ក្រុងញូវយ៉កៈ ក្រុមហ៊ុន Boeing មានផែនការចាប់ផ្តើមបង្កើនផលិតកម្មយន្តហោះ 737 MAX មុនពេលទទួលបានការអនុម័តផ្នែកនិយតកម្មឲ្យហោះហើរយន្តហោះម៉ូដែលនេះឡើងវិញ។ នេះបើយោងតាមលោក David Calhoun នាយកប្រតិបត្តិក្រុមហ៊ុនកាលពីថ្ងៃពុធ។
លោក Calhoun ដែលថ្លែងទៅកាន់ក្រុមអ្នកយកព័ត៌មានក្នុងអំឡុងពេលវីដេអូសន្និសីទរយៈពេល ១ ម៉ោងមុនបានច្រានចោលការលើកឡើងថា យន្តហោះ MAX អាចត្រូវចតទុកចោលជាអចិន្ត្រៃយ៍។
ជំនួសមកវិញលោកបានពិពណ៌នាអំពីផែនការបង្កើនផលិតកម្មមួយដែលនឹងចាប់ផ្តើមក្នុងរយៈពេលប៉ុន្មានខែខាងមុនមុនពាក់កណ្តាលឆ្នាំនេះ ដោយចង្វាក់ផ្គត់ផ្គង់របស់ក្រុមហ៊ុន «មានភាពល្អប្រសើរមុនពេលនោះ»។
ការថ្លែងនេះបានកើតមានឡើង ១ ថ្ងៃបន្ទាប់ពីក្រុមហ៊ុន Boeing បានពន្យារពេលជាផ្លូវការរហូតដល់ពាក់កណ្តាលឆ្នាំ ២០២០ សម្រាប់ការទទួលបានការអនុម័តផ្នែកនិយតកម្មសម្រាប់យន្តហោះ MAX ដែលត្រូវបានចតទុកចោលចាប់ពីខែមីនាឆ្នាំមុនមក បន្ទាប់ពីមានករណីធ្លាក់ចំនួន ២ លើក។
ក្រុមហ៊ុន Boeing នៅខែនេះបានពន្យារពេលផលិតកម្មយន្តហោះ MAX ដែលលក់ដាច់បំផុតរបស់ខ្លួន ដោយលើកឡើងពីភាពមិនប្រាកដប្រជាចំពោះពេលវេលាដែលនិយតករនឹងអនុញ្ញាតឲ្យយន្តហោះនេះហោះហើរឡើងវិញ។
លោក Calhoun ថ្លែងថា ពេលវេលាកំណត់ថ្មីដែលបានប្រកាសនៅថ្ងៃអង្គារនេះ ធ្វើឡើងបន្ទាប់ពីមានការសម្រេចចិត្តមួយនៅដើមខែនេះ ដើម្បីអនុម័តឲ្យមានការបណ្តុះបណ្តាលអ្នកបើកបរយន្តហោះសម្រាប់អ្នកបើកបរយន្តហោះ MAX និងបានឆ្លុះបញ្ចាំងពីបំណងរបស់ក្រុមហ៊ុនអាកាសចរណ៍ដែលចង់ឲ្យមានពេលកំណត់ហោះហើរឡើងវិញជាក់លាក់មួយ៕ KC