.jpg)
បុរសម្នាក់កំពុងជ្រើសរើសស្រាបៀរដែលដាក់លក់នៅក្នុងស្តារម៉ាតមួយក្នុងរាជធានីភ្នំពេញនាពេលកន្លងមក។ រូបថត ភ្នំពេញ ប៉ុស្តិ៍ ហេង ជីវ័ន
ភ្នំពេញៈ ក្រុមហ៊ុនផលិតស្រាបៀរលំដាប់ពិភពលោក Carlsberg Group បានទិញភាគហ៊ុន ២៥ ភាគរយបន្ថែមទៀតពីក្រុមហ៊ុនផលិតភេសជ្ជៈកម្ពុជា Cambrew ដែលធ្វើឲ្យក្រុមហ៊ុនមានមូលដ្ឋាននៅដាណឺម៉ាកមួយនេះក្លាយជាម្ចាស់ភាគហ៊ុនភាគច្រើន និងកាន់កាប់ភាគហ៊ុនសរុប ៧៥ ភាគរយ។ នេះបើយោងតាមសេចក្តីជូនដំណឹងរបស់ Carlsberg Group កាលពីថ្ងៃចន្ទ។
ក្រុមហ៊ុនផលិតស្រាបៀរ Cambrew បានផលិតភេសជ្ជៈមានជាតិអាល់កុល និងគ្មានជាតិអាល់កុលជាច្រើនរួមមាន ស្រាបៀរអង្គរ និងប៉ិបស៊ីជាដើម។
តាមរយៈកិច្ចព្រមព្រៀងនេះក្រុមហ៊ុន Carlsberg នឹងធ្វើការគ្រប់គ្រងដំណើរការអាជីវកម្មរបស់ Cambrew កាន់តែស៊ីជម្រៅជាងមុន ហើយរំពឹងថានឹងពង្រឹងទីផ្សារផលិតផល Cambrew ឲ្យរឹងមាំឡើងវិញ បន្ទាប់ពីត្រូវបានរងផលប៉ះពាល់ខ្លះៗពីសម្ពាធប្រកួតប្រជែងដែលកំពុងតានតឹងជាងមុន។
លោក អ៊ូ រតនៈ ប្រធានផ្នែកប្រឹក្សាយោបល់ក្រុមហ៊ុន Cambrew បានប្រាប់ភ្នំពេញប៉ុស្ដិ៍កាលពីថ្ងៃពុធថា ការប្រកួតប្រជែងនៅក្នុងទីផ្សារនេះកាលពី ២-៣ ឆ្នាំចុងក្រោយនេះកាន់តែខ្លាំងក្លា ដែលធ្វើឲ្យក្រុមហ៊ុនបាត់បង់ចំណែកទីផ្សារមួយចំនួន និងផលប៉ះពាល់អវិជ្ជមានលើឋានៈរបស់ខ្លួនជាក្រុមហ៊ុនផលិតស្រាបៀរលេខ ១ នៅកម្ពុជា។
លោកបន្ថែមថាបន្ទាប់ពីកិច្ចព្រមព្រៀងថ្មីជាមួយក្រុមហ៊ុន Carlsberg Group ក្រុមហ៊ុន Cambrew នឹងទទួលយកប្រព័ន្ធស្ដង់ដារថ្មីពីក្រុមហ៊ុន Carlsberg ហើយនឹងធ្វើឲ្យប្រសើរនូវរចនាសម្ព័ន្ធគ្រប់គ្រងមួយចំនួន និងយុទ្ធសាស្ដ្រក្នុងការបង្កើនសមត្ថភាពប្រកួតប្រជែងរបស់ខ្លួន។
ក្រាហ្វិកបង្ហាញពីចំណែកទីផ្សារក្រុមហ៊ុនស្រាបៀរនៅកម្ពុជា។ ភ្នំពេញ ប៉ុស្តិ៍
លោកថ្លែងថា៖ «អ្វីដែលជាក្តីស្រមៃរបស់យើង គឺយើងចង់បានតំណែងជាក្រុមហ៊ុនស្រាបៀដ៏ធំមួយរបស់កម្ពុជាត្រឡប់មកវិញ។ យើងធ្លាប់ទទួលបានកាលពីមុន តែត្រូវបានបាត់បង់ខ្លះៗដោយសារការប្រកួតប្រជែង»។
លោកបន្ថែមថា៖ «បន្ទាប់ពីមានការផ្លាស់ប្តូររចនាសម្ព័ន្ធថ្មី យើងរំពឹងថាអ្វីដែលយើងធ្លាប់បាត់បង់ពីមុននឹងទទួលបានមកវិញ ដោយសារយើងជឿជាក់លើផលិតផលដែលមានស្រាប់ និងរចនាសម្ព័ន្ធដឹកនាំថ្មីដែលមានភាពរឹងមាំ»។
លោក រតនៈ បានថ្លែងថាថ្នាក់គ្រប់គ្រងថ្មីនឹងពង្រឹងចំណែកទីផ្សារនៃផលិតផលទាំងអស់ដែលផលិតនៅក្នុងក្រុមហ៊ុន Cambrew ប៉ុន្តែនឹងដាក់ការផ្ដោតកាន់តែខ្លាំងលើស្រាបៀរអង្គរ។
លោក រតនៈ បញ្ជាក់ថា៖ «យើងមានមហិច្ឆតាក្នុងការធ្វើឲ្យស្រាបៀរអង្គរ ក្លាយជាស្រាបៀរនាំចេញច្រើនបំផុតពីប្រទេសកម្ពុជាទៅទីផ្សារនៅក្នុងតំបន់ និងអន្តរជាតិ»។
ក្រុមហ៊ុន Carlsberg Group បានធ្វើជាដៃគូជាមួយក្រុមហ៊ុន Cambrew រយៈពេល ២៦ ឆ្នាំមកហើយ។
ក្រុមហ៊ុនស្រាបៀររបស់ដាណឺម៉ាកមួយនេះមិនបានបង្ហាញចំនួនទឹកប្រាក់ ដែលខ្លួនបានវិនិយោគដើម្បីបង្កើនភាគហ៊ុននៅក្នុងក្រុមហ៊ុន Cambrew នោះទេ៕LA
