ភ្នំពេញៈ ក្រោយពីបានចូលមកវិនិយោគជាលើកដំបូងនៅក្នុងប្រទេស កម្ពុជា អស់រយៈពេល ១៤ ឆ្នាំមក Bosch ជាក្រុមហ៊ុនផ្គត់ផ្គង់ ផ្នែកបច្ចេកវិទ្យា និងសេវាកម្ម ឈានមុខគេមួយ មានការប្ដេជ្ញាចិត្តរយៈពេលវែងនៅក្នុងទីផ្សារកម្ពុជា ហើយមានបំណងប្រើប្រាស់ជំនាញរបស់ខ្លួន ក្នុងការរួមចំណែកដល់ការកាត់បន្ថយគ្រោះថ្នាក់ចរាចរណ៍។
អ្នកយកព័ត៌មានកាសែតភ្នំពេញប៉ុស្ដិ៍ បានជួបសម្ភាសលោក ហៃ ភិរម្យ អគ្គនាយកក្រុមហ៊ុន Bosch ប្រចាំកម្ពុជា ដើម្បីផ្ដល់ចក្ខុវិស័យនៃប្រតិបត្តិការរបស់ក្រុមហ៊ុននេះនៅក្នុងឧស្សាហកម្មរថយន្ត និងការពិនិត្យមើលថា តើវិស័យឯកជនរួមចំណែកក្នុងការកែលម្អបញ្ហាផ្លូវថ្នល់ និងសុវត្ថិភាពរថយន្តដូចម្ដេច?
តើក្រុមហ៊ុន Bosch បានបើកដំណើរការក្រុមហ៊ុនបុត្រសម្ព័ន្ធរបស់ខ្លួននៅទីក្រុងភ្នំពេញពីពេលណា?
ក្រុមហ៊ុន Bosch បានចូលមកវិនិយោគជាលើកដំបូងនៅកម្ពុជាកាលពីឆ្នាំ ២០០៤ តាមរយៈពាណិជ្ជកម្មឧបករណ៍អគ្គិសនីរបស់ខ្លួន។ បន្ទាប់មកគឺប្រព័ន្ធគ្រឿងបន្លាស់ និងប្រព័ន្ធសុវត្ថិភាពរថយន្ត ១ ឆ្នាំក្រោយមក។ ជាមួយនឹងការពង្រីកសកម្មភាពពាណិជ្ជកម្មរបស់ខ្លួនរយៈពេលប៉ុន្មានឆ្នាំមក កាលពីឆ្នាំ ២០១៣ ក្រុមហ៊ុន Bosch បានពង្រឹងការប្ដេជ្ញាចិត្តរបស់ខ្លួនចំពោះទីផ្សារកម្ពុជា តាមរយៈការប្រែក្លាយទៅជាស្ថាប័នផ្នែកច្បាប់មួយ ដែលអាចឲ្យក្រុមហ៊ុនមួយនេះបង្កើនការគាំទ្រការលក់កាន់តែខ្លាំងឡើងដល់អតិថិជនរបស់ខ្លួននៅក្នុងផលិតផល និងដំណោះស្រាយផ្សេងៗរបស់ខ្លួន។
កម្ពុជា គឺជាប្រទេសដែលរីកចម្រើនរហ័សនៅក្នុងតំបន់ ដោយជាមធ្យមមានកំណើនសេដ្ឋកិច្ច ៧ ភាគរយក្នុងរយៈពេល ១០ ឆ្នាំចុងក្រោយនេះ។ វត្តមានក្នុងស្រុកអាចឲ្យ Bosch ដែលជាក្រុមហ៊ុនផ្គត់ផ្គង់ពិភពលោកមួយ ផ្នែកបច្ចេកវិទ្យា និងសេវា ដើម្បីគាំទ្រការអភិវឌ្ឍនេះ តាមរយៈការផ្ដល់ផលិតផលមានគុណភាព និងសេវារបស់ប្រទេស អាល្លឺម៉ង់ ដល់ទីផ្សារកម្ពុជា។
បើសម្លឹងមើលទៅឧស្សាហកម្មជាច្រើន ដែលក្រុមហ៊ុន Bosch អាចដោះស្រាយជាមួយផលិតផលជាច្រើនរបស់ខ្លួន តើនៅក្នុងឧស្សាហកម្ម ណាមួយដែលអ្នកមើលឃើញថា ជាឱកាសមួយនៅកម្ពុជា?
