ភ្នំពេញៈ ជាកិច្ចខិតខំប្រឹងប្រែងដើម្បីស្តារសេដ្ឋកិច្ចដែលកំពុងរងការវាយប្រហារពីវិបត្តិសុខភាព ក្រុមហ៊ុន AMB Tarsus Events Group នឹងរៀបចំព្រឹត្តិការណ៍ CAMBUILD 2020 ដែលជាពិព័រណ៍ឧស្សាហកម្មសំណង់អន្តរជាតិធំបំផុតនៅកម្ពុជា ដោយនឹងត្រូវប្រារព្ធធ្វើឡើងចាប់ពីថ្ងៃទី ២២ ដល់ ២៤ ខែតុលា ឆ្នាំ ២០២០ នៅសាលសន្និសីទកោះពេជ្រ។
ព្រឹត្តិការណ៍នេះត្រូវបានរំពឹងថានឹងជួយជំរុញល្បឿននៃការអភិវឌ្ឍវិស័យស្នូលមួយនេះឲ្យមានសម្ទុះកាន់តែខ្លាំង។ ក្រុមហ៊ុន AMB Tarsus Events Group នឹងផ្តល់កញ្ចប់ស្តារសេដ្ឋកិច្ចដើម្បីគាំទ្រដល់ក្រុមហ៊ុនអ្នកផ្គត់ផ្គង់នៅក្នុងវិស័យសំណង់ និងសំណង់អគារទាំងឡាយដែលចូលរួមដើម្បីជាការស្តារឡើងវិញពីផលប៉ះពាល់នៃរោគរាតត្បាតជំងឺកូវីដ១៩។
លោកស្រី ខា សុម៉ាលី ប្រធានគម្រោង CAMBUILD 2020 បាននិយាយថា គំនិតផ្តួចផ្តើមក្នុងការណែនាំកញ្ចប់ស្តារសេដ្ឋកិច្ច (ERP) សម្រាប់ក្រុមហ៊ុនកម្ពុជានឹងគាំទ្រដល់កិច្ចខិតខំប្រឹងប្រែងរបស់រដ្ឋាភិបាលក្នុងការបង្កើនសកម្មភាពសេដ្ឋកិច្ច និងបង្កើតការងារ។
លោកស្រីបានថ្លែងថា៖ «ខ្ញុំសង្ឃឹមថា ក្រុមហ៊ុននានានឹងទាញយកអត្ថប្រយោជន៍ពី ERP នេះដើម្បីបង្កើនការលក់នៅពេលសេដ្ឋកិច្ចមានភាពល្អប្រសើរឡើងវិញ។ CAMBUILD 2020 ក៏នឹងគាំទ្រដល់ឧស្សាហកម្មបដិសណ្ឋារកិច្ចផងដែរ ដោយនឹងមានអ្នកចូលរួមមកពីក្រៅប្រទេសជាង ១ ០០០ នាក់ដូចជាប្រទេសចិន ម៉ាឡេស៊ី ថៃ និងវៀតណាម»។
ក្រសួងសេដ្ឋកិច្ច និងហិរញ្ញវត្ថុកាលពីថ្ងៃទី ១០ ខែកក្កដាបានដាក់លិខិតមួយជូនលោកនាយករដ្ឋមន្ត្រី ហ៊ុន សែន ដើម្បីធ្វើការកែសម្រួលនីតិវិធី និងតម្រូវការនានាចំពោះអ្នកដំណើរបរទេសដែលចូលមកប្រទេសកម្ពុជា។ ចំពោះជនបរទេសជាវិនិយោគិន ធុរជន បុគ្គលិកក្រុមហ៊ុន អ្នកជំនាញការ កម្មករជំនាញ និងក្រុមគ្រួសារត្រូវបានកំណត់ឲ្យទិញការធានារ៉ាប់រងសម្រាប់រយៈពេលយ៉ាងតិច ២០ ថ្ងៃដោយមានតម្លៃប្រមាណ ៩០ ដុល្លារ ហើយត្រូវដាក់ប្រាក់តម្កល់ ៣ ពាន់ដុល្លារដដែល។
ទុនវិនិយោគវិស័យសំណង់នៅកម្ពុជាក្នុងឆមាសទី ១ ឆ្នាំ ២០២០ មានតម្លៃជាង ៣,៨៤ ពាន់លានដុល្លារ កើនឡើង ១៣,២៦ ភាគរយធៀបនឹងឆមាសទី ១ ឆ្នាំ ២០១៩។ នេះបើយោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់។
របាយការណ៍ឲ្យដឹងទៀតថា ក្នុងឆមាសទី ១ ឆ្នាំនេះ ការស្នើសុំគម្រោងវិនិយោគលើវិស័យសំណង់មានចំនួន ២ ៥២២ គម្រោង កើន ៤៧៥ គម្រោងបើធៀបនឹងឆមាសទី ១ ឆ្នាំមុនមានចំនួន ២ ០៤៧ គម្រោង។
ដោយឡែកសំណង់ទូទាំងប្រទេសគិតចាប់ពីឆ្នាំ ២០០០ ដល់ខែមិថុនា ឆ្នាំ ២០២០ ក្រសួងបានចេញលិខិតអនុញ្ញាតសាងសង់ចំនួន ៥០ ៩៦៨ គម្រោងដែលមានទុនវិនិយោគសរុបប្រមាណ ៥៦,៩៦ ពាន់លានដុល្លារ។
ចំណែកគម្រោងអគារខ្ពស់ៗចាប់ពី ៥ ជាន់ឡើងទៅគិតចាប់ពីឆ្នាំ ២០០៥ ដល់ខែមិថុនា ឆ្នាំ ២០២០ មានចំនួន ១ ៩៤៥។
គិតចាប់តាំងពីឆ្នាំ ២០០០ ដល់ខែមិថុនា ឆ្នាំ ២០២០ ការចុះបញ្ជីក្រុមហ៊ុនប្រកបអាជីវកម្មសិក្សាគម្រោងប្លង់ និងសាងសង់មានចំនួន ២ ៨៣០ ក្រុមហ៊ុន ប៉ុន្តែពេលនេះក្រុមហ៊ុនដែលមានសុពលភាពមានត្រឹម ១ ២៤១។ នេះបើយោងតាមរបាយការណ៍ខាងលើ៕