ភ្នំពេញ: មន្ត្រីជាន់ខ្ពស់នៃអគ្គរាជទូតកម្ពុជានៅប្រទេសថៃបានស្នើសុំឱ្យក្រុមហ៊ុន Betagro Group ដែលជាក្រុមហ៊ុនផលិតម្ហូបអាហារលំដាប់ទី ២ របស់ថៃពង្រីកការវិនិយោគនៅកម្ពុជា។
លោក ហេង សុវណ្ណារិទ្ធ អនុព័ន្ធពាណិជ្ជកម្មនៃស្ថានទូតកម្ពុជាបានស្នើសុំឱ្យក្រុមហ៊ុនផលិតម្ហូបអាហារធំទី ២ Betagro Group មកវិនិយោគបង្កើតរោងចក្រកែច្នៃម្ហូបអាហារនៅកម្ពុជា ដើម្បីជំរុញការអភិវឌ្ឍខ្សែចង្វាក់តម្លៃកសិផលកម្ពុជា ដោយភ្ជាប់ជាមួយគម្រោងជំរុញទីផ្សារកសិកម្មខ្នាតតូច (AIMS) របស់ក្រសួងពាណិជ្ជកម្ម។
ការស្នើរបស់លោកត្រូវបានធ្វើឡើងក្នុងដំណើរទស្សនកិច្ចនៅក្រុមហ៊ុននេះក្នុងគោលបំណងដើម្បីផ្សព្វផ្សាយអំពីគោលនយោបាយវិនិយោគ និងកាលានុវត្តភាពធុរកិច្ចនៅកម្ពុជាកាលពីថ្ងៃអង្គារ នៅខេត្តប៉ាធុមថានីប្រទេសថៃ។
ក្នុងដំណើរទស្សនកិច្ចនេះលោក សុវណ្ណារិទ្ធ បានថ្លែងប្រាប់លោក Kritsana Wudhiprasertkul អនុប្រធានក្រុមហ៊ុន Betagro ថា រដ្ឋាភិបាលកម្ពុជាបាននិងកំពុងជំរុញការទូតសេដ្ឋកិច្ចពាណិជ្ជកម្ម វប្បធម៌ និងទេសចរណ៍ជាមួយបរទេស។
ជាការឆ្លើយតប លោក Kritsana បានសន្យាថាក្រោយពីប្រទេសទាំង ២ បើកច្រកព្រំដែនឲ្យដំណើរការឡើងវិញ ក្រុមហ៊ុននឹងដឹកនាំគណៈប្រតិភូមកទស្សនកិច្ចនៅកម្ពុជា ដើម្បីស្វែងយល់បន្ថែមពីសក្តានុពលនៃគម្រោង AIMS មុននឹងឈានទៅចុះអនុស្សរណៈយោគយល់គ្នាជាមួយក្រសួងពាណិជ្ជកម្ម។ នេះបើតាមលោក សុវណ្ណារិទ្ធ៕ LA