យើងមើលឃើញកំណើនតម្រូវការខាងដំណោះស្រាយគ្រឿងបន្លាស់រថយន្ត និងសម្រាប់គ្រឿងយន្តធុនធ្ងន់ និងរថយន្តដឹកទំនិញ ដែលយើងហៅថា ទីផ្សារ «រថយន្តបើកបរលើ ផ្លូវពិបាក»។ បើយោងតាមក្រសួងសាធារណការ និងដឹកជញ្ជូន ចំនួន រថយន្តចុះបញ្ជីត្រឹមឆ្នាំ ២០១៧ នៅកម្ពុជាមានប្រហែល ៤ លានគ្រឿង។ ទិដ្ឋភាពនៃទីផ្សាររថយន្តរបស់កម្ពុជា កំពុងមានភាពចម្រុះទាក់ទងនឹងចំនួននៃការផលិត និងម៉ូដែលរថយន្តនៅក្នុងប្រទេសនេះ។
ក្រុមហ៊ុន Bosch កំពុងគាំទ្រនិន្នាការនេះ តាមរយៈការបន្តពង្រីកផលិតផលរបស់ខ្លួន។ ស្របនឹងកិច្ចខិតខំប្រឹងប្រែងលើកកម្ពស់របស់ក្រសួងសាធារណការ និងដឹកជញ្ជូនដើម្បីកែលម្អសុវត្ថិភាពរបស់រថយន្តដឹកទំនិញ យើងកំពុងពង្រីកបន្ថែមទៀតនូវ ផលបត្រផលិតផលរបស់យើង ដោយការនាំឧបករណ៍ និងយកគ្រឿងបន្លាស់ និងគ្រឿងម៉ាស៊ីនកាន់តែច្រើន (ផ្នែកផលិតរថយន្តធុនធ្ងន់)។
មានការធានាសេវាកម្មប្រកបដោយគុណភាពយ៉ាងណា ខណៈនៅទីនេះក៏មានទីផ្សារក្រៅផ្លូវការច្រើនផងដែរ?
យើងធ្វើការងារយ៉ាងប្រសើរជាមួយដៃគូរបស់យើងនៅប្រទេសជិតខាង ដើម្បីធានាផលិតផលប្រកបដោយគុណភាព ទោះបីជាយើងនៅតែប្រឈមបញ្ហាមួយចំនួនសម្រាប់ពួកយើងក៏ដោយ ខណៈប្រតិបត្តិការស្របច្បាប់ពេញលេញនៅទីនេះ វានៅតែមានផលិតផលក្លែងក្លាយ ឬផលិតផលនាំចូលក្រៅផ្លូវការមកទីផ្សារនេះ។
ប៉ុន្តែយើងបានព្យាយាមក្នុងការកាត់បន្ថយបញ្ហានេះ ហើយយើងសហការជាមួយនគរបាលប្រឆាំងផលិតផលក្លែងក្លាយ ដើម្បីគ្រប់គ្រងផងដែរ។ បើទោះបីជាយ៉ាងណាក៏ដោយ ក៏អតិថិជនរបស់យើង ពិតជាបានទទួលសេវាមានគុណភាពល្អពីយើងផងដែរ។ ផលិតផលឧបករណ៍ជាងជំនាញក្រុមហ៊ុន BOSCH មានលេខកូដសម្គាល់ ដែលអាចបញ្ជាក់ដោយអនឡាញ និងមានការបញ្ជាក់លេខកូដ អតិថិជននឹងទទួលអត្ថប្រយោជន៍ ការធានា ដែលពួកគេមិនអាចទទួលបានពីទីផ្សារក្រៅផ្លូវការនោះទេ។
តើអ្វីជាការប្ដេជ្ញាចិត្តបន្ថែមទៀតរបស់ក្រុមហ៊ុន Bosch នៅក្នុងឧស្សាហកម្មរថយន្តរបស់ប្រទេស កម្ពុជា?
