.jpg)
ទិដ្ឋភាពកម្មករកំពុងអូសរទេះដឹកអីវ៉ាន់ចេញពីប្រទេសថៃចូលមកកម្ពុជានៅច្រកព្រំដែនអន្តរជាតិប៉ោយប៉ែតនាពេលកន្លងមក ។ រូបថត ភ្នំពេញ ប៉ុស្តិ៍
ភ្នំពេញៈ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តលើគម្រោងវិនិយោគមជ្ឈមណ្ឌលពាណិជ្ជកម្ម និងសណ្ឋាគារផ្កាយ ៤ លើកដំបូងនៅក្នុងក្រុងប៉ោយប៉ែត ដែលមានតម្លៃជាង ៦៨ លានដុល្លារ។ នេះបើតាមសេចក្តីប្រកាសរបស់ CDC។
គម្រោងដែលត្រូវបានវិនិយោគដោយក្រុមហ៊ុន Boonma Heng Co.,Ltd. នឹងសាងសង់សណ្ឋាគារលំដាប់ផ្កាយ ៤ ដែលមានចំនួន ៣៩២ បន្ទប់ និងមជ្ឈមណ្ឌលពាណិជ្ជកម្ម «ផ្សារទំនើប» ដែលមានទីតាំងនៅក្នុងភូមិក្បាលស្ពាន ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ដោយបង្កើតការងារបាន ៨៣៦ នាក់។
ភ្នំពេញ ប៉ុស្តិ៍ មិនអាចស្វែងរកគេហទំព័រផ្លូវការណាមួយរបស់ក្រុមហ៊ុន Boonma Heng Co.,Ltd. នៅលើ Google បានទេ ខណៈការស្វែងរកក្រុមហ៊ុននេះក្នុងការចុះបញ្ជីនៅក្រសួងពាណិជ្ជកម្មក៏មិនមានដែរ។
លោក សាន ស៊ានហូ អភិបាលក្រុងប៉ោយប៉ែតបានប្រាប់ភ្នំពេញ-ប៉ុស្តិ៍ កាលពីម្សិលមិញថា លោកមិនទាន់បានទទួលព័ត៌មានណាមួយពីគម្រោងនេះទេ ប៉ុន្តែលោកស្វាគមន៍ចំពោះគម្រោងអភិវឌ្ឍន៍ធំៗដែលបែរឆ្ពោះមកក្រុងប៉ោយប៉ែត។
លោកបន្តថាបច្ចុប្បន្នក្រុងប៉ោយប៉ែតមានសណ្ឋាគារទាំងតូច-ធំប្រហែល ៥០ និងផ្ទះសំណាក់ជាង ៣០។
លោកថ្លែងថា៖ «តែពេលនេះប៉ោយប៉ែតចាប់ផ្តើមប្រឈមនឹងកង្វះខាតកន្លែងស្នាក់នៅជាបណ្តើរៗហើយ ព្រោះគ្រាន់តែភ្ញៀវមកស្នាក់នៅ និងធ្វើការគឺមានចំនួនរហូតដល់ជាង ៣ ម៉ឺននាក់»។ លោកលើកឡើងថាបច្ចុប្បន្នតំបន់ដែលជាច្រកអន្តរជាតិដ៏សំខាន់មួយនេះកំពុងទទួលបាននូវការចាប់អារម្មណ៍យ៉ាងច្រើនពីអ្នកវិនិយោគ ពិសេសវិនិយោគិនចិន។
ក្រុងប៉ោយប៉ែតមានគម្រោងