.jpg)
សកម្មភាពកម្មករកំពុងធ្វើការនៅក្នុងរោងចក្រកាត់ដេរសម្លៀកបំពាក់មួយនៅរាជធានីភ្នំពេញកន្លងមក។ រូបថត ភ្នំពេញ ប៉ុស្តិ៍
ភ្នំពេញៈ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងវិនិយោគចំនួន ៣ ដែលមានតម្លៃសរុប ៧ លានដុល្លារកាលពីសប្ដាហ៍មុន។
គម្រោងទាំងនេះត្រូវបានរំពឹងថានឹងបង្កើតការងារប្រហែល ១ ៨២០ នាក់។ នេះបើយោងតាមសេចក្តីប្រកាសរបស់ CDC។
គម្រោងវិនិយោគទាំង ៣ ដែល CDC បានអនុម័ត រួមមានការបង្កើតរោងចក្រកាត់ដេរ MIL United Manufacturing Co., Ltd ជាមួយនឹងទុនវិនិយោគ ២,៣ លានដុល្លារនៅស្រុកកណ្ដាលស្ទឹងខេត្តកណ្ដាល។
គម្រោងវិនិយោគរោងចក្រផលិតអំបោះរបស់ក្រុមហ៊ុន Jin Ming Li Jian One Co., Ltd ជាមួយនឹងទុនវិនិយោគ ២,៣ លានដុល្លារ នៅស្រុកគងពិសីខេត្តកំពង់ស្ពឺ និងគម្រោងវិនិយោគលើរោងចក្រកាត់ដេររបស់ក្រុមហ៊ុន Suzen (Cambodia) Industrial Co., Ltd ជាមួយនឹងទុនវិនិយោគ ២,៤ លានដុល្លារ នៅក្រុងសួង ខេត្តត្បូងឃ្មុំ។
លោក លឹម ហេង អនុប្រធានសភាពាណិជ្ជកម្មកម្ពុជាបានឲ្យដឹងថា កម្ពុជានៅតែរក្សាបានគម្រោងវិនិយោគបរទេស ដោយសារតែកំណើនសេដ្ឋកិច្ចរបស់ខ្លួនប្រហែល ៧ ភាគរយរយៈពេលជិត ១ ទសវត្សរ៍។
លោកថ្លែងថា៖ «ច្បាប់របស់ប្រទេសកម្ពុជាបានលើកទឹកចិត្តដល់ក្រុមវិនិយោគិនបរទេសកាន់តែច្រើន»។
របាយការណ៍ក្រសួងការងារ និងបណ្តុះបណ្តាលវិជ្ជាជីវៈបានឲ្យដឹងថា នៅពេលនេះមានរោងចក្រសរុប ១ ៧៣០ ដែលប្រតិបត្តិការនៅប្រទេសកម្ពុជា។
ក្នុងអំឡុង ៨ ខែដំបូងឆ្នាំមុន CDC បានអនុម័តគម្រោង ២២២ មានតម្លៃជាង ៦ ពាន់លានដុល្លារកើនឡើង ៨១ គម្រោងដែលមានតម្លៃ ១,៨៨ ពាន់លានដុល្លារក្នុងរយៈពេលដូចគ្នាកាលពីឆ្នាំ ២០១៨។
លោក សុក ចិនា្តសោភា អគ្គលេខាធិការ CDC បានឲ្យដឹងកាលពីខែមុនថា CDC បន្តទទួលបានពាក្យសុំគម្រោងថ្មីៗ ទោះបីជាបញ្ហាប្រឈមបច្ចុប្បន្នដល់សេដ្ឋកិច្ចក្នុងស្រុកក៏ដោយ ដូចជាការលុបចោលមួយផ្នែកនៃកិច្ចព្រមព្រៀងអនុគ្រោះពាណិជ្ជកម្មអ្វីៗគ្រប់យ៉ាងលើកលែងតែអាវុធនៅ (EBA) របស់សហភាពអឺរ៉ុបពីប្រទេសកម្ពុជា និងការរីករាលដាលកូវីដ ១៩ លើពិភពលោក។
លោកថ្លែងថា៖ «ទោះបីជាមានព័ត៌មានអាក្រក់ខ្លាំងបំផុតកាលពីខែមករា និងខែកុម្ភៈក៏ដោយ ក៏ការវិនិយោគនៅក្នុងប្រទេសនេះមិនបានធ្លាក់ចុះនោះទេ»។ លោកបានបន្តថា៖ «គម្រោងមួយចំនួនត្រូវបានផ្អាក ឬលុបចោល ប៉ុន្តែក្រុមវិនិយោគិនថ្មីៗបានចូលមក»៕LA
