.jpg)
តំបន់សេដ្ឋកិច្ចពិសេសភ្នំពេញមានរោងចក្រជិត ១០០ ពី ១៤ ប្រទេស។ ហុង មិនា
ភ្នំពេញៈ ក្រុមហ៊ុន Asiatic Group (Holdings) Ltd ដែលមានមូលដ្ឋាននៅប្រទេសសិង្ហបុរីកំពុងស្វែងរកការទាមទារទឹកប្រាក់ចំនួន ១៤,៤ លានដុល្លារ ពីក្រុមហ៊ុនតំបន់សេដ្ឋកិច្ចពិសេសភ្នំពេញ (PPSP) ដែលចុះបញ្ជីនៅក្រុមហ៊ុនផ្សារមូលបត្រកម្ពុជា (CSX) ចំពោះការចោទប្រកាន់ដែលថាបានរំលោភលើកិច្ចព្រមព្រៀងវិនិយោគរួម (JV) នៃរោងចក្រថាមពលមួយ។
ក្រុមហ៊ុន Colben System Pte Ltd ដែលគ្រប់គ្រងទាំងស្រុងដោយក្រុមហ៊ុន Asiatic Group និងក្រុមហ៊ុន Colben Energy Holdings (PPSEZ) Ltd (CEZH) ដែលគ្រប់គ្រងភាគហ៊ុន ៩៥ ភាគរយ បានចាប់ផ្ដើមនីតិវិធីមជ្ឈត្តកម្មដែលត្រូវបានបញ្ជូនទៅមជ្ឈមណ្ឌលមជ្ឈត្តកម្មអន្តរជាតិនៅប្រទេសសិង្ហបុរីកាលពីថ្ងៃទី ១៩ ខែវិច្ឆិកា។
នៅក្នុងសេចក្ដីប្រកាសព័ត៌មានមួយកាលពីសប្ដាហ៍មុនលោក Tan Boon Kheng នាយកគ្រប់គ្រងក្រុមហ៊ុន Asiatic Group ដែលចុះបញ្ជីនៅក្រុមហ៊ុន Singapore Exchange Ltd បានឱ្យដឹងថា ការរំលោភលើកិច្ចព្រមព្រៀង JV បានបណ្ដាលឱ្យមានការផ្លាស់ប្តូរយ៉ាងច្រើននៅក្នុងគំរូប្រតិបត្តិការ និងអាជីវកម្មរបស់រោងចក្រផលិតថាមពលមួយនេះដែលធ្វើឱ្យប៉ះពាល់ដល់អត្ថប្រយោជន៍របស់គម្រោងនេះ។
លោក Tan បានឱ្យដឹងថា បណ្ដឹងនេះតំណាងឱ្យការខាតបង់របស់ភាគទុនិករបស់ក្រុមហ៊ុន Colben និងក្រុមហ៊ុន CEZH នៅក្នុងក្រុមហ៊ុន Colben Energy (Cambodia) PPSEZ Ltd ដែលក្រុមហ៊ុន JV រួមជាមួយក្រុមហ៊ុន PPSP បានបង្កើតឡើងកាលពីឆ្នាំ ២០០៦ ជាលទ្ធផលនៃការខាតបង់ដែលរំពឹងទុកនៃប្រាក់ចំណូលរបស់ក្រុមហ៊ុន JV នេះ។
ជាការឆ្លើយតបភ្លាមៗ ក្រុមហ៊ុន PPSP ដែលបានបញ្ជាក់ពីទំនាក់ទំនងរបស់ខ្លួនជាមួយក្រុមហ៊ុន Asiatic Group បានឱ្យដឹងថា ក្រុមហ៊ុននេះកំពុងស្វែងរកការផ្ដល់យោបល់ផ្នែកច្បាប់ ហើយនឹងប្រកាសជាថ្មីលើការអភិវឌ្ឍច្បាស់លាស់ស្ដីពីបញ្ហានេះ។
ក្រុមហ៊ុន PPSP គ្រប់គ្រងភាគហ៊ុន ២៣ ភាគរយនៅក្នុងក្រុមហ៊ុន JV ដែលត្រូវបានចូលរួមនៅក្នុងការផលិត និងផ្គត់ផ្គង់ថាមពលដល់តំបន់សេដ្ឋកិច្ចពិសេស (SEZ)។
ក្រុមហ៊ុន PPSP ដែលចុះបញ្ជីនៅផ្សារគោលបានឱ្យដឹងនៅក្នុងឯកសារមួយផ្ញើទៅ CSX កាលពីថ្ងៃសុក្រថា៖ «ក្រុមវិនិយោគិនរបស់យើង និងសាធារណជនត្រូវបានជូនដំណឹងយ៉ាងច្បាស់លាស់ស្ដីពីការជូនដំណឹងនៃមជ្ឈត្តកម្មនេះ»។
លោកស្រី លឹម ឈីវហូរ កាន់កាប់ភាគហ៊ុន ៤៥,០៩ ភាគរយ របស់ក្រុមហ៊ុន PPSP ដែលប្រតិបត្តិការតំបន់សេដ្ឋកិច្ចពិសេសប៉ោយប៉ែតលើផ្ទៃដីទំហំ ៦៨,៤ ហិកតា នៅខេត្តបន្ទាយមានជ័យជាប់ព្រំដែនថៃផងដែរ។
តំបន់សេដ្ឋកិច្ចពិសេសភ្នំពេញមានក្រុមហ៊ុន ៩២ មកពីប្រទេសចំនួន ១៤ ដែលផលិតសម្លៀកបំពាក់ គ្រឿងបន្លាស់រថយន្ត អាហារ និងភេសជ្ជៈ និងផលិតផលប្លាស្ទិក។ នេះបើយោងតាមឯកសារ PPSP របស់ក្រុមហ៊ុន។
ទន្ទឹមនឹងនេះ Asiatic Group គឺជាក្រុមហ៊ុនម៉ៅការបន្តផ្នែកវិស្វកម្ម លទ្ធកម្ម និងសំណង់ និងប្រតិបត្តិការ និងការថែទាំ។ ក្រុមហ៊ុននេះក៏ប្រតិបត្តិការផ្នែកដំណោះស្រាយការការពារអគ្គិភ័យ ដែលផ្ដល់ប្រព័ន្ធពន្លត់អគ្គិភ័យ និងការការពារផងដែរ។
Colben System ជាក្រុមហ៊ុនឯកទេសខាងអាជីវកម្មនៃការផ្គត់ផ្គង់ថាមពលដែលគ្រប់គ្រង វិស្វកម្ម និងលទ្ធកម្ម និងសំណង់ផលិតថាមពល។
ក្រុមហ៊ុននេះសាងសង់ ប្រតិបត្តិការ និងថែទាំរោងចក្រថាមពលដើរដោយប្រេងខ្មៅជាមួយសមត្ថភាពដំបូង ១៥ មេហ្គាវ៉ាត់នៅក្នុងតំបន់សេដ្ឋកិច្ចនេះ។
រោងចក្រផលិតថាមពល ដែលត្រូវបានបញ្ចប់កាលពីឆ្នាំ ២០០៨ មួយនេះបានផ្គត់ផ្គង់ថាមពលសម្រាប់ក្រុមហ៊ុននានា នៅតំបន់សេដ្ឋកិច្ចពិសេសនេះ៕ LA