យើងអាចនិយាយថា មិនមានរថយន្តណាមួយដែលមិនប្រើផលិតផលក្រុមហ៊ុន Bosch ឬជាគ្រឿងបង្គុំរបស់ Bosch ទេ បើមិនច្រើនក៏តិចតួចដែរ ដែលបានបំពាក់នៅក្នុងរថយន្តទាំងនោះ។
ក្រុមហ៊ុន Bosch មានបំណងធានាផលិតផលមានគុណភាពខ្ពស់ ជាមួយនឹងបច្ចេកវិទ្យាចុងក្រោយ ត្រូវបានផ្ដល់ឲ្យត្រូវនឹងតម្រូវការរបស់ទីផ្សាររថយន្តក្នុងស្រុក។ ក្នុងនាមជាក្រុមហ៊ុនពិភពលោកដ៏សំខាន់មួយនៅក្នុងទីផ្សាររថយន្ត ក្រុមហ៊ុន Bosch គឺជាជំនួយនៅពីក្រោយកន្លែងកើតហេតុនៃដងផ្លូវ និងសុវត្ថិភាពរថយន្ត។ បើយោងតាមរបាយការណ៍ដែលចេញផ្សាយថ្មីៗ បានពីអង្គការសុខភាពពិភពលោក ការស្លាប់ដោយគ្រោះថ្នាក់ចរាចរណ៍លើពិភពលោក បានកើនឡើងដល់ ១,៣៥ លាននាក់ប្រចាំឆ្នាំ ក្នុងនោះប្រជាជនប្រហែល ៣ ៧០០ នាក់ស្លាប់តាមផ្លូវជារៀងរាល់ថ្ងៃ។ នៅក្នុងប្រទេស កម្ពុជា ប្រជាជន ១ ៧៣៦ នាក់បានស្លាប់ដោយសារគ្រោះថ្នាក់ចរាចរណ៍រហូតមកដល់ឆ្នាំនេះ។
ក្រុមហ៊ុន Bosch បន្តវិនិយោគយ៉ាងខ្លាំងលើការស្រាវជ្រាវ និងការ អភិវឌ្ឍ ក្នុងការបង្កើតបច្ចេកវិទ្យារថយន្តសង្គ្រោះជីវិត ដូចជា ប្រព័ន្ធ ABS និង ESP ។ ABS និង ESP បានសង្រ្គោះជីវិតមនុស្សរាប់ពាន់នាក់នៅជុំវិញពិភពលោក។ ចាប់តាំងពីឆ្នាំ ២០១៤ បច្ចេកវិទ្យាសុវត្ថិភាពទាំងនេះ ត្រូវតែមាននៅក្នុងរថយន្តចុះបញ្ជីថ្មីៗនៅអឺរ៉ុប ហើយនៅអាស៊ាន ម៉ាឡេ ស៊ី ជាប្រទេសដំបូងដែលផ្ដល់សិទ្ធិក្នុងការបំពាក់ប្រព័ន្ធ ESP នៅក្នុងរថយន្តថ្មីចាប់ពីខែមិថុនា ឆ្នាំ ២០១៨។
តើអត្រាមរណភាពដែលជាប់ទាក់ទងនឹងផ្លូវថ្នល់ អាចដោយសារតែឥរិយាបថការបើកបរ ដែលមិនគោរពច្បាប់ចរាចរណ៍និងភាពធ្វេសប្រហែសរបស់អ្នកបើកបរដែរឬទេ?
