ភ្នំពេញ: ថ្នាក់ដឹកនាំសភាពាណិជ្ជកម្មកម្ពុជា (CCC) និងគណៈកម្មការមូលបត្រកម្ពុជា (SECC) បានអំពាវនាវឱ្យក្រុមហ៊ុនក្នុងស្រុកមកចុះបញ្ជីនៅទីផ្សារមូលបត្រកម្ពុជា ដើម្បីចូលរួមជំរុញកំណើនសេដ្ឋកិច្ចជាតិ និងកៀរគរមូលធនពីផ្សារនេះដើម្បីនិរន្តរភាពអាជីវកម្មរបស់ខ្លួន។
ការអំពាវនាវនេះត្រូវបានធ្វើឡើងក្នុងសិក្ខាសាលាផ្សព្វផ្សាយស្តីពីសក្តានុពលទីផ្សារមូលបត្រសម្រាប់និរន្តរភាពអាជីវកម្មនៅកម្ពុជាដល់ធុរជនក្នុងស្រុក កាលពីថ្ងៃអង្គារនៅសភាពាណិជ្ជកម្មក្នុងទីក្រុងភ្នំពេញ។
លោក លឹម ហេង អនុប្រធាន CCC ដែលតំណាងលោក គិត ម៉េង ប្រធានសភាពាណិជ្ជកម្មកម្ពុជាបានថ្លែងថា ទីផ្សារមូលបត្រកម្ពុជាមានសារៈសំខាន់ណាស់សម្រាប់វិស័យឯកជនក្នុងការកៀរគរទុនបន្ថែមដើម្បីពង្រីកអាជីវកម្ម នៅពេលជំងឺកូវីដ១៩អាចត្រូវបានគ្រប់គ្រងទាំងស្រុង។
លោកថ្លែងថា៖ «ខ្ញុំជឿថាក្រោយពីចប់សិក្ខាសាលានេះទៅ សមាជិករបស់សភាពាណិជ្ជកម្មនឹងយល់ដឹងកាន់តែច្រើនពីទីផ្សារមូលបត្រ ដូច្នេះខ្ញុំសង្ឃឹមថា សមាជិករបស់សភាពាណិជ្ជកម្មនឹងចូលបោះផ្សាយភាគហ៊ុននៅផ្សារមូលបត្រ ដើម្បីផ្តល់ឱ្យប្រជាពលរដ្ឋមានលទ្ធភាពចូលរួមបណ្តាក់ទុនតាមរយៈការទិញភាគហ៊ុនរបស់ក្រុមហ៊ុនចុះបញ្ជីដើម្បីទទួលបានប្រាក់ចំណេញ»។
លោកបានឱ្យដឹងថា សិក្ខាសាលាផ្សព្វផ្សាយនេះត្រូវបានរៀបចំឡើងក្នុងគោលបំណងដើម្បីលើកកម្ពស់ និងបង្កើនការយល់ដឹងពាក់ព័ន្ធនឹងវិស័យមូលបត្រ។
លោកបញ្ជាក់ថា៖ «សិក្ខាសាលានេះនឹងផ្តល់អត្ថប្រយោជន៍ជាច្រើនដល់សមាជិករបស់សភាពាណិជ្ជកម្មកម្ពុជាអំពីការកៀរគរមូលធនសម្រាប់ពង្រីកប្រតិបត្តិការអាជីវកម្មតាមរយៈទីផ្សារមូលបត្រ និងការស្វែងរកហិរញ្ញប្បទាននៅក្នុងទីផ្សារមូលបត្រសម្រាប់ពង្រឹងការគ្រប់គ្រងក្រុមហ៊ុន ដើម្បីឱ្យអាជីវកម្មមាននិរន្តរភាព»។
លោក ស៊ូ សុជាតិ អគ្គនាយក SECC បានថ្លែងក្នុងសិក្ខាសាលានេះថា ការចូលរួមពីវិស័យឯកជនមានសារៈសំខាន់ណាស់ក្នុងការចូលរួមចំណែកបង្កើនចំនួនក្រុមហ៊ុនចុះបញ្ជីនៅលើផ្សារមូលបត្រកម្ពុជា។
លោកថ្លែងថា៖ «យើងសូមស្វាគមន៍គ្រប់ក្រុមហ៊ុនក្នុងតំបន់ចូលរួមជាមួយយើងខ្ញុំសង្ឃឹមថា ធុរជនយើងទាំងអស់គ្នានេះនឹងចុះបញ្ជីនៅក្នុងផ្សារមូលបត្រកម្ពុជាដែលវានឹងជួយឱ្យក្រុមហ៊ុនអាចប្រមូលសាច់ប្រាក់មកពង្រីកការវិនិយោគបន្ថែមទៀត»។
លោក អ៊ិន ចាន់នី ប្រធាននាយកប្រតិបតិ្តនៃធនាគារ អេស៊ីលីដា បានថ្លែងក្នុងសិក្ខាសាលានេះថា ធនាគារ អេស៊ីលីដាគឺជាធនាគារពាណិជ្ជដំបូងគេនៅកម្ពុជាដែលបានចុះបញ្ជីជាផ្លូវការ និងដាក់លក់ភាគហ៊ុនរបស់ធនាគារឱ្យជួញដូរនៅទីផ្សារមូលបត្រកម្ពុជាកាលពីថ្ងៃទី ២៥ ខែឧសភា ឆ្នាំនេះ ដោយទទួលបានទុន ១៧,៦ លានដុល្លារ ស្មើនឹង ១៥,៨៦ ភាគរយនៃមូលបត្រកម្មសិទ្ធិរបស់ខ្លួន។
លោកថ្លែងថា៖ «ខ្ញុំគិតថា ការចុះបញ្ជីនៅផ្សារមូលបត្រកម្ពុជានឹងផ្តល់លទ្ធភាពទទួលបានដើមទុនធ្វើឱ្យមានកំណើន ការធ្វើពិពិធកម្មកាន់តែទូលាយនៃជម្រើសហិរញ្ញប្បទាន ទទួលបានការចាប់អារម្មណ៍ពីសាធារណជនកាន់តែច្រើន បង្កើនតម្លាភាព និងសុចរិតភាព ហើយជួយបង្កើនសន្ទនីយភាពរបស់ភាគហ៊ុន និងតម្លៃ ព្រមទាំងដំណើរការអាជីវកម្មមានភាពរឹងមាំ រីកចម្រើនប្រកបដោយចីរភាព»។
គិតត្រឹមដំណាច់ត្រីមាសទី ៣ ឆ្នាំ ២០២០ នេះធនាគារអេស៊ីលីដាបានបញ្ចេញឥណទានសរុបចំនួន ៣ ៩៧០ លានដុល្លារ និងមានអតិថិជនឥណទានសរុបចំនួន ៤១៣ ៦១៣ នាក់។
ទិន្នន័យបានពី CSX រហូតមកដល់ពេលនេះ ផ្សារមូលបត្រកម្ពុជាមានក្រុមហ៊ុនចុះបញ្ជីចំនួន ១៣ ក្នុងនោះ ក្រុមហ៊ុន ៧ ចុះបញ្ជីមូលបត្រកម្មសិទ្ធិ និងក្រុមហ៊ុន ៦ ផ្សេងទៀតចុះបញ្ជីសញ្ញាបណ្ណសាជីវកម្ម។ ក្រុមហ៊ុន ១៣ នេះបានប្រមូលមូលនិធិរួមគ្នាបានប្រហែល ២៥៣ លានដុល្លារ។
ត្រឹមចុងឆមាសទី ១ ឆ្នាំនេះមូលធនភាវូបនីយកម្មទីផ្សារមួយនេះបានកើនឡើងដល់ ២,៥៧ ពាន់លានដុល្លារដែលមានចំនួន ៤,៥ បើធៀបនឹងរយៈពេលដូចគ្នាកាលពីឆ្នាំមុន៕ LA