.jpg)
គំរោង ១ របស់ក្រុមហ៊ុន Famous Leatherware (Cambodia) Co., Ltd. គម្រោងបង្កើតរោងចក្រផលិតកាបូបគ្រប់ប្រភេទនៅខណ្ឌមានជ័យមានទុនវិនិយោគ ៥,៣ លានដុល្លារ។ ភ្នំពេញ ប៉ុសិ៍្ត
ភ្នំពេញៈ ក្រុមប្រឹក្សាអភិវឌ្ឍន៍កម្ពុជា (CDC) កាលពីថ្ងៃចន្ទសម្រេចអនុម័តគម្រោងវិនិយោគចំនួន ៤ ដែលមានតម្លៃសរុប ១៧,២ លានដុល្លារ និងអាចបង្កើតការងារបានចំនួន ១ ៤៩០ នាក់។ នេះបើយោងតាមសេចក្តីប្រកាសព័ត៌មានរបស់ CDC។
សេចក្តីប្រកាសព័ត៌មានបានឲ្យដឹងថា CDC បានអនុម័តឲ្យក្រុមហ៊ុនចំនួន ៤ រួមមាន ក្រុមហ៊ុន Sun Awesome Garment Co., Ltd. លើគម្រោងបង្កើតរោងចក្រកាត់ដេរសម្លៀកបំពាក់ និងបោកគក់ស្ថិតនៅស្រុកព្រៃឈរ ខេត្តកំពង់ចាម ក្រោមទុនវិនិយោគ ៦,៩ លានដុល្លារ និងអាចបង្កើតការងារបាន ៦១០ នាក់។ ក្រុមហ៊ុន Famous Leatherware (Cambodia) Co., Ltd. គម្រោងបង្កើតរោងចក្រផលិតកាបូបគ្រប់ប្រភេទនៅខណ្ឌមានជ័យមានទុនវិនិយោគ ៥,៣ លានដុល្លារអាចបង្កើតការងារបាន ៣១៤ នាក់។
ចំណែកក្រុមហ៊ុន ២ ទៀតរួមមាន ក្រុមហ៊ុន Xin Hak Muy Make Clothes Assist Material Co., Ltd. វិនិយោគលើគម្រោងបង្កើតរោងចក្រត្បាញខ្សែបន្ទះ ខ្សែយឺត និងអំបោះដេរនៅខណ្ឌដង្កោ រាជធានី-ភ្នំពេញមានទុនវិនិយោគ ២,៥ លានដុល្លារអាចបង្កើតការងារបាន ២៣២ នាក់ និងក្រុមហ៊ុន Kimbao Bag Industry Co., Ltd. លើគម្រោងបង្កើតរោងចក្រផលិតកាបូប និងថង់យួរគ្រប់ប្រភេទ ស្ថិតនៅស្រុកអង្គស្នួល ខេត្តកណ្តាលមានទុនវិនិយោគប្រមាណ ២,៥ លានដុល្លារ និងអាចបង្កើតការងារបានចំនួន ៣៣៤ នាក់។
បើយោងតាម CDC ចំនួនក្រុមហ៊ុនដែលមកដាក់ពាក្យបានកើនឡើងជាបន្តបន្ទាប់ពី ១ ឆ្នាំទៅ ១ ឆ្នាំ។
លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មបានឲ្យដឹងថា ក្រសួងតែងតែខិតខំផ្សព្វផ្សាយ និងចូលរួមព្រឹត្តិការណ៍នានាទាំងក្នុងប្រទេស និងក្រៅប្រទេស ដើម្បីទាក់ទាញការចូលមកបណ្តាក់ទុននៅកម្ពុជា។ លោកបានបន្តថា កំណើននៃការស្នើសុំបើកក្រុមហ៊ុនថ្មីៗនៅក្រសួងពាណិជ្ជកម្ម និងចំណាប់អារម្មណ៍របស់វិនិយោគិនបរទេសក្នុងការចូលមកបណ្តាក់ទុននៅកម្ពុជាកំពុងកើនឡើងជាបន្តបន្ទាប់។
លោកថ្លែងថា៖ «កម្ពុជាប្រកាន់យកទីផ្សារសេរី ហេតុនេះនឹងមានវិនិយោគិនពីប្រទេសផ្សេងៗចូលមកវិនិយោគជាបន្តបន្ទាប់»។
លោក ហុង វណ្ណៈ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជាបាននិយាយថា ភាពអំណោយផលនៃទីតាំងភូមិសាស្ត្រ ការសម្បូរកម្លាំងពលកម្មវ័យក្មេង និងមានតម្លៃថោកបានធ្វើឲ្យកម្ពុជាទាក់ទាញបាននូវការចូលមកបណ្តាក់ទុនពីសំណាក់វិនិយោគិនបរទេស ពិសេសមកពីប្រទេសចិនជាបន្តបន្ទាប់នារយៈពេលប៉ុន្មានឆ្នាំចុងក្រោយនេះ។
លោកបន្តថា ភាគច្រើននៃការអនុម័តរបស់ CDC នាពេលថ្មីៗនេះ គឺជារោងចក្រកាត់ដេរ សម្ភារធ្វើដំណើរ និងផលិតផលមួយចំនួនទៀតដែលជាសម្ភារប្រើប្រាស់ចាំបាច់សម្រាប់ការរស់នៅដោយមិនមានជាគ្រឿងចក្រ ឬឧស្សាហកម្មធំៗទេ។
បើតាមលោក វណ្ណៈ ប្រសិនបើភាពអនុគ្រោះដែលកម្ពុជាកំពុងទទួលបានពីប្រទេសធំដូចជាអាមេរិក និងអឺរ៉ុបមានការប្រែប្រួលនោះចំនួននៃការចូលមកបណ្តាក់ទុនពីបរទេសនៅកម្ពុជាអាចនឹងមិនមានកំណើនខ្ពស់ដូចពេលនេះទេ។
របាយការណ៍ពីធនាគារជាតិបង្ហាញថា ការវិនិយោគផ្ទាល់ពីបរទេស (FDI) នៅកម្ពុជាក្នុងឆ្នាំ ២០១៩ មានតម្លៃសរុប ៣ ៥៨៨ លានដុល្លារ កើនឡើង ១១,៧ ភាគរយពីចំនួន ៣ ២១២ លានដុល្លារ កាលពីឆ្នាំ ២០១៨។ កំណើនភាគច្រើនបានមកពីការវិនិយោគរបស់ចិន។ សម្រាប់ឆ្នាំ ២០២០ FDI ត្រូវបានរំពឹងថា នឹងកើន ១០ ភាគរយបន្ថែមទៀត៕LA
