.jpg)
ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងចំនួន ៧ ស្មើនឹងទុនវិនិយោគសរុបជិត ៧២ លានដុល្លារ គិតចាប់ពីដើមខែសីហា មកដល់ថ្ងៃពុធម្សិលមិញ។ រូបថត KPA
ភ្នំពេញៈ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងចំនួន ៧ ស្មើនឹងទុនវិនិយោគសរុបជិត ៧២ លានដុល្លារ គិតចាប់ពីដើមខែសីហា មកដល់ថ្ងៃពុធម្សិលមិញ។
គម្រោងទាំងនេះនឹងបង្កើតការងារជិត ៣ ០០០ កន្លែង។ នេះបើតាម CDC។
តាមសេចក្តីប្រកាសព័ត៌មានរបស់ CDC ឲ្យដឹងថា យោងតាមសំណើសុំវិនិយោគ CDC បានសម្រេចចេញវិញ្ញាបនបត្រចុះបញ្ជីជាស្ថាពរជូនដល់ក្រុមហ៊ុនទាំងនោះដែលរួមមាន Newtoshi Homewear Co., Ltd គម្រោងបង្កើតរោងចក្រកាត់ដេរសម្លៀកបំពាក់ ម៉ាស់ ស្រោមដៃ កាបូប ថង់យួរដៃ និងសម្ភារប្រើប្រាស់ផ្ទះបាយមានទុន ៣,៤ លានដុល្លារ ក្រុមហ៊ុន Tokyo Happy Ice Cream Co., Ltd គម្រោងបង្កើតរោងចក្រផលិតការ៉េមមានទុន ៣,១ លានដុល្លារ, ក្រុមហ៊ុន Rong Xing Paper Industrial Co., Ltd គម្រោងបង្កើតរោងចក្រផលិតកេសកាតុងមានទុន ៣,៦ លានដុល្លារ ក្រុមហ៊ុន K&K Pipe (Cambodia) Co., Ltd គម្រោងបង្កើតរោងចក្រផលិតទុយោទឹកមានទុនវិនិយោគ ៦ លានដុល្លារ។
ក្រុមហ៊ុនផ្សេងទៀតរួមមាន Ray Power Supply Co., Ltd គម្រោងបង្កើតស្ថានីយផលិតអគ្គិសនីដើរដោយថាមពលព្រះអាទិត្យ អានុភាព ៣០ មេហ្គាវ៉ាត់មានទុន ៣៩,៨ លានដុល្លារ ក្រុមហ៊ុន CamIcare Co.,Ltd គម្រោងបង្កើតរោងចក្រផលិតវ៉ែនតា និងប្រអប់មានទុន ៥,៥ លានដុល្លារ ខណៈ Forever Fug Garment Co., Ltd គម្រោងបង្កើតរោងចក្រកាត់ដេរសម្លៀកបំពាក់មានទុន ១០,៣ លានដុល្លារ។
លោក លឹម ហេង អនុប្រធានសភាពាណិជ្ជកម្មកម្ពុជាបានប្រាប់ថា ការបោះទុនវិនិយោគនៅពេលនេះទំនងជាវិនិយោគិនទាំងនេះរំពឹងថានឹងទទួលបានផលប្រយោជន៍ពីកិច្ចព្រមព្រៀងពាណិជ្ជកម្មសេរីកម្ពុជា-ចិន ដែលគ្រោងនឹងចុះហត្ថលេខានៅពេលឆាប់ៗនេះ។
លោកថ្លែងថា៖ «ពួកគេបានសម្លឹងឃើញរួចហើយនូវឱកាសនាំចេញទៅកាន់ទីផ្សារប្រទេសចិនដែលនឹងផ្តល់ប្រយោជន៍ច្រើនតាមរយៈកិច្ចព្រមព្រៀងពាណិជ្ជកម្មសេរី»៕ LA
