The Phnom Penh Post Search

Search form




Logo of Phnom Penh Post newspaper Phnom Penh Post - Brico នឹង​ធ្វើ​កិច្ច​សន្យា​ទិញ​ស្រូវ​ជាមួយ​កសិករ

Brico នឹង​ធ្វើ​កិច្ច​សន្យា​ទិញ​ស្រូវ​ជាមួយ​កសិករ

Brico នឹង​ធ្វើ​កិច្ច​សន្យា​ទិញ​ស្រូវ​ជាមួយ​កសិករ

131213_11
ការចុះទិញស្រូវដល់វាលស្រែរបស់ឈ្មួញ នៅខេត្តបាត់ដំបង នាពេលកន្លងមក ហេង ជីវ័ន

បាត់ដំបងៈ រោង​ម៉ាស៊ីន​​កិន​ស្រូវ ​Battambang Rice Investment Company Ltd ឬ Brico នៅ​ស្រុក​ថ្ម​គោល​ត្រូវ​បាន​ដាក់​ឲ្យ​ដំណើរ​ជា​ផ្លូវ​ការ ​ជា​​មួយ​នឹង​គម្រោង​​​កិច្ច​សន្យា​ទិញ​ស្រូវ​ពី​​កសិករ។ គម្រោង​កិច្ច​សន្យា​នេះ​នឹង​ដំ​ណើរ​​ការ​នៅ​ពាក់​កណ្តាល​ឆ្នាំ​២០១៤។

លោក ​យក់ ​ចំរើន​រិទ្ធិ​ ជា​ប្រធាន​ និង​ជា​​ម្ចាស់​ចំណែក​ភាគ​ហ៊ុន​នៅ​រោង​ចក្រ​កិន​​ស្រូវ​ Brico បាន​ឲ្យ​ដឹង​ថា​ ខាង​ក្រុមហ៊ុន​កំពុង​រៀប​ចំ​ការ​ងារ​ដើម្បី​អនុវត្ត​គម្រោង​នេះ។

លោក​មាន​ប្រសាសន៍​ថា៖ «ការ​ធ្វើ​កិច្ច​សន្យា​ជា​មួយ​កសិករ​គឺ​ដើម្បី​ធានា​បាន​ការ​ផ្គត់ផ្គង់​ អង្ករ​សម្រាប់​ការ​នាំចេញ ​ហើយ​ក៏​ដើម្បី​ធានា​បាន​តម្លៃ​សមរម្យ​សម្រាប់​កសិករ​»។

គម្រោង​កិច្ច​ សន្យា​ទិញ​ស្រូវ​ពី​កសិករ​នេះ​នឹង​ធានា​បាន​គុណភាព​និង​បរិមាណ​ស្រូវ​ដែល ​ផលិតបាន។ លោក​បាន​បន្ត​ថា​៖ «យើង​មាន​គម្រោង​សកម្ម​ភាព​ហើយ។ ​យើង​ក៏​បាន​ទាក់​ទង​ជា​មួយ​សហគមន៍​កសិករ​រួច​ហើយ​ដែរ​។យើង​កំពុង​​កសាង​ ទំនាក់​ទំនង​និង​ទំនុកចិត្ត​ជា​​មួយ​កសិករ​ដើម្បី​ឈាន​ដល់​ការ​ចុះ​កិច្ច​ សន្យា»។

លោក​ យ៉ង ​សាំង​កុមារ ប្រធាន​អង្គ-​ការ ​សេដាក មាន​ប្រសាសន៍​ថា​ បញ្ហា​​ប្រឈម​ភាគ​ច្រើន​របស់​កសិករ​គឺ​តម្លៃ​ទីផ្សារ​ប្រែប្រួល​ខ្លាំង​ ដែល​ធ្វើ​ឲ្យ​កសិករ​​ប្រថុយ​ប្រថាន​ខ្លាំង​ ដោយ​សារ​កង្វះ​ព័ត៌មាន​អំពី​បរិមាណ​តម្រូវ​ការ ​និង​តម្លៃ​ទី​ផ្សារ​អង្ករ​នៅ​លើ​ពិភព​លោក​ដែល​ធ្វើ​ឲ្យ​​កសិករ​មិន​អាច​ កំណត់​តម្លៃ និង​បរិមាណ​ផលិត​តាម​តម្រូវ​ការ​ទីផ្សារ។

លោក​ ប្រាក់​ ណៃ ​កសិករ​ដែល​មាន​ដី​​ស្រែ​​១៥​ ហិកតា​ក្នុង​ខេត្ត​បាត់ដំបង ​ដែល​​ធ្លាប់​តែ​លក់​ស្រូវ​ទៅ​ឲ្យ​ឈ្មួញ​កណ្តាល​​នោះ​ប្រាប់​ថា​ លោក​បាន​ខាត​​បង់​ប្រាក់​ជា​ច្រើន​ពាន់​ដុល្លារ​​ពេល​ដែល​​តម្លៃ​ស្រូវ​ឡើង​ ចុះ​លឿន​ពេក។

លោកបន្ត​ថា​៖ «​ឈ្មួញ​គេ​ពិភាក្សា​គ្នា​ហើយ ដាក់​តម្លៃ​ ហើយ​បើ​កសិករ​មិន​លក់​ ទៅ​លក់​ឲ្យ​អ្នក​ណា​? ស្រូវ​ទុក​មិន​បាន​ ការ​​ប្រាក់​ចេះ​តែ​ឡើង​។ ចាំ​ចាច់​កសិករ​ត្រូវ​ធ្វើ​កុង​ត្រា។ ខ្ញុំ​សង្ឃឹម​ថា ឆ្នាំ​ក្រោយ​នេះ​ ប្រសិន​បើ​ធ្វើកុង​ត្រា​បាន នឹង​មិន​ពិបាក​ពេក​ទេ»។

