីតម្លៃភាគហ៊ុននៅឡើយទេ ដោយសារតែវាកំពុងស្ថិតក្រោមការពិភាក្សាជាមួយក្រុមអ្នកជំនាញ រួមមានក្រុមហ៊ុនធានាទិញមូលបត្រ ASA ខ្លួនឯង និងក្រុមការងាររបស់ CSX។
ក្រុមហ៊ុន ASA Plc ត្រូវបានបង្កើតឡើងកាលពីឆ្នាំ ២០០០ ដោយគ្រប់គ្រងភាគហ៊ុនជាង ២៥ ភាគរយ នៅក្នុងធនាគារអេស៊ីលីដា ជាមួយនឹងភាគទុនិកជាង ១០ ០០០ នាក់ ភាគច្រើនជាបុគ្គលិករបស់អេស៊ីលីដា។
រាល់គ្រឹះស្ថានហិរញ្ញវត្ថុដែលចង់បោះផ្សាយមូលបត្រលក់ក្នុងផ្សារហ៊ុនត្រូវមានការយល់ព្រមពីធនាគារជាតិនៃកម្ពុជា ដែលតម្រូវឲ្យបោះផ្សាយភាគហ៊ុន ២០ ភាគរយនៃភាគហ៊ុនរបស់ក្រុមហ៊ុន និងមូលបត្របំណុលមិនឲ្យលើសពី ២០ ភាគរយនៃទ្រព្យសកម្មសរុប។
លោក នេត ពិសិដ្ឋ ឲ្យដឹងថា ASA មិនមែនជាគ្រឹះស្ថានហិរញ្ញវត្ថុទេ ប៉ុន្តែជាក្រុមហ៊ុនភាគទុនិករបស់អេស៊ីលីដា ដូច្នេះក្រុមហ៊ុននេះគ្រាន់តែជូនដំណឹងទៅ NBC ដែលកិច្ចការនេះក្រុមហ៊ុនបានធ្វើរួចហើយ។
លោក ល្មុនសូឡី ប្រធាននាយកដ្ឋានចុះបញ្ជី និងផ្ដល់ព័ត៌មាននៃផ្សារមូលបត្រកម្ពុជា បានឲ្យដឹងថា ការកំណត់តម្លៃភាគហ៊ុនរបស់ ASA ត្រូវបានពិភាក្សាយ៉ាងសំខាន់ខណៈ CSX ចង់ធានាឲ្យប្រាកដថា ការកំណត់តម្លៃគឺសមហេតុផលសម្រាប់សាធារណជន។
លោកថ្លែងថា៖ «មានការបារម្ភខ្លះដែរថា តម្លៃភាគហ៊ុនអាចធ្លាក់ចុះដោយសារថាអ្នកដែលកំពុងកាន់កាប់ភាគហ៊ុនស្រាប់ [របស់ ASA] អាចនឹងប្រញាប់ប្រញាល់ក្នុងការលក់ភាគហ៊ុនដើម្បីបានប្រាក់ចំណេញពីការឡើងថ្លៃហ៊ុនធៀបនឹងពេលទិញ»។
តែលោកបន្ថែមថា៖ «យ៉ាងណា ភាពជាក់ស្តែងសម្រាប់រយៈពេលវែង ពួកគេអាចទទួលបានតម្លៃកាន់តែខ្ពស់ និងប្រាក់ចំណេញកាន់តែច្រើនដោយសារថា អេស៊ីលីដា នឹងបន្តរីកចម្រើននាពេលអនាគត»៕ LA