.jpg)
លោក អ៊ិន ចាន់នី នៅក្នុងពិធីចុះកិច្ចព្រមព្រៀងជាមួយអ្នកតំណាងនៃធនាគារ CDB។ សហការី
ភ្នំពេញៈ China Development Bank (CDB) ដែលជាស្ថាប័នហិរញ្ញវត្ថុធំជាងគេលើពិភពលោកបានចុះកិច្ចព្រមព្រៀងផ្តល់ហិរញ្ញប្បទានរយៈពេលវែង ១៣០ លានដុល្លារ ដល់ធនាគារ អេស៊ីលីដា ភីអិលស៊ី ដែលជាគ្រឹះស្ថានហិរញ្ញវត្ថុឈានមុខគេនៅកម្ពុជា។
លោក Lyu Zhinan អគ្គនាយករងធនាគារ CDB បានឲ្យដឹងក្នុងសេចក្តីប្រកាសព័ត៌មានថា នេះគឺជាលើកទី ២ ដែលធនាគារទាំង ២ បានធ្វើកិច្ចសហការជាមួយគ្នា។ លោកបន្តថា អេស៊ីលីដា ជាធនាគារធំមួយដែលគាំទ្រការអភិវឌ្ឍសហគ្រាសខ្នាតតូច និងមធ្យមនៅប្រទេសកម្ពុជាដែលហិរញ្ញប្បទាននេះនឹងជួយពួកគេបានកាន់តែច្រើនថែមទៀត។
លោកថ្លែងថា៖ «CDB មានការជឿជាក់យ៉ាងមុតមាំថា កិច្ចសហប្រតិបត្តិការផ្តល់ហិរញ្ញប្បទាននេះនឹងជួយដល់សហគ្រាសខ្នាតតូច និងមធ្យមនៅកម្ពុជាកាន់តែច្រើនក្នុងការទប់ទល់នឹងស្ថានភាពនៃការរីករាលដាលនៃជំងឺជាសកល តាមរយៈការបង្កើតផលិតកម្មឡើងវិញ និងផ្តល់ផលវិជ្ជមានដល់សេដ្ឋកិច្ចកម្ពុជាផងដែរ»។
លោកបន្តថា៖ «CDB មានឆន្ទៈក្នុងការសហប្រតិបត្តិការបន្ថែមទៀតជាមួយធនាគារ អេស៊ីលីដា លើកិច្ចការសំខាន់ៗដើម្បីជំរុញកំណើនសេដ្ឋកិច្ចឆាប់រហ័ស និងការអភិវឌ្ឍដ៏មានសក្តានុពលក្នុងប្រទេសកម្ពុជា»។
លោក អ៊ិន ចាន់នី ប្រធានអគ្គនាយកប្រតិបត្តិធនាគារ អេស៊ីលីដា បានឲ្យដឹងថា ហិរញ្ញប្បទានទទួលបានពី CDB នឹងជួយគាំទ្រដល់ការរីកចម្រើនរយៈពេលវែងដល់ធនាគារអេស៊ីលីដា។ លោករំពឹងថា ហិរញ្ញប្បទាននេះនឹងផ្តល់ឥណទានថ្មីដល់សហគ្រាសខ្នាតតូច និងមធ្យមប្រមាណ ៥ ០០០ សហគ្រាសបន្ថែមទៀត។
លោកនិយាយថា៖ «ក្នុងនាមជាក្រុមហ៊ុនមួយក្នុងចំណោមក្រុមហ៊ុនចុះបញ្ជីនៅក្នុងផ្សារហ៊ុនកម្ពុជា យើងអាចប្រមូលមូលនិធិពីទីផ្សារមូលធនសម្រាប់ពង្រឹងដើមទុនរបស់យើងដោយយកទៅដាក់ប្រាក់បញ្ញើសន្សំដែលបានមកពីប្រាក់បញ្ញើទីផ្សារហិរញ្ញវត្ថុសម្រាប់តម្រូវការដើមទុនរយៈពេលខ្លី»។ លោកបានបន្តថា៖ «នេះជាការធ្វើពិពិធកម្មនៃប្រភពទុនមានសារៈសំខាន់ខ្លាំងណាស់ ដើម្បីគាំទ្រយុទ្ធសាស្ត្ររីកចម្រើនប្រកបដោយចីរភាពរបស់ធនាគារ»។
សេចក្តីប្រកាសព័ត៌មានបានឲ្យដឹងថា គិតត្រឹមដំណាច់ខែមីនា ឆ្នាំ ២០២០ នេះ អេស៊ីលីដា មានទ្រព្យសកម្មសរុប ៦,១៥ ពាន់ដុល្លារ សមតុល្យឥណទានសរុបចំនួន ៣,៩៩ ពាន់លានដុល្លារ និងប្រាក់បញ្ញើសន្សំសរុបចំនួន ៤,៣៥ ពាន់លានដុល្លារ៕ LA
