.jpg)
បច្ចុប្បន្នសំណង់អគារធំៗជាច្រើនបានលេចឡើងជាបន្តបន្ទាប់នៅក្នុងក្រុងព្រះសីហនុ។ ហេង ជីវ័ន
ភ្នំពេញៈ ក្រុមប្រឹក្សាអភិវឌ្ឍន៍កម្ពុជា (CDC) កាលពីសប្តាហ៍មុនបានអនុម័តគម្រោងវិនិយោគសណ្ឋាគារចំនួន ២ ដែលមានតម្លៃ ៣៧៩ លានដុល្លារនៅខេត្តព្រះសីហនុដែលជាគម្រោងវិនិយោគរបស់ក្រុមហ៊ុនចិន។ នេះបើយោងតាមសេចក្តីប្រកាសរបស់ CDC នៅលើទំព័រហ្វេសប៊ុក។
សណ្ឋាគារលំដាប់ផ្កាយ ៥ ចំនួន ២ ដែលមាន ២០១១ បន្ទប់ត្រូវបានវិនិយោគដោយក្រុមហ៊ុនចិន Xigang V-Continent International Investment Co., Ltd និងក្រុមហ៊ុន Hai Gang Grand Hotel Co., Ltd។
ក្រុមប្រឹក្សាអភិវឌ្ឍន៍កម្ពុជាបានឲ្យដឹងថា គម្រោងសាងសង់របស់ក្រុមហ៊ុន Xigang V-Continent Internatio-nal Investment Co., Ltd និងមាន ១ ១១១ បន្ទប់ ដែលមានទីតាំងស្ថិតនៅក្នុងសង្កាត់លេខ ៣ ក្រុងព្រះសីហនុក្រោមទុនវិនិយោគចំនួន ២២៦ លានដុល្លារ ខណៈគម្រោងរបស់ Hai Gang Grand Hotel Co., Ltd. សាងសង់សណ្ឋាគារផ្កាយ ៥ ចំនួន ៩០០ បន្ទប់ស្ថិតក្នុងសង្កាត់លេខ ៤ ដែលមានទុនវិនិយោគសរុប ១៥៣ លានដុល្លារ។
នៅក្នុងសេចក្តីប្រកាសរបស់ CDC មិនបានបញ្ជាក់ពីពេលវេលានៃការចាប់ផ្តើមគម្រោងទាំង ២ នេះទេ។
លោក គួច ចំរើន អភិបាលខេត្តព្រះសីហនុកាលពីម្សិលមិញបានប្រាប់ភ្នំពេញប៉ុស្តិ៍ ថានេះគឺជាឱកាសដ៏ល្អសម្រាប់វិនិយោគិនក្នុងការបណ្តាក់ទុនលើការសាងសង់សណ្ឋាគារនៅខេត្តព្រះសីហនុ។
លោកថ្លែងថា៖ «ខ្ញុំគិតថាអ្នកវិនិយោគគេបានសិក្សាទីផ្សាររួចហើយ ម្យ៉ាងទៀតនៅពេលមានការប្រកួតប្រជែងគ្នាក៏អាចធ្វើឲ្យសកម្មភាពនៃការបម្រើសេវាកម្មវិស័យទេសចរណ៍កាន់តែល្អប្រសើរផងដែរ»។
លោកបន្តថាគម្រោងនេះនឹងធ្វើឲ្យខេត្តព្រះសីហនុអាចទាក់ទាញភ្ញៀវទេសចរបរទេសឲ្យមកសម្រាកកម្សាន្តបានច្រើនបន្ថែមទៀត ដោយមិនមែនមានតែភ្ញៀវទេសចរចិននោះទេ។
របាយការណ៍ពីមន្ទីរទេសចរណ៍ខេត្តព្រះសីហនុបានឲ្យដឹងថាក្នុងឆមាសទី ១ ឆ្នាំ ២០១៩ ខេត្តព្រះសីហនុទទួលបានភ្ញៀវទេសចរចំនួន ១,៣៤ លាននាក់កើនឡើង ៣,២២ ភាគរយ បើធៀបទៅនឹងឆមាសទី ១ ឆ្នាំ ២០១៨។ ភ្ញៀវជាតិ មានចំនួនជាង ៩៥ ម៉ឺននាក់ធ្លាក់ចុះ ៦,២៦ ភាគរយ ចំណែកភ្ញៀវទេសចរបរទេសមានជាង ៣៩ ម៉ឺននាក់កើនឡើង ៣៦,៣២ ភាគរយភាគច្រើនជនជាតិចិនដែលមានជាង ១៦ ម៉ឺននាក់។
អ្នកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបាននិយាយថា ខណៈបច្ចុប្បន្នសណ្ឋាគារនៅក្នុងក្រុងព្រះសីហនុមានច្រើន ប៉ុន្តែនៅមានកង្វះបន្ទប់ស្នាក់នៅ ដោយសារសណ្ឋាគារមួយចំនួនត្រូវបានវិនិយោគិនចិនជួលយកទៅប្រើប្រាស់ជាកាស៊ីណូ ឬកន្លែងពួកគេស្នាក់នៅ។
អ្នកស្រីថ្លែងថា៖ «ការវិនិយោគលើសណ្ឋាគារជារឿងល្អសម្រាប់វិស័យទេសចរណ៍ តែប្រសិនបើកម្ពុជាអាចបង្កើនភាពទាក់ទាញការវិនិយោគនៅតាមបណ្តាកោះដែលមានលក្ខណៈធម្មជាតិ និងផលិតផលទេសចរណ៍ថ្មីៗបន្ថែមទៀតនោះ ខ្ញុំគិតថា ខេត្តព្រះសីហនុនឹងមានតម្រូវការសណ្ឋាគារប្រណីតៗកាន់តែច្រើនទៀត»។
របាយការណ៍របស់មន្ទីរទេសចរណ៍ខេត្តព្រះសីហនុបានឲ្យដឹងទៀតថា គិតត្រឹមឆមាសទី ១ ឆ្នាំ ២០១៩ នៅក្នុងក្រុងព្រះសីហនុមានសណ្ឋាគារកំពុងបើកដំណើរការសរុបចំនួន ៩៨ ទីតាំង៕
