ភ្នំពេញ: ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តការចុះបញ្ជីជាផ្លូវការនូវរោងចក្រ ១០ បន្ថែមទៀតគិតត្រឹមសប្តាហ៍ទី ៣ នៃខែកុម្ភៈនេះ។
រោងចក្រទាំងនេះរួមមានផលិតសម្ភារផ្ទះបាយ រោងចក្រផលិតអំពូលភ្លើងលម្អ និងខ្សែកាបរោងចក្រផលិតគ្រឿងសង្ហារិមរោងចក្រផលិតអាគុយស្ងួត និងគ្រឿងផ្គុំ និងរោងចក្រសម្លៀកបំពាក់ស្បែកជើង និងផលិតផលធ្វើដំណើរ។ នេះបើតាមសេចក្តីប្រកាសព័ត៌មានចេញផ្សាយកាលពីថ្ងៃអង្គារ។
CDC បានឲ្យដឹងថា គម្រោងរោងចក្រទាំងនេះនឹងបង្កើតការងារដល់ប្រជាពលរដ្ឋចំនួន ៤ ៧៤៤ នាក់។
បើយោងតាម CDC គម្រោងវិនិយោគរោងចក្រទាំងនេះរួមមានក្រុមហ៊ុន Kaining Metal Product (Cambodia) Co.,Ltd ដែលមានទុនវិនិយោគ ៨,៨ លានដុល្លារដោយបង្កើតរោងចក្រផលិតសម្ភារផ្ទះបាយ និងគម្រោងវិនិយោគលើរោងចក្រផលិតអំពូលភ្លើងលម្អ និងខ្សែកាបរបស់ក្រុមហ៊ុន Hong ao Cable &Wire (Cambodia)Co.,Ltd មានទុនវិនិយោគ ៥,៧ លានដុល្លារមានទីតាំងនៅក្នុងតំបន់សេដ្ឋកិច្ចពិសេសខេត្តស្វាយរៀង។
ក្រុមហ៊ុន RunYang&RunJie (Cambodia) Logistic Safety Equipment Manufacturing Co.,Ltd នឹងវិនិយោគលើរោងចក្រផលិតសម្ភារបរិក្ខារលើកដាក់ទំនិញមានទុនវិនិយោគ ៩,១ លានដុល្លារ និងក្រុមហ៊ុន CambodianSaibanWoodCo.,Ltd វិនិយោគលើរោងចក្រផលិតគ្រឿងសង្ហារិមដែលមានទុនវិនិយោគ ១,៩ លានដុល្លារមានទីតាំងនៅក្នុងតំបន់សេដ្ឋកិច្ចពិសេសខេត្តព្រះសីហនុ។
សេចក្តីប្រកាសបានឲ្យដឹងថា ក្រុមហ៊ុន Ultraspower Technology Battery Co.,Ltd ទទួលបានការវិនិយោគលើរោងចក្រផលិតអាគុយស្ងួតដែលមានទុនវិនិយោគ ២១,៥ លានដុល្លារ និងក្រុមហ៊ុន Zhong Yongxin (Cambodia) Co.,Ltd វិនិយោគលើរោងចក្រផលិតគ្រឿងផ្គុំអាគុយស្ងួតដែលមានទុនវិនិយោគ ២៥,១ លានដុល្លារ។ គម្រោងទាំង ២ នេះស្ថិតនៅទីតាំងក្នុងតំបន់សេដ្ឋកិច្ចពិសេសខេត្តកំពង់ស្ពឺ។
ទន្ទឹមនឹងនេះគម្រោងវិនិយោគលើរោងចក្រផលិតគ្រឿងផ្សំសម្លៀកបំពាក់ស្បែកជើង និងកាបូបដែលមានទុនវិនិយោគ ២ លានដុល្លាររបស់ក្រុមហ៊ុន XinLianXinElastic&String (Cambodia) Co.,Ltd មានទីតាំងស្ថិតនៅខណ្ឌកំបូលខណៈក្រុមហ៊ុន Huakuan (Cambodia) Garments Co.,Ltd នឹងវិនិយោគលើគម្រោងបង្កើតរោងចក្រកាត់ដេរសម្លៀកបំពាក់ក្នុងទុនវិនិយោគ ២,៣ លានដុល្លារស្ថិតនៅខណ្ឌពោធិ៍សែនជ័យ។
ដោយឡែកគម្រោងវិនិយោគលើរោងចក្រផលិតកាបូបខ្សែក្រវាត់ និងវ៉ាលិសរបស់ក្រុមហ៊ុន J.D.Leather Goods(Cambodia)Co.,Ltd ដែលមានទុនវិនិយោគ ៣,៨ លានដុល្លារស្ថិតនៅស្រុកត្រាំកក់ខេត្តតាកែវ ខណៈគម្រោងវិនិយោគរោងចក្រកាត់ដេរសម្លៀកបំពាក់របស់ក្រុមហ៊ុន Given Clothing Garment (Cambodia) Co.,Ltd ដែលមានទុនវិនិយោគ ៣,៥ លានដុល្លារ ស្ថិតនៅក្រុងច្បារមនខេត្តកំពង់ស្ពឺ។
ថ្លែងក្នុងកិច្ចប្រជុំប្រចាំឆ្នាំកាលពីថ្ងៃចន្ទលោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្មបានឲ្យដឹងថាកម្ពុជាក៏បានទាក់ទាញរោងចក្រដំឡើងរថយន្ត និងម៉ូតូរោងចក្រគ្រឿងបន្លាស់រថយន្តឧបករណ៍អគ្គិសនី បរិក្ខារផ្គត់ផ្គង់អគ្គិសនីសម្ភារសំណង់ និងរោងចក្រកសិឧស្សាហកម្មផងដែរ។ លោកថ្លែងថា៖ «បច្ចុប្បន្នខ្ញុំមើលឃើញរោងចក្រថ្មីៗបើកដំណើរការនៅក្នុងប្រទេសយើងជាមួយនឹងតម្លៃខ្ពស់ និងឧស្សាហកម្មបច្ចេកវិទ្យាខ្ពស់»។
របាយការណ៍របស់ក្រសួងឧស្សាហកម្ម និងសិប្បកម្មបង្ហាញថា គិតត្រឹមចុងឆ្នាំ ២០១៩ ប្រទេស កម្ពុជា មានរោងចក្រសរុបចំនួន ១ ៧៣០ ក្នុងនោះរោងចក្រកាត់ដេរ វាយនភណ្ឌ ស្បែកជើង សម្ភារធ្វើដំណើរមាន ១ ០៦៩ រោងចក្រកែច្នៃ និងផលិតផលអាហារ ភេសជ្ជៈ និងថ្នាំជក់ ១៥៧ រោងចក្រកែច្នៃកៅស៊ូ និងប្លាស្ទិក ១៤៣ រោងចក្រកែច្នៃផលិតផលឈើ ៥៤ និងរោងចក្រផលិតផលលោហធាតុចំនួន ១៩៥៕