.jpg)
ភ្នំពេញៈ Century 21 Cambodia ដែលជាក្រុមហ៊ុនអចលនទ្រព្យមានមូលដ្ឋាននៅអាមេរិកបានចុះអនុស្សរណៈនៃការយោគយល់គ្នា (MoU) ជាមួយធនាគារ BRED Bank Cambodia ដោយតែងតាំងធនាគារនេះជាដៃគូហិរញ្ញវត្ថុរបស់ខ្លួនសម្រាប់អចលនទ្រព្យ ដែលផ្សព្វផ្សាយផ្ដាច់មុខដោយបណ្ដាញក្រុមហ៊ុន Century 21 Cambodia Network។
អនុស្សរណៈនៃការយោគយល់នេះត្រូវបានចុះហត្ថលេខា ដោយលោក Seraj Sutton អគ្គនាយកក្រុមហ៊ុន Century 21 Cambodia និងលោក Guillaume Perdon អគ្គនាយកធនាគារ BRED Bank Cambodia។
លោក Seraj Sutton បានឱ្យដឹងថា លោកមានក្ដីរីករាយក្នុងការធ្វើជាដៃគូជាមួយធនាគារ BRED Bank Cambodia ដែលជាផ្នែកមួយនៃក្រុមហ៊ុនហិរញ្ញវត្ថុពិភពលោក។ BRED Banque Populaire បានកា្លយជាធនាគារអឺរ៉ុបលើកដំបូងដែលបានប្រតិបត្តិការនៅក្នុងប្រទេសកម្ពុជាកាលពីឆ្នាំ ២០១៧។
លោកថ្លែងថា៖ «ខ្ញុំជឿជាក់ថា ការសហការគ្នានេះនឹងដើរតួនាទីដ៏សំខាន់ក្នុងការបង្កើតឱកាសកាន់តែប្រសើរសម្រាប់អតិថិជន និងក្រុមវិនិយោគិន ខណៈដែលអាចឱ្យប្រជាជនកម្ពុជាទិញអចលនទ្រព្យក្នុងក្ដីសុបិនរបស់ពួកគេផងដែរ»។
លោកបន្ថែមថា៖ «អតិថិជនរបស់យើងនឹងមិនគ្រាន់តែបានទទួលការកាន់កាប់លំនៅឋានថ្មីរបស់ពួកគេប៉ុណ្ណោះទេ ប៉ុន្តែពួកគេថែមទាំងនឹងទទួលបានអត្ថប្រយោជន៍ពីហិរញ្ញប្បទានដែលប្រកួតប្រជែង និងបត់បែនដែលបានផ្ដល់ដោយធនាគារ BRED Bank Cambodia ទៀតផង»។
Century 21 Cambodia គឺជាភ្នាក់ងារលក់ផ្ដាច់មុខនូវគម្រោងធំៗជាច្រើននៅកម្ពុជា ដូចជា គម្រោង Forest Harmony គម្រោង Golf Harmony គម្រោង Residence Harmony គម្រោង Lagoon Harmony និងគម្រោង Living Harmony ជាដើម។
កាលខែតុលា ឆ្នាំមុន Forest Harmony Co Ltd ដែលជាក្រុមហ៊ុនអភិវឌ្ឍន៍គម្រោង Forest Harmony ក៏បានប្រកាសការដាក់ឱ្យដំណើរការសាកល្បងនូវគម្រោង «Golf Harmony» ដែលជាដំណាក់កាលទី ២ នៃគម្រោង Forest Harmony ប្រកបដោយជោគជ័យរបស់ខ្លួន។
លោក Guillaume Perdon បានយល់ស្របនឹងគំនិតរបស់លោក Sutton ដែលបានលើកឡើងថា៖ «យើងរីករាយក្នុងការសម្រេចបានអនុស្សរណៈជាមួយក្រុមហ៊ុន Century 21 Cambodia។ ធនាគារ BRED Bank Cambodia បានធ្វើការប្ដេជ្ញាចិត្តយ៉ាងរឹងមាំថា នឹងគាំទ្រទីផ្សារអចលនទ្រព្យនៅកម្ពុជា។ មិនគ្រាន់តែផ្ដល់ឱ្យយើងនូវស្ដង់ដាអន្តរជាតិខ្ពស់បំផុតប៉ុណ្ណោះទេ ប៉ុន្តែយើងមានទំនុកចិត្តថា កម្ចីទិញផ្ទះរបស់យើងនឹងតំណាងឱ្យតម្លៃល្អបំផុតនៅក្នុងប្រទេសកម្ពុជា។ យើងទន្ទឹងរង់ចាំការធ្វើជាដៃគូរយៈពេលយូរ និងគួរឱ្យរីករាយនេះជាមួយក្រុមហ៊ុន Century 21 Cambodia»៕ LA
