ភ្នំពេញៈ ក្រុមហ៊ុនធានារ៉ាប់រងទូទៅ ស៊ីប៊ី (CB) របស់កម្ពុជាបានប្រកាសកាលពីថ្ងៃទី ២៣ ខែសីហា ថា ខ្លួនបានឈ្នះពានរង្វាន់អាជីវកម្មថ្មីឆ្នើមនៅអាស៊ី ប្រចាំឆ្នាំ ២០២០ សម្រាប់នវានុវត្តន៍របស់ពួកគេដោយប្រើប្រាស់បច្ចេកវិទ្យាធានារ៉ាប់រង (Insur Tech) ដើម្បីផ្ដល់សេវាដល់អតិថិជន។
CB ត្រូវបានទទួលស្គាល់ជាប្រភេទអាជីវកម្មថ្មីផ្នែកធានារ៉ាប់រងប្រចាំឆ្នាំដែលធ្វើឲ្យក្រុមហ៊ុននេះក្លាយជាក្រុមហ៊ុនធានារ៉ាប់រងទូទៅមួយ ដែលមានការច្នៃប្រឌិតថ្មីបំផុតដោយប្រើ Insur Tech ដើម្បីផ្ដល់សេវាដល់អតិថិជនរបស់ខ្លួន។
ពានរង្វាន់នេះទទួលស្គាល់ពីការប្ដេជ្ញារបស់ស៊ីប៊ីក្នុងការជម្នះបញ្ហាប្រឈមក្នុងវិស័យធានារ៉ាប់រង ការផ្ដល់នូវគុណតម្លៃថ្មី និងការច្នៃប្រឌិតដល់អតិថិជនផងដែរ។
នៅក្នុងឆ្នាំទី ៥ របស់ខ្លួនពានរង្វាន់ធានារ៉ាប់រងអាស៊ី ទទួលស្គាល់ក្រុមហ៊ុនធានារ៉ាប់រងឆ្នើមបំផុតនៅតំបន់អាស៊ីប៉ាស៊ីហ្វិក ដែលឆ្លើយតបជាយុទ្ធសាស្ដ្រទៅនឹងការប្រកួតប្រជែងផ្នែកទីផ្សារ។ នៅឆ្នាំនេះក្រុមហ៊ុនធានារ៉ាប់រងជាង ៧០ មកពីប្រទេស ២២ ទទួលបានពានរង្វាន់នេះ។
លោកស្រី ប៊ុន ច័ន្ទមករា អ្នកគ្រប់គ្រងទូទៅនៃក្រុមហ៊ុនធានារ៉ាប់រង ស៊ីប៊ី បានឲ្យដឹងថា វាជាសមិទ្ធផលដ៏ធំសម្រាប់ក្រុមហ៊ុនដែលតំណាងឲ្យកម្ពុជាក្នុងការទទួលបានពានរង្វាន់ប្រកបដោយកិត្យានុភាពពីស្ថាប័នដ៏ល្បីមួយនេះ។
លោកស្រីថ្លែងថា៖ «ពានរង្វាន់នេះគឺជាការទទួលស្គាល់ដ៏អស្ចារ្យពីសមិទ្ធផល និងការខិតខំប្រឹងប្រែងរបស់ក្រុមការងារវ័យក្មេងរបស់យើងខ្ញុំ។ យើងខ្ញុំប្ដេជ្ញានាំយកបច្ចេកវិទ្យាថ្មី និងគំរូអាជីវកម្មថ្មីៗមកកាន់ទីផ្សារប្រទេសកម្ពុជា ហើយបន្តចូលរួមចំណែកដល់ការរីកចម្រើនក្នុងវិស័យធានារ៉ាប់រងនៅកម្ពុជា។ យើងនឹងពង្រីកសក្ដានុពលរបស់បច្ចេកវិទ្យាធានារ៉ាប់រង Insur Tech ក្នុងទីផ្សារកម្ពុជា ដែលផលិតផល និងសេវាកម្មអាចស្វែងរកបានយ៉ាងងាយស្រួល»។
ក្រុមហ៊ុនធានារ៉ាប់រងស៊ីប៊ីបានបង្កើតកម្មវិធីចល័តមួយកាលពីខែធ្នូ ឆ្នាំ ២០១៩។ កម្មវិធីទូរស័ព្ទស៊ីប៊ី (CB Mobile App) បង្ហាញការប្រើប្រាស់បណ្ណអេឡិចត្រូនិកផ្នែកធានារ៉ាប់រងសុខភាព (Medical e-cards) ដែលផ្ដល់ភាពងាយស្រួលជំនួសឲ្យបណ្ណពិតៗ ដែលប្រើប្រាស់ពីមុនមក។
កម្មវិធីទូរស័ព្ទក្រុមហ៊ុន ស៊ីប៊ី ផ្ដល់ជូនអតិថិជននូវភាពងាយស្រួល និងសាមញ្ញក្នុងការទទួលបាននូវព័ត៌មានលម្អិតនៃបណ្ណធានារបស់ខ្លួន ហើយអាចឲ្យពួកគេដំឡើងការធានាកាន់តែប្រសើរជាងមុន និងស្វែងរកគ្លីនិក ឬមន្ទីរពេទ្យដៃគូបានគ្រប់ពេលវេលា គ្រប់ទីកន្លែង៕ LA