ភ្នំពេញៈ គម្រោងវិនិយោគរោងចក្រផលិតកាបូប និងសម្លៀកបំពាក់ ៣ ដែលមានទុនវិនិយោគជិត ៩ លានដុល្លារត្រូវបានក្រុមប្រឹក្សាអភិវឌ្ឍន៍កម្ពុជា (CDC) សម្រេចចេញវិញ្ញាបនបត្រចុះបញ្ជីជាស្ថាពរ។ នេះបើតាម CDC។
គេហទំព័រ CDC កាលពីល្ងាចថ្ងៃចន្ទបានបង្ហាញថា CDC បានយល់ព្រមឲ្យក្រុមហ៊ុនរោងចក្រផលិតកាបូប Quan Ming Handbag (Cambodia) Industrial Co., Ltd ក្រុមហ៊ុនរោងចក្រផលិតកាបូប និងខ្សែក្រវាត់ Gd New Sky Leather Products Co., Ltd. និងក្រុមហ៊ុនរោងចក្រកាត់ដេរសម្លៀកបំពាក់ Tao And Kiven Garment Co., Ltd ចុះបញ្ជីជាផ្លូវការ។
យោងតាម CDC រោងចក្រទាំង ៣ នេះមានតម្លៃទុនវិនិយោគសរុប ៨,៨ លានដុល្លារ ដោយអាចបង្កើតការងារបាន ៣ ៤៤៨ កន្លែង។ រោងចក្រទាំងនេះមានទីតាំងស្ថិតនៅរាជធានីភ្នំពេញ ខេត្តកណ្តាល និងកំពង់ស្ពឺ។
អ្នកនាំពាក្យក្រសួងពាណិជ្ជកម្ម លោក ឡុង កែមវិចិត្រ បាននិយាយថា កម្ពុជាជាកន្លែងដែលមានបរិយាកាសវិនិយោគល្អបំផុតសម្រាប់ការមកបណ្តាក់ទុន ព្រោះមានប្រព័ន្ធអនុគ្រោះពន្ធច្រើន (GSP និង EBA) ខណៈច្បាប់វិនិយោគកម្ពុជាក៏មានលក្ខណៈអំណោយផលផងដែរ។ បច្ចុប្បន្នមានអ្នកវិនិយោគិនអន្តរជាតិកាន់តែច្រើនបានបង្ហាញពីការចាប់អារម្មណ៍ចូលមកវិនិយោគនៅកម្ពុជា។
លោកបានថ្លែងថា៖ «ការទទួលបានក្រុមហ៊ុនថ្មីៗ គឺជាសញ្ញាណវិជ្ជមានមួយដែលអាចទាក់ទាញឲ្យវិនិយោគិនដទៃទៀតចូលមកបណ្តាក់ទុននៅកម្ពុជា»។
ខណៈបច្ចុប្បន្នកម្ពុជាអាចប្រឈមនឹងការបាត់បង់ឱកាសនាំចេញទំនិញទៅកាន់ទីផ្សារសហគមន៍អឺរ៉ុបដោយរួចពន្ធ ក្រោមប្រព័ន្ធអនុគ្រោះពាណិជ្ជកម្ម (EBA) នោះលោក កែម វិចិត្រ បានថ្លែងថា៖ «កម្ពុជាកំពុងធ្វើពិពិធកម្មទំនិញនាំចេញរបស់ខ្លួន ដើម្បីកាត់បន្ថយប៉ះពាល់នានាដែលអាចកើតឡើង»។
លោកបន្ថែមថា កម្ពុជាកំពុងខិតខំពង្រឹងផលិតភាព និងភាពប្រកួតប្រជែងរបស់ខ្លួនក្នុងវិស័យនាំចេញ ដើម្បីធ្វើឲ្យទំនិញកម្ពុជាអាចប្រកួតប្រជែងជាមួយផលិតផលប្រទេសផ្សេងៗ ទោះជាមានការអនុគ្រោះពន្ធ ឬមិនអនុគ្រោះក៏ដោយ។
លោក កាំង ម៉ូនីកា អគ្គលេខាធិការរងសមាគមរោងចក្រកាត់ដេរនៅកម្ពុជា (GMAC) មិនអាចទាក់ទងបានទេកាលពីម្សិលមិញ៕LA