ភ្នំពេញៈ BEST Inc. គឺជាក្រុមហ៊ុនផ្គត់ផ្គង់ខ្សែចង្វាក់ផ្គត់ផ្គង់ដ៏ឆ្លាតវៃ និងឡូជីស្ទិកឈានមុខគេនៅប្រទេសចិនបានចាប់ផ្ដើមប្រតិបត្តិការអាជីវកម្មរបស់ខ្លួននៅប្រទេសកម្ពុជា ដែលហៅថា BEST Express Cambodia ដែលជាការពង្រីកផែនការយុទ្ធសាស្ដ្ររបស់ក្រុមហ៊ុនក្នុងការកសាងបណ្ដាញឡូជីស្ទីកប្រកបដោយប្រសិទ្ធភាពក្នុងប្រទេសនៅតំបន់អាស៊ីអាគ្នេយ៍។
ក្រុមហ៊ុននេះចាប់ផ្ដើមដំណើរការជាផ្លូវការចាប់តាំងពីថ្ងៃទី ២ ខែកក្កដា នៅក្នុងប្រទេសកម្ពុជា ម៉ាឡេស៊ី និងសិង្ហបុរី បន្ទាប់ពីខ្លួនបានចាប់ផ្ដើមដំណើរការរួចហើយនៅក្នុងប្រទេសវៀតណាម និងថៃកាលពីឆ្នាំមុន។
ក្រុមហ៊ុនបានឲ្យដឹងថា៖ «BEST Express Cambodia ប្ដេជ្ញាថានឹងផ្ដល់សេវាដឹកជញ្ជូនជាកញ្ចប់ទូទាំងប្រទេសកម្ពុជាសម្រាប់ក្រុមហ៊ុនពាណិជ្ជកម្មតាមអេឡិចត្រូនិកបណ្ដាញដឹកជញ្ជូនដល់លំនៅឋាន ព្រមទាំងដល់ដៃអតិថិជនផងដែរ។ យើងខិតខំបម្រើអតិថិជនប្រកបដោយគុណភាពភាពងាយស្រួល សុវត្ថិភាព និងតម្លៃ។ នៅទីនេះអ្នកអាចស្វែងរកទីតាំងសេវាកម្មនៅជិតបំផុត និងតម្លៃកក់រថយន្តដឹកជញ្ជូនដោយមិនគិតថ្លៃ និងតាមដានការបញ្ជាទិញរបស់អ្នក»។
លោក Johnny Chou ស្ថាបនិក និងជាអគ្គនាយកក្រុមហ៊ុន BEST Inc បានឲ្យដឹងថា ការពង្រីកខ្លួនរបស់ក្រុមហ៊ុនគឺជាការផ្ដោតការយកចិត្តទុកដាក់នៃយុទ្ធសាស្ដ្រពិភពលោកដ៏សំខាន់របស់ក្រុមហ៊ុន ខណៈដែលការរីករាលដាលជំងឺកូវីដ១៩ បានបង្កើនល្បឿនសកម្មភាពពាណិជ្ជកម្មតាមអេឡិចត្រូនិក។
លោកថ្លែងថា៖ «យើងរីករាយក្នុងការអភិវឌ្ឍបណ្ដាញឡូជីស្ទីករបស់យើងនៅតំបន់អាស៊ីអាគ្នេយ៍ ជាតំបន់ដែលផ្ដោតការយកចិត្តទុកដាក់ដ៏សំខាន់មួយនៃយុទ្ធសាស្ដ្រពិភពលោករបស់យើង។ ការរីករាលដាលជំងឺកូវីដ១៩ បានបង្កើនល្បឿន និងពង្រីកការទុកចិត្តលើពាណិជ្ជកម្មតាមអេឡិចត្រូនិករបស់អតិថិជន និងបង្កើតឱកាសប្រកបដោយសក្ដានុពលកាន់តែខ្លាំងនៅក្នុងតំបន់នេះ»។
លោកបន្ថែមថា៖ «យើងមានទំនុកចិត្តថា សេវាឡូជីស្ទិកដែលដំណើរការដោយបច្ចេកវិទ្យារបស់យើង និងក្លាយជាជម្រើសការដឹកជញ្ជូនទំនិញរហ័សគុណភាពខ្ពស់ និងជាសមាសភាពសេវាដ៏សំខាន់សម្រាប់ទាំងពាណិជ្ជករ និងអតិថិជនក្នុងអំឡុងពេលដ៏ពិបាកនេះ និងបន្ទាប់ពីនោះ»។
តាមរយៈបទពិសោធប្រកបដោយជោគជ័យនៅប្រទេសវៀតណាម និងថៃ ក្រុមហ៊ុននេះគ្រោងនឹងប្រតិបត្តិការមជ្ឈមណ្ឌលស្ថានីយសរុបទាំង ១២ និងស្ថានីយផ្ដល់សេវាប្រហែល ៤០០ នៅប្រទេសកម្ពុជា ម៉ាឡេស៊ី និងសិង្ហបុរី ក្នុងរយៈពេល ៣ ឆ្នាំបន្ទាប់៕LA