.jpg)
បច្ចុប្បន្ន Cambodia Airways មានជើងហោះហើរជាច្រើនទៅកាន់ទីក្រុងសំខាន់ៗប្រទេសចិន។ ហេង ជីវ័ន
ភ្នំពេញ: ក្រុមហ៊ុន Cambodia Airways បានប្តេជ្ញាពង្រីកអាជីវកម្ម និងពង្រីកការតភ្ជាប់កម្ពុជាទៅកាន់ទិសដៅនានាជុំវិញពិភពលោកបន្ថែមទៀតនៅពេលដែលការរីករាលដាលនៃជំងឺកូវីដ១៩ ត្រូវបានបញ្ចប់។
លោក Chen Bo ប្រធានក្រុមហ៊ុនអាកាសចរណ៍ Cambodia Airways បានថ្លែងបែបនេះនៅក្នុងជំនួបជាមួយលោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិលនៅឯការិយាល័យកាលពីថ្ងៃអង្គារ។
លោកថ្លែងថា បច្ចុប្បន្ននេះមានក្រុមហ៊ុនអាកាសចរណ៍ជាច្រើនបានផ្អាកពីការដឹកអ្នកដំណើរដោយបង្វែរទៅបម្រើសេវាកម្មដឹកទំនិញវិញក្នុងនោះក៏មានក្រុមហ៊ុនលោកផងដែរ។
លោកនិយាយថា៖ «យើងសង្ឃឹមថា វីរុសកូរ៉ូណានឹងត្រូវបញ្ចប់ក្នុងពេលឆាប់ៗនេះ។ ក្រុមហ៊ុនអាកាសចរណ៍ Cambodia Airways នឹងពង្រីកអាជីវកម្ម និងដាក់ការវិនិយោគបន្ថែមទៀតដើម្បីជាការចូលរួមចំណែកក្នុងការអភិវឌ្ឍប្រទេសកម្ពុជា»។
លោក ម៉ៅ ហាវណ្ណាល់ បានឲ្យដឹងថាប្រទេសកម្ពុជា និងចិនមានទំនាក់ទំនងជាមួយគ្នាល្អណាស់ ព្រោះមេដឹកនាំប្រទេសទាំង ២ មានភាពជិតស្និទ្ធ ដូច្នេះការវិនិយោគរបស់ក្រុមហ៊ុន Cambodia Airways គឺបានឆ្លុះបញ្ចាំងពីការប្តេជ្ញាចិត្តរបស់ថ្នាក់ដឹកនាំប្រទេសចិនក្នុងការជំរុញការវិនិយោគរបស់ចិនមកកម្ពុជា។
លោកថ្លែងថា៖ «នៅក្នុងកិច្ចប្រជុំថ្មីៗនេះរបស់សម្តេច ហ៊ុន សែន ជាមួយប្រធានាធិបតី Xi Jinping និងលោកនាយករដ្ឋមន្ត្រី Li Keqiang នៅប្រទេសចិន ប្រមុខដឹកនាំចិន នៅតែគាំទ្រដល់ការអភិវឌ្ឍរបស់កម្ពុជាហើយនឹងបន្តជំរុញវិនិយោគិនចិនបន្ថែមទៀតមកប្រទេសកម្ពុជា ទោះបីជា EBA ត្រូវបានដកចេញក៏ដោយ»។
យោងតាមសារព័ត៌មានចិន China Daily បានរាយការណ៍កាលពីខែមីនាថា ឧស្សាហកម្មអាកាសចរណ៍កំពុងប្រឈមមុខនឹងភាពខាតបង់បន្ទាប់ពីការរីករាលដាលនៃវីរុសកូរ៉ូណាដោយអ្នកជំនាញបានប៉ាន់ស្មានថា ការខាតបង់ប្រាក់ចំណូលមានប្រមាណជាង ១០០ ពាន់លានដុល្លារ។
លោក Alexandrede Juniac អគ្គនាយកប្រតិបត្តិនៃសមាគមដឹកជញ្ជូនតាមផ្លូវអាកាសអន្តរជាតិបាននិយាយថា៖ «ក្នុងរយៈពេលតែជាង ២ ខែសោះឧស្សាហកម្មអាកាសចរណ៍នៅលើពិភពលោកបានផ្លាស់ប្តូរយ៉ាងខ្លាំង»។
គាត់បានពិពណ៌នាអំពីការផ្លាស់ប្តូរយ៉ាងឆាប់រហ័សនៅក្នុងឧស្សាហកម្មដែលបណ្តាលមកពីកូវីដ១៩ នេះ។
ក្នុងការវិភាគថ្មីៗនេះសមាគមអាកាសចរណ៍អន្តរជាតិកំពុងប៉ាន់ប្រមាណថា អាជីវកម្មដឹកអ្នកដំណើរតាមផ្លូវអាកាសនឹងខាតបង់ពី ៦៣ ពាន់លានដុល្លារទៅ ១១៣ ពាន់លានដុល្លារអាស្រ័យលើការរីករាលដាលជំងឺកូវីដ១៩។
យោងតាមរបាយការណ៍ពីក្រសួងទេសចរណ៍កម្ពុជាការមកដល់របស់ភ្ញៀវទេសចរតាមរយៈផ្លូវអាកាសបានធ្លាក់ចុះប្រហែល ៣៦ ភាគរយក្នុងរយៈពេល ២ ខែដំបូង បើប្រៀបធៀបទៅនឹងឆ្នាំមុន។
ក្រុមហ៊ុនអាកាសចរណ៍ Cambodia Airways ដែលគ្រប់គ្រងទាំងស្រុងដោយក្រុមហ៊ុន Prince International Airlines បានចុះបញ្ជីនៅទីក្រុងភ្នំពេញជាមួយនឹងការវិនិយោគដំបូងចំនួន ២០០ លានដុល្លារ និងទទួលបានការយល់ព្រមដំបូងដើម្បីដំណើរការនៅខែសីហា ឆ្នាំ ២០១៧។ បច្ចុប្បន្នក្រុមហ៊ុនបានពង្រីកគោលដៅទៅកាន់ទីក្រុង Chengdu។ Chengdu គឺជាទីក្រុងទី ៥ នៅក្នុងប្រទេសចិនដែលក្រុមហ៊ុនបានភ្ជាប់ បន្ទាប់ពីទីក្រុងម៉ាកាវ Fuzhou Wenzhou និងទីក្រុងសិនជិន៕
