.jpg)
កម្មករកំពុងចាក់ជ័រកៅស៊ូចូលទៅក្នុងធុង បន្ទាប់ពីចៀរបានពីក្នុងចម្ការកៅស៊ូមួយក្នុងខេត្តកំពង់ចាមកន្លងមក ។ រូបថត ភ្នំពេញ ប៉ុស្តិ៍
ភ្នំពេញៈ តម្លៃនៃទុនវិនិយោគដែលត្រូវបានអនុម័តដោយក្រុមប្រឹក្សាអភិវឌ្ឍន៍កម្ពុជា (CDC) នៅក្នុងឆមាសទី ១ ឆ្នាំ ២០១៨ នេះបានកើនឡើង ១៤ ភាគរយរហូតទៅដល់ជាង ៣ ពាន់លានដុល្លារ បើធៀបទៅនឹងរយៈពេលដូចគ្នាកាលពីឆ្នាំ ២០១៧ កន្លងមក។ នេះបើតាមសេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា។
សេចក្តីប្រកាសព័ត៌មានដែលបានផ្សព្វផ្សាយកាលពីថ្ងៃសៅរ៍បង្ហាញថា ក្នុងឆមាសទី ១ ឆ្នាំ ២០១៨ នេះ CDC បានអនុម័តទៅលើគម្រោងវិនិយោគសរុប ១០៦ ក្នុងនោះគម្រោងថ្មីមានចំនួន ៩៧ និងគម្រោងពង្រីកផលិតកម្មបន្ថែមចំនួន ៩ ដែលមានតម្លៃសរុបប្រមាណ ៣,៥ ពាន់លានដុល្លារដោយបង្កើតការងារបានប្រមាណជិត ១០ ម៉ឺនកន្លែង។
សេចក្តីប្រកាសខាងលើបានឲ្យដឹងទៀតថា ការវិនិយោគលើវិស័យកសិកម្ម និងកសិឧស្សាហកម្មមានកំណើនខ្ពស់ជាងគេពោលគឺកើនឡើងចំនួន ៧៧ ភាគរយ ខណៈវិស័យឧស្សាហកម្ម និងកម្មន្តសាលកើនឡើងចំនួន ២២ ភាគរយ។
លោក តាន់ មុនីវណ្ណ អគ្គនាយករងក្រុមហ៊ុន ម៉ុង ឫទ្ធី គ្រុប ដែលជាក្រុមហ៊ុនវិនិយោគក្នុងស្រុកដ៏ធំនៅក្នុងវិស័យកសិកម្ម និងកសិឧស្សាហកម្មកាលពីថ្ងៃម្សិលមិញបានប្រាប់ភ្នំពេញ- ប៉ុស្តិ៍ថាគោលនយោបាយអភិវឌ្ឍន៍វិស័យឧស្សាហកម្មឆ្នាំ ២០១៥-២០២៥ កំពុងចូលរួមចំណែកយ៉ាងច្រើននៅក្នុងការជំរុញឲ្យវិស័យកសិកម្ម និងកសិឧស្សាហកម្មនៅកម្ពុជាឲ្យមានដំណើរវិវឌ្ឍន៍ទៅមុខ។ បច្ចុប្បន្ននេះការវិនិយោគបានកើនឡើងលើគ្រប់វិស័យពិសេសលើផលិតផលកសិកម្ម និងកសិឧស្សាហកម្ម។
លោក មុនីវណ្ណ បានថ្លែងថា៖ «កំណើនវិនិយោគនៅកម្ពុជានឹងកើនឡើងបន្ថែមទៀតព្រោះរដ្ឋាភិបាលគ្រោងនឹងដាក់ចេញនូវគោលនយោបាយសំខាន់ៗជាច្រើនដើម្បីជំរុញការវិនិយោគទាំងក្នុងស្រុក និងបរទេស តាមរយៈមធ្យោបាយមួយចំនួនដូចជា ការបញ្ចុះអត្រាពន្ធនាំចេញ នាំចូល និងការបញ្ចុះតម្លៃថាមពលអគ្គិសនីជាដើម»។
លោកបានបន្តថាចាប់ពីពេលនេះទៅការនាំចេញវត្ថុធាតុដើមកសិកម្មពីកម្ពុជាទៅកាន់ទីផ្សារអន្តរជាតិនឹងមានការវិវឌ្ឍទៅមុខកាន់តែលឿនព្រោះកម្ពុជាកំពុងខិតខំយ៉ាងខ្លាំងក្នុងការបង្កើនបរិមាណ និងគុណភាពទៅលើផលិតផលសក្តានុពលរបស់ខ្លួន ដែលមានដូចជា ស្រូវអង្ករ កៅស៊ូ ម្រេច ពោត ដំឡូង និងសណ្តែកជាដើម។
លោក លី វិសាល ប្រធានប្រតិបត្តិសម្ព័ន្ធសមាគមសហគ្រាសធុនតូច និងមធ្យមកម្ពុជាបាននិយាយថាការដាក់ចេញនូវគោលនយោបាយថ្មីៗរបស់រាជរដ្ឋាភិបាល ដើម្បីលើកទឹកចិត្តការវិនិយោគកាលពីដើមឆ្នាំ ២០១៨ នេះបានធ្វើឲ្យការវិនិយោគនៅកម្ពុជា កើនឡើងជាបន្តបន្ទាប់ ទោះបីជាឆ្នាំបោះឆ្នោតថ្នាក់ជាតិក៏ដោយ។ លោកបន្តថាស្ថានភាពនយោបាយក្នុងប្រទេសដែលមិនមានការប្រែប្រួលខ្លាំង កម្លាំងពលកម្មមានតម្លៃថោក និងការអនុគ្រោះពន្ធពីសហគមន៍អឺរ៉ុបជាហេតុផលចម្បងដែលធ្វើឲ្យការវិនិយោគនៅកម្ពុជាកើនឡើង។
លោកបានបន្តថាបញ្ហាជម្លោះផ្នែកពាណិជ្ជកម្មជាអន្តរជាតិរវាងមហាអំណាចសេដ្ឋកិច្ចពិភពលោក អាមេរិក និងចិនក៏នឹងអាចធ្វើឲ្យការវិនិយោគនៅកម្ពុជាកើនឡើងផងដែរ។
លោកបានថ្លែងថា៖ «ជម្លោះពាណិជ្ជកម្មរវាងមហាអំណាចសេដ្ឋកិច្ចអាមេរិក ជាមួយចិន និងសហភាពអឺរ៉ុប វាអាចជះឥទ្ធិពលវិជ្ជមានមកដល់កម្ពុជា ព្រោះបើប្រទេសទាំងនោះបង្កើនអត្រាពន្ធរវាងគ្នានឹងគ្នា វាអាចធ្វើឲ្យកម្ពុជាមានឱកាសកាន់តែច្រើននៅក្នុងការនាំចេញទំនិញរបស់ខ្លួនទៅកាន់ប្រទេសទាំងអស់នោះ»។
ទាក់ទងទៅនឹងស្ថានភាពនាពេលខាងមុខលោក វិសាល បានបញ្ជាក់ថា បើសិនក្រោយការបោះឆ្នោតមិនមានអ្វីប្រែប្រួលខ្លាំងនោះ ការវិនិយោគនៅកម្ពុជានឹងនៅតែបន្តកើនឡើងទៀត ហើយសហគមន៍អឺរ៉ុបក៏នឹងបន្តការអនុគ្រោះពន្ធគយសម្រាប់កម្ពុជាផងដែរ៕
