ភ្នំពេញៈ ធនាគារកម្ពុជាសាធារណៈ (Campu) ដែលគ្រប់គ្រងដោយវិនិយោគិនម៉ាឡេស៊ីបានក្លាយជាធនាគារពាណិជ្ជដំបូងដែលបានប្រកាសកាលពីថ្ងៃចន្ទក្នុងការផ្ដល់ការផ្អាកការទូទាត់កម្ចីដល់អតិថិជនរបស់ខ្លួនតាមរយៈ «ឥណទានឡើងវិញ» និងការកំណត់ពេលវេលាឡើងវិញនូវកម្ចីទាំងអស់ដល់អតិថិជនជាបុគ្គល និងអាជីវកម្មដែលទទួលរងផលប៉ះពាល់ពីការរីករាលដាលជំងឺកូវីដ ១៩។
សេចក្ដីប្រកាសនេះបានធ្វើឡើងរយៈពេលជាង ១ សប្ដាហ៍ប៉ុណ្ណោះបន្ទាប់ពីធនាគារជាតិនៃកម្ពុជា (NBC) បានចេញសារាចរណែនាំដល់គ្រឹះស្ថានហិរញ្ញវត្ថុទាំងអស់ត្រូវរៀបចំឥណទានឡើងវិញ និងកំណត់ពេលវេលាឡើងវិញនៃកម្ចីសម្រាប់អតិថិជនដែលងាយទទួលរងគ្រោះ។
ធនាគារជាតិនៃកម្ពុជាកាលពីថ្ងៃទី ២៧ ខែមីនា បានចេញសារាចរណែនាំមួយដល់ធនាគារ និងគ្រឹះស្ថានហិរញ្ញវត្ថុទាំងអស់ត្រូវរៀបចំឥណទានឡើងវិញសម្រាប់កម្ចីក្នុងវិស័យអាទិភាព ៤ ជាវិធានការមួយដែលលើកឡើងដោយវិស័យឯកជន។
សារាចរណែនាំនេះមានគោលបំណងក្នុងការរក្សាស្ថិរភាពហិរញ្ញវត្ថុ គាំទ្រសកម្មភាពសេដ្ឋកិច្ច និងបន្ធូរបន្ថយបន្ទុករបស់អ្នកជំពាក់បំណុល ដែលប្រឈមនឹងការធ្លាក់ចុះប្រាក់ចំណូលក្នុងអំឡុងពេលការរីករាលដាលកូវីដ ១៩។
វិស័យអាទិភាពទាំង ៤ ដែលបានលើកឡើងដោយ NBC រួមមានវិស័យទេសចរណ៍ វិស័យកាត់ដេរ វិស័យសំណង់ វិស័យដឹកជញ្ជូន និងឡូជីស្ទិក។
ធនាគារកម្ពុជាសាធារណៈបានឲ្យដឹងថា ក្នុងចំណោមសម្បទានដែលបានផ្ដល់ គឺការផ្ដល់ការផ្អាកការទូទាត់កម្ចី សេវាអត្រាការប្រាក់កម្ចី និងការពន្យារពេលរយៈពេលកម្ចី។
គំនិតផ្តួចផ្ដើមថ្មីៗដែលបានធ្វើឡើងដោយ NBC ដើម្បីគាំទ្រឧស្សាហកម្មធនាគារអាចនិយាយថា ទាន់ពេលវេលា និងល្អប្រសើរ ដោយសារតែវានឹងប្រែក្លាយទៅជាជំនួយដ៏ចាំបាច់បំផុតដល់គ្រប់វិស័យទាំងអស់នៃសេដ្ឋកិច្ចកម្ពុជា ពិសេសសហគ្រាសធុនតូច និងមធ្យម និងបុគ្គលដែលត្រូវរងផលប៉ះពាល់ផ្នែកហិរញ្ញវត្ថុដោយសារតែការរីករាលដាលកូវីដ ១៩។
លោក Datuk Phan Ying Tong ប្រធានប្រតិបត្តិការប្រចាំតំបន់ឥណ្ឌូចិននៃធនាគារកម្ពុជាសាធារណៈបានឲ្យដឹងថា ដោយសារតែការរីករាលដាលកូវីដ១៩កើនឡើងកាន់តែខ្លាំងលើពិភពលោក ធនាគារមានការបារម្ភយ៉ាងខ្លាំងអំពីផលប៉ះពាល់របស់វាចំពោះប្រទេសជាតិ ហើយសង្ឃឹមថាជំនួយនេះនឹងផ្ដល់ការបន្ធូរបន្ថយដល់អតិថិជនរបស់ខ្លួន។
លោកថ្លែងថា៖ «ដោយសារការរីករាលដាលកាន់តែឡើងធនាគារកម្ពុជាសាធារណៈនឹងបន្តធ្វើចំណាត់ការសកម្មជាមុនទាក់ទងនឹងការផ្ដល់ការផ្អាកការទូទាត់កម្ចី ដើម្បីជួយអតិថិជនទាំងអស់របស់ខ្លួននៅក្នុងស្ថានការណ៍លំហូរសាច់ប្រាក់ និងកាត់បន្ថយការពិបាកផ្នែកហិរញ្ញវត្ថុរបស់ពួកគេនៅក្នុងគ្រាដ៏ពិបាកនេះ និងពេលវេលាប្រឈមដ៏ខ្លាំង»។
យោងតាមរបាយការណ៍ឆ្នាំ ២០១៩ បានពី NBC កម្ពុជាមានធនាគារពាណិជ្ជ ៤៦ ធនាគារឯកទេស ១៥ និងគ្រឹះស្ថានមីក្រូហិរញ្ញវត្ថុ ៨២ ប្រតិបត្តិករឥណទានជនបទ ២៤៨ ក្រុមហ៊ុនភតិសន្យា ១៥ និងក្រុមហ៊ុនផ្ដល់សេវាទូទាត់ ២០។
ផលបត្រកម្ចីរបស់ធនាគារបានកើនឡើងដល់ ២៤,៥ ពាន់លានដុល្លារកាលពីឆ្នាំមុន ខណៈដែលប្រាក់បញ្ញើមានចំនួន ២៥,៥ ពាន់លានដុល្លារ។ ក្នុងចំណោម MFI កម្ចីបានកើនឡើងដល់ ៧,២ ពាន់លានដុល្លារ និងប្រាក់បញ្ញើ ៣,៩ ពាន់លានដុល្លារ៕LA