.jpg)
ហាងបញ្ចាំ Cash -U-Up មួយដែលមានទីតាំងនៅក្បែរ Naga 2។ រូបថត ហ៊ាន រង្សី
ភ្នំពេញ: ក្រុមហ៊ុនបញ្ចាំ Cash-U-Up កាលពីថ្ងៃពុធបានប្រកាសពីការលក់សិទ្ធិធ្វើអាជីវកម្មបន្តបានចំនួន ២ ខណៈបានពង្រីកសាខារហូតដល់ចំនួន ១៥ ទីតាំងនៅទូទាំងប្រទេស។ នេះបើតាមនាយកគ្រប់គ្រងទូទៅរបស់ក្រុមហ៊ុន។
ការប្រកាសនេះបានធ្វើឡើងក្នុងសិក្ខាសាលាស្តីពីការទិញសិទ្ធិធ្វើអាជីវកម្មរបស់ក្រុមហ៊ុន Cash-U-Up កាលពីថ្ងៃពុធម្សិលមិញ។
លោក គុជ សេដ្ឋា ប្រធានគ្រប់គ្រងទូទៅក្រុមហ៊ុន Cash-U-Up បានឲ្យដឹងក្នុងសិក្ខាសាលានេះថា ក្រុមហ៊ុនបានលក់សិទ្ធិធ្វើអាជីវកម្មបន្តបានចំនួន ២ ខណៈផែនការរបស់ក្រុមហ៊ុនសម្រាប់ឆ្នាំនេះនឹងផ្តល់សិទ្ធិធ្វើអាជីវកម្មបន្តឲ្យបានចំនួន ៥។ លោកបានថ្លែងថា៖ «បច្ចុប្បន្ន Cash-U-Up បានលក់សិទ្ធិធ្វើអាជីវកម្មបន្តចំនួន ២ រួចហើយគឺ ១ នៅទីក្រុងភ្នំពេញ និងមួយនៅក្រុងប៉ោយប៉ែតដែលកំពុងប្រតិបត្តិការ ហើយយើងចាប់ផ្តើមលក់បន្តទៀត»។
លោកបន្តថាបច្ចុប្បន្ន Cash-U-Up ទទួលបានអតិថិជនមកប្រើប្រាស់សេវាកម្មនេះបានកើនឡើងចន្លោះពី ១០ ទៅ ២០ ភាគរយនៃអតិថិជនប្រហែល ៥ ០០០ នាក់។ លោកបានបន្តទៀតថា៖ «ទិសដៅរបស់យើង ៣ ឆ្នាំទៀតយើងនឹងបង្កើតក្នុង ១ ខេត្តឲ្យមាន Cash-U-Up ១កន្លែងក្នុងគោលបំណងឲ្យសេវាកម្ម និងអាជីវកម្មយើងមានការរីកចម្រើនទៅមុខទៀត»។
ក្រុមហ៊ុនអាជីវកម្មទទួលបញ្ចាំ Cash-U-Up ជាបុត្រសម្ព័ន្ធរបស់ក្រុមហ៊ុន WorldBridge Group ដែលជាក្រុមហ៊ុនដ៏ធំកំពុងវិនិយោគលើអគារ The Bridge និង The PEAK បានដំណើរការអាជីវកម្មនេះរយៈពេលជិត ១ ទសវត្សរ៍ដោយបានពង្រីកសាខាបាន ១៥ កន្លែងនាពេលបច្ចុប្បន្ន។
លោក ប៉ុល ភារិន ដែលជាអ្នកទទួលសិទ្ធិធ្វើអាជីវកម្មបន្តនៃក្រុមហ៊ុន Cash-U-Up នៅទីក្រុងភ្នំពេញបានឲ្យដឹងថា សាខារបស់លោកបានធ្វើប្រតិបត្តិការទើបបានរយៈពេល ៥ ខែប៉ុណ្ណោះ ប៉ុន្តែបានផ្តល់ឥណទានដល់អតិថិជនបានជាង ៤៤ ម៉ឺនដុល្លារ។ លោកបន្តថា ចំណូលទទួលបានចន្លោះពី ៦០០០ ដុល្លារ ទៅ ១០ ០០០ ដុល្លារក្នុង ១ ខែ។
លោកថ្លែងថា៖ «បច្ចុប្បន្នសាខារបស់លោកបានខ្ចីឥណទានបន្ថែម ២៥ ម៉ឺនដុល្លារពីធនាគារ ដើម្បីធ្វើការពង្រីកអាជីវកម្មយើងឲ្យមានលំនឹងដោយមិនខ្វះខាតឥណទាន»។
លោក សៀ ឬទ្ធី ប្រធានក្រុមប្រឹក្សាភិបាលក្រុមហ៊ុន Cash-U-Up បានថ្លែងថា កាលពីឆ្នាំ ២០១៨ ក្រុមហ៊ុនបានទទួលប្រាក់ចំណេញជាង ១២០ លានដុល្លារ។ លោកថ្លែងថា៖ «កុងស៊ី Cash-U-Up របស់យើងមានកំណើនគួរឲ្យកត់សម្គាល់និយាយជារួមវិស័យបញ្ចាំទូទៅយើងឃើញថា អ្នកដាក់ពាក្យស្នើសុំបើករបរបញ្ចាំមានច្រើនពីក្រសួងសេដ្ឋកិច្ច និងហិរញ្ញវត្ថុ ដូច្នេះមានន័យថារបរបញ្ចាំវាមានកំណើន ទើបម្នាក់ៗមានការចាប់អារម្មណ៍ក្នុងការបង្កើតរបរបញ្ចាំនេះ»។
បើតាមទិន្នន័យពីក្រសួងសេដ្ឋកិច្ច និងហិរញ្ញវត្តុបានឲ្យដឹងថា មកដល់ពេលនេះក្រសួងបានផ្តល់អាជ្ញាប័ណ្ណឲ្យក្រុមហ៊ុនអាជីវកម្មទទួលបញ្ចាំសរុបចំនួន ៥០៩ ក្រុមហ៊ុន៕LA
