.jpg)
យន្តហោះ Boeing 737 NG របស់អាកាសចរណ៍ RyanAir។ AFP
ក្រុងញូវយ៉កៈ ក្រុមហ៊ុនផលិតយន្តហោះ Boeing កាលពីចុងសប្តាហ៍មុនបានបង្ហាញយន្តហោះ 737 MAX ស៊េរីចុងក្រោយបំផុតរបស់ខ្លួន ទោះបីជាយន្តហោះប្រភេទនេះនៅតែត្រូវបានចតចោលនៅទូទាំងពិភពលោក បន្ទាប់ពីការធ្លាក់យន្តហោះ ២ គ្រឿង បណ្ដាលឲ្យមនុស្សស្លាប់ក៏ដោយ។
ក្រុមមន្ដ្រីរបស់ក្រុមហ៊ុន Boeing បានដាក់បង្ហាញយន្តហោះ 737 MAX 10 នៅក្នុងពិធីមួយនៅក្នុងរោងចក្ររបស់ក្រុមហ៊ុន Boeing ក្នុងទីក្រុងវ៉ាស៊ីនតោន និងបានចេញផ្សាយរូបថតយន្តហោះដែលមានរំលេចពណ៌ស និងពណ៌ខៀវ ដោយមានការតុបតែងឡូហ្គោក្រុមហ៊ុន Boeing ។
យន្តហោះ MAX ត្រូវបានចតចោលចាប់តាំងពីខែមីនាមក បន្ទាប់ពីការធ្លាក់យន្តហោះ ២ គ្រឿងដែលបណ្ដាលឲ្យមនុស្សស្លាប់ ៣៤៦ នាក់។
ក្រុមហ៊ុន Boeing បានកាត់បន្ថយការចែកចាយយន្តហោះថ្មីៗ និងកាត់បន្ថយកម្រិតការផលិតរបស់ខ្លួន ខណៈដែលក្រុមហ៊ុននេះធ្វើការងារដើម្បីបំពេញចិត្តនិយតករថា យន្តហោះ MAX មានសុវត្ថិភាព។
ក្រុមហ៊ុន Boeing បានប្រកាសការបញ្ជាទិញថ្មីៗសម្រាប់យន្តហោះ MAX កាលពីដើមសប្ដាហ៍មុននៅក្នុងពិព័រណ៍យន្តហោះនៅទីក្រុងឌូបៃ ប៉ុន្តែក្រុមអ្នកវិភាគបានឲ្យដឹងថា ចក្ខុវិស័យរបស់ក្រុមហ៊ុននឹងនៅតែមិនច្បាស់លាស់ រហូតដល់និយតករបញ្ជាក់ច្បាស់ថា យន្តហោះ MAX នឹងដាក់ឲ្យដំណើរការជាថ្មី។
យន្តហោះម៉ូដែល MAX 10 ដែលធំជាងយន្តហោះស៊េរីមុនៗនឹងមានប្រព័ន្ធគ្រប់គ្រងការហោះហើរប្រសើរជាងមុន ដែលប្រព័ន្ធនេះត្រូវបានមើលឃើញថា ជាកត្ដាដ៏សំខាន់មួយនៅក្នុងការធ្លាក់យន្តហោះទាំង ២ គ្រឿង។
ប្រព័ន្ធ MCAS នេះត្រូវបានផ្លាស់ប្តូរបនិ្តចបន្តួច ដើម្បីផ្ដល់ដល់អ្នកបើកបរយន្តហោះគ្រប់គ្រងកាន់តែខ្លាំងឡើង។ ប៉ុន្តែនិយតករដែលរួមទាំងរដ្ឋបាលអាកាសចរណ៍សហព័ន្ធរបស់អាមេរិកផងដែរនោះ មិនបានបញ្ជាក់ការទទួលស្គាល់លើការផ្លាស់ប្តូរនេះទេ។
ក្រុមហ៊ុន Boeing បានឲ្យដឹងកាលពីដើមខែនេះថា ខ្លួនសង្ឃឹមថានឹងទទួលបានការអនុញ្ញាតពីនិយតករឲ្យហោះហើរឡើងវិញនៅមុនចុងឆ្នាំនេះ ប៉ុន្តែបានពន្យារពេលការប៉ាន់ប្រមាណរបស់ខ្លួនសម្រាប់ការចាប់ផ្ដើមសេវាជើងហោះហើរពាណិជ្ជកម្មឡើងវិញរហូតដល់ខែមករា ដើម្បីទុកពេលឲ្យមានការបណ្ដុះបណ្ដាលអ្នកបើកបរយន្តហោះ។
យន្តហោះ MAX 10 មាន ២៣០ កៅអី ដែលច្រើនជាង ២០ កៅអី ធៀបនឹងយន្តហោះដែលបានធ្លាក់របស់ក្រុមហ៊ុនអាកាសចរណ៍ Lion Air និងក្រុមហ៊ុនអាកាសចរណ៍ Ethi-opian Airlines៕ LA