កសិករ​ ប្រាក់​ ណៃ​ សង្ឃឹម​ថា ​កិច្ចសន្យា​ផ្គត់​ផ្គង់​ទិញ​ស្រូវ​ទៅ​ឲ្យ​រោង​ម៉ាស៊ីន​​កិន​ស្រូវ​ នឹង​ជួយ​កាត់​បន្ថយ​ហានិភ័យ​របស់​កសិករ​ដែល​ខ្ចី​បុល​សម្រាប់​ធ្វើ កសិកម្ម។

លោក ​នឹម ​គួន ​​កសិករ​ម្នាក់​នៅ ​ឃុំ​ជ្រៃ​ នៃ​ស្រុក​ថ្ម​គោល​ ធ្លាប់​រំពឹង​ថា​ ទិន្នផល​ស្រូវរ​បស់​លោក​អាច​លក់​បាន​តម្លៃ​ខ្ពស់ ​បន្ទាប់​ពី​ទឹក​ជំនន់​ ប៉ុន្តែ​បាន​ខក​ចិត្ត​​ព្រោះ​ឈ្មួញ​កណ្តាល​បាន​បន្ទាប​តម្លៃ។ លោក​កំពុង​ចាប់​អារម្មណ៍​ពី​ការ​ចុះ​កិច្ចសន្យា​ជា​មួយ​រោង​ម៉ាស៊ីន​កិន​ ស្រូវ​នេះ ​តែ​ថា​ លោក​នៅ​ស្ទាក់​ស្ទើរ​ព្រោះ​មិន​ប្រាកដ​ថា លោក​អាច​ទទួល​បាន​តម្លៃ​ស្រូវ​សមស្រប​តាម​ទី​ផ្សារ។

រដ្ឋាភិបាល​បាន​ចេញ ​អនុក្រឹត្យ​ឲ្យ​អនុវត្ត​កិច្ច​សន្យា​ផលិត​ផល​កសិកម្ម​ កាល​ពី​​ឆ្នាំ​២០១១។​ លោក ​យ៉ង​ សាំង កុមារ បាន​ឲ្យ​ដឹង​ថា កម្ពុជា​មាន​បទ​ពិសោធតិចតួច​ក្នុង​ការ​អនុវត្ត​កិច្ច​សន្យា​ផលិត​ផល​កសិ​ កម្ម ប៉ុន្តែ​លោក​បញ្ជាក់​ថា វា​ជា​រឿង​សំខាន់​ ហើយ​សង្ឃឹម​​ថា​ទៅ​ថ្ងៃ​មុខ​ ការ​អនុវត្ត​កិច្ច​សន្យា​ផលិត​ផល​នៅ​កម្ពុជា​នឹង​កើ​ត​មាន​កាន់​តែ​ច្រើន ថែម​ទៀត​ក្នុង​វិស័យ​កសិកម្ម។

ពាក់​ព័ន្ធ​នឹង​សំណួរ​អំពី​ភាព​ជោគជ័យ​នៃ​អនុវត្ត​កិច្ច​សន្យា​ផលិត​ផល​កសិកម្ម លោក យក់ ចំរើន​រិទ្ធិ​ និយាយថា៖ «មាន​ក្រុមហ៊ុន​ច្រើន​ដែល​អនុ​វត្ត។ ខ្លះ​ជោគ​ជ័យ​ ខ្លះ​បរាជ័យ​ ដោយ​សារ​កង្វះ​ភាព​ជឿ​ជាក់ តែ​ខ្ញុំ​ជឿ​ថា​ គម្រោង​ដែល​ដាក់​ចេញ​លើក​នេះ​នឹង​ជោគជ័យ។ ផែន​ការ​នេះ​នៅ​មិន​ទាន់​មាន​អ្នក​ធ្វើ​នៅ​ឡើយ​ទេ។ ខ្ញុំ​មាន​សង្ឃឹម​ច្រើន»។

រោង​ម៉ាស៊ីន​កិន​ស្រូវ​ Brico ដែល​ជា​ការ​បណ្តាក់​ទុន​រួម​គ្នា​រវាង​ក្រុមហ៊ុន ​Importer-exporter Lorana រួម​ជា​មួយ​នឹង​វិនិយោគិន​សិង្ហបុរី និង​ស្ថាប័ន Emerging Market Investment Fund (EMI)​ ដែល​មាន​ទំហំ​ទឹក​​ប្រាក់​ប្រមាណ ៣,៥ ​លន​ដុល្លារ​ត្រូវ​បាន​គេ​រំពឹង​ថា នឹង​អាច​ផលិត​និង​នាំ​ចេញ​អង្ករ​ក្រអូប​កម្ពុជា​​រហូតដល់ ៣០ ០០០ ​តោន​ ក្នុង​មួយ​ឆ្នាំ​ៗ។

ស្ថិត​នៅ​លើ​ផ្ទៃ​ដី​ ៦,៥​ ហិកតា​នៅ​ស្រុក​​ថ្ម​គោល​ ​រោង​ម៉ាស៊ីន​កិន​ស្រូវ​ថ្មី​នេះ​​ត្រូវ​បាន​បំពាក់​ដោយ​ម៉ាស៊ីន​កិន​ស្រូវ​ ម៉ាស៊ីន​សម្ងួត​ និង​ម៉ាស៊ីន​កែច្នៃ​ ដែល​​មាន​សមត្ថភាព​ផលិត​អង្ករ​បាន​​​១០​​តោន​ក្នុង​មួយ​ម៉ោង៕

អត្ថបទគួរចាប់អារម្មណ៍