គ្រោះថ្នាក់ប្រហែល ៩០ ភាគរយអាចត្រូវបានសន្មតដោយសារតែកំហុសរបស់មនុស្ស។ ឧទាហរណ៍ ហានិភ័យមិនត្រូវបានរកឃើញ ឬស្ថានការណ៍មិនត្រូវបានវិនិច្ឆ័យដោយត្រឹមត្រូវ ហើយអ្នកបើកបរមានប្រតិកម្មយឺតពេក ឬមិនត្រឹមត្រូវ។ ការប្រើប្រាស់ចំណេះដឹងដែលទទួលបានពីការស្រាវជ្រាវគ្រោះថ្នាក់ផ្សេងៗ ក្រុមហ៊ុន Bosch កំពុងវិនិយោគលើការបង្កើតបច្ចេកវិទ្យាដែលជួយអ្នកបើកបររថយន្ត ដើម្បីគេចផុតពីហានិភ័យដែលអាចកើតឡើង។ ក្រុមហ៊ុន Bosch ជឿជាក់ថា មានតែតាមរយៈវិធានការរួមប៉ុណ្ណោះ ទើបយើងមើលឃើញការផ្លាស់ប្តូរ។
យើងអំពាវនាវឲ្យមានការពិភាក្សាយ៉ាងសកម្មបន្ថែមទៀត និងការសហការរវាងរដ្ឋាភិបាល សហគមន៍វិទ្យាសាស្ដ្រ អង្គការមិនមែនរដ្ឋាភិបាល ឧស្សាហកម្មរថយន្ត និងសាធារណជនទូទៅត្រូវចាប់យកអត្ថប្រយោជន៍បច្ចេកវិទ្យាថ្ងៃនេះ ដើម្បីធ្វើឲ្យផ្លូវថ្នល់កាន់តែមានសុវត្ថិភាពសម្រាប់គ្រប់គ្នា។ យើងទាំងអស់គ្នាត្រូវទទួលខុសត្រូវរួមគ្នាក្នុងការធានាថា កម្ពុជាមិនឲ្យមានគ្រោះថ្នាក់ ហើយក្រុមហ៊ុន Bosch គាំទ្រយ៉ាងពេញទំហឹងដល់ចក្ខុវិស័យនេះ។
ដូចអ្នកបានលើកឡើង នៅអាស៊ាន ម៉ាឡេស៊ី ជាប្រទេសដំបូងគេ ក្នុងការ បង្កើតច្បាប់ឧបករណ៍បច្ចេកវិទ្យាសុវត្ថិភាពដូចជា ESP នៅក្នុងរថយន្តថ្មីទាំងអស់។ តើអ្នកគិតថា រដ្ឋាភិបាលកម្ពុជាគួរតែបង្កើតច្បាប់នេះដែរឬទេ?
យើងជឿជាក់ថា រថយន្តកាន់តែមានសុវត្ថិភាព ស្មើនឹងផ្លូវថ្នល់កាន់តែមានសុវត្ថិភាព រថយន្តដែលបានបំពាក់ដោយបច្ចេកវិទ្យាសុវត្ថិភាព ដូចជា ESP នឹងជួយធ្វើឲ្យផ្លូវថ្នល់កាន់តែមានសុវត្ថិភាព។
យើងបន្តត្រួតពិនិត្យស្ថានការណ៍ហើយសង្ឃឹមថា ក្រុមហ៊ុនកាន់តែច្រើន នឹងចូលរួមនៅក្នុងការអប់រំ និងគាំទ្រដល់ការខិតខំប្រឹងប្រែង។យើងទន្ទឹងរង់ចាំការបង្កើតច្បាប់បន្ថែមទៀត ស្ដីពីសុវត្ថិភាពផ្លូវថ្នល់នៅក្នុងប្រទេស កម្ពុជា ហើយនឹងផ្ដល់ការគាំទ្រនៅក្នុងមធ្យោបាយណាមួយ ដែលយើងអាចជួយធ្វើឲ្យការបើកបរ និងការជិះរថយន្តប្រកបដោយសុវត្ថិភាពនៅក្នុងប្រទេស កម្ពុជា៕ LA