ភ្នំពេញៈ សភាពាណិជ្ជកម្មកម្ពុជា (CCC) បានចុះអនុស្សរណៈនៃការយោគយល់គ្នាលើកិច្ចសហប្រតិបត្តិការចំនួន ១៨ ជាមួយភាគីចិនក្នុងដំណើរទស្សនកិច្ចរបស់ថ្នាក់ដឹកនាំក្រុមហ៊ុនចិនចំនួន ២៤ មកកម្ពុជាកាលពីថ្ងៃម្សិលមិញ។
ប៉ុន្តែខ្លឹមសារនៃអនុស្សរណៈទាំងអស់នេះ មិនត្រូវបានប្រាប់ឲ្យដឹងនោះទេ។
ថ្នាក់ដឹកនាំក្រុមហ៊ុនចំនួន ២៤ ដែលមកចូលរួមក្នុងឱកាសនោះមានមកពីវិស័យចម្រុះជាច្រើនដូចជា បច្ចេកវិទ្យា អេឡិចត្រូនិក មេកានិក អគ្គិសនី អប់រំ វេជ្ជសាស្ត្រ ខ្សែកាប អចលនទ្រព្យ សំណង់ និងសណ្ឋាគារ ជាដើម។
ថ្លែងក្នុងឱកាសនៃជំនួបពាណិជ្ជកម្មកម្ពុជា ចិន នៅសភាពាណិជ្ជកម្មកម្ពុជា លោក គិត ម៉េង ប្រធានសភាពាណិជ្ជកម្មកម្ពុជាបានប្រាប់ថា កម្ពុជាស្វាគមន៍ចំពោះដំណើរទស្សនកិច្ចរបស់ក្រុមគណៈប្រតិភូចិនក្នុងការមកស្វែងរកឱកាសវិនិយោគនៅកម្ពុជាដែលជាប្រទេសមានកំណើនសេដ្ឋកិច្ចដ៏ឆាប់រហ័សក្នុងរយៈពេលជាង ២ ទសវត្សរ៍មកនេះ។
លោកបន្តថា កម្ពុជាជាប្រទេសដែលស្ថិតក្នុងចំណោមប្រទេសមានកំណើនសេដ្ឋកិច្ចលឿនជាងគេលើពិភពលោក ដែលត្រូវបានទ្រទ្រង់ដោយវិស័យសំខាន់ៗមួយចំនួនដូចជា សំណង់ កាត់ដេរ និងស្បែកជើង និងវិស័យទេសចរណ៍ជាដើម។
លោកថ្លែងថា៖ «ថ្ងៃនេះ ខ្ញុំមានសេចក្តីរីករាយណាស់ដែលបានជួបប្រតិភូអាជីវកម្មទាំងអស់ដែលមានបំណងស្វែងរកទីផ្សារ និងឱកាសធុរកិច្ចនៅកម្ពុជា»។ លោកបន្តថា៖ «នៅកម្ពុជាមាននៅសល់ឱកាសវិនិយោគជាច្រើនកំពុងរង់ចាំ អ្នកមកស្វែងយល់លើគ្រប់វិស័យ»។
ជាមួយនឹងទំនាក់ទំនងដ៏ល្អ និងយូរអង្វែងបានធ្វើឲ្យទំហំពាណិជ្ជកម្មរវាងប្រទេសទាំង ២ កាលពីឆ្នាំ ២០១៨ មានតម្លៃ ៧,៤ ពាន់លានដុល្លារដោយកើនឡើង ២២ ភាគរយបើធៀបទៅនឹងឆ្នាំ ២០១៧។ នេះបើតាមលោក គិត ម៉េង។
លោកប្រាប់ទៀតថាសភាពាណិជ្ជកម្មកម្ពុជានឹងរង់ចាំធ្វើការយ៉ាងជិតស្និទ្ធជាមួយសមភាគីចិន។ លោកបានថ្លែងថា៖ «កម្ពុជារីករាយចំពោះចំណងមិត្តភាពទ្វេភាគីកម្ពុជា-ចិន ក៏ដូចជាគំនិតផ្តួចផ្តើមដែលបានដាក់ចេញដោយប្រទេសចិន «ខ្សែក្រវាត់ ១ ផ្លូវ ១» គំនិងផ្តួចផ្តើម «មូលនិធិផ្លូវសូត្រ» និង «ធនាគារវិនិយោគហេដ្ឋារចនាសម្ព័ន្ធអាស៊ី AIIB»។
លោក Lu Xinhua ប្រធានក្រុមប្រឹក្សាជំរុញកិច្ចសហប្រតិបត្តិការខាងត្បូងខាងត្បូងបាននិយាយថា ចិន បានចាត់ទុកកម្ពុជាជាប្រទេសដែលមានទំនាក់ទំនងល្អខ្លាំងជាមួយគ្នា ហើយនៅក្នុងគំនិតផ្តួចផ្តើម «ខ្សែក្រវាត់ ១ ផ្លូវ ១» កម្ពុជាក៏ត្រូវបានចាត់ទុកថាជាចំណុចស្នូលសំខាន់ផងដែរ។
លោកបន្តថា ការដឹកនាំក្រុមអ្នកវិនិយោគមកពីប្រទេសចិន ដើម្បីសិក្សាទីផ្សារវិនិយោគនៅកម្ពុជា។ លោកថ្លែងថា៖ «កិច្ចសហប្រតិបត្តិការលើការវិនិយោគរវាងកម្ពុជា និងចិន នឹងមានភាពកាន់តែល្អប្រសើរនៅពេលអនាគត»។
បើតាមអ្នកតំណាងមួយរូបមកពីប្រទេសចិនដែលបានចូលរួមក្នុងជំនួបពាណិជ្ជកម្មនោះគឺមានក្រុមហ៊ុនចំនួន ២ បានបង្ហាញពីការចាប់អារម្មណ៍យ៉ាងខ្លាំងរបស់ខ្លួនក្នុងការចូលមកបណ្តាក់ទុនលើវិស័យកសិកម្ម និងអចលនទ្រព្យនៅភ្នំពេញ និងខេត្តព្រះសីហនុ។
លោក នួន រិទ្ធី អគ្គនាយកក្រុមហ៊ុនអចលនទ្រព្យ Khmer Foundation Appraisals ដែលបានចូលរួមក្នុងជំនួបនេះបានប្រាប់ភ្នំពេញប៉ុស្តិ៍ថា ជំនួបនេះបានផ្តល់នូវផលវិជ្ជមានជាច្រើនសម្រាប់កម្ពុជាព្រោះតាមរយៈជំនួបនេះ កម្ពុជាសង្ឃឹមថានឹងអាចមានក្រុមហ៊ុនថ្មីៗជាច្រើនទៀតពីប្រទេសចិនចូលមកវិនិយោគនៅកម្ពុជា។
លោកបន្តថា៖ «ជាមួយនឹងស្ថិរភាពនយោបាយល្អប្រសើរ បច្ចុប្បន្នកម្ពុជាត្រូវបានចាត់ទុកថា ជាកន្លែងល្អបំផុតសម្រាប់ការចូលមកបណ្តាក់ទុនលើគ្រប់វិស័យពីសំណាក់វិនិយោគិនបរទេស»។
បើតាមលោក រិទ្ធី កម្ពុជាមានសក្តានុពលច្រើនសម្រាប់ការចូលមកបណ្តាក់ទុន ខណៈកម្ពុជាមានគោលនយោបាយលើកទឹកចិត្តច្រើនសម្រាប់អ្នកវិនិយោគ សម្បូរធនធានមនុស្ស ធនធានធម្មជាតិ និងផែនការពង្រីក និងពង្រឹងលើការសាងសង់ហេដ្ឋារចនាសម្ព័ន្ធ និងបង្កើនសមត្ថភាពផ្គត់ផ្គង់ថាមពលអគ្គិសនី ជាដើម។
របាយការណ៍របស់ក្រសួងទេសចរណ៍បានបង្ហាញថា ក្នុងរយៈពេល ៩ ខែឆ្នាំ ២០១៩ កម្ពុជាទទួលបានភ្ញៀវទេសចបរទេសសរុប ៤,៨១ លាននាក់ ក្នុងនោះចំនួនភ្ញៀវទេសចរចិនបាននាំមុខគេដោយមាន ១,៨៦ លាននាក់ កើនឡើង ២៩,៤ ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៨៕LA