ភ្នំពេញៈ ក្រុមហ៊ុនវិនិយោគឯកជន Belt Road Capital Management (BRCM) បានទិញភាគហ៊ុនចំនួន ៤០ ភាគរយក្នុងក្រុមហ៊ុន Sabay Digital Corporation ដើម្បីអភិវឌ្ឍន៍កម្មវិធីហ្គេមកម្សាន្តតាមទូរស័ព្ទដៃនៅកម្ពុជាឲ្យកាន់តែទំនើប និងមានភាពទាក់ទាញ។ នេះបើតាមសេចក្តីប្រកាសព័ត៌មានកាលពីថ្ងៃម្សិលមិញ។
លោក Alex Odom នាយកផ្នែកវិនិយោគក្រុមហ៊ុន BRCM បាននិយាយថា ជាមួយនឹងភាពលេចធ្លោរបស់ Sabay ក្នុងឧស្សាហកម្មហ្គេមកម្សាន្តនៅកម្ពុជា និងមានក្រុមអ្នកជំនាញក្នុងការផ្សព្វផ្សាយ និងបែងចែកមាតិកានោះ យើងមានជំនឿថាក្រុមហ៊ុននេះនឹងរីកចម្រើនកាន់តែខ្លាំងបន្ថែមទៀតក្នុងឧស្សាហកម្មហ្គេមកម្សាន្តនៅពេលអនាគត។
លោក ជី សិលា អគ្គនាយកក្រុមហ៊ុន Sabay បាននិយាយថា កិច្ចព្រមព្រៀងជាយុទ្ធសាស្ត្រនេះនឹងជួយជំរុញឲ្យការអភិវឌ្ឍកម្មវិធីហ្គេមនៅតាមអនឡាញរបស់ Sabay កាន់តែល្អប្រសើរបន្ថែមទៀត។ លោកថ្លែងថា៖ «យើងរីករាយក្នុងការសហការជាយុទ្ធសាស្ត្រជាមួយ BRCM ដើម្បីពង្រឹងដំណើរការរបស់យើងនាពេលនេះ និងពង្រីកខ្លួនចូលទៅទីផ្សារផ្សេងទៀតដែលយើងមិនទាន់បានទៅដល់»។
ទោះបីជាយ៉ាងណាតម្លៃទិញភាគហ៊ុនចំនួន ៤០ ភាគរយនេះមិនត្រូវបានលោកប្រាប់ឲ្យដឹងនោះទេ ដោយការទិញនេះមានរួមបញ្ចូលទាំងបច្ចេកទេសផង។
បង្កើតឡើងក្នុងឆ្នាំ ២០០៧ Sabay បានរីកចម្រើនយ៉ាងឆាប់រហ័សរហូតក្លាយជាក្រុមហ៊ុនបច្ចេកវិទ្យាហ្គេមកម្សាន្តនាំមុខគេមួយនៅកម្ពុជាតាមរយៈការត្រួសត្រាយផ្លូវសម្រាប់ការលេងហ្គេមកម្សាន្តតាមប្រព័ន្ធអនឡាញ ដែលមានដូចជា Sabay Osja និង SVOD Serivce SOYO ជាដើម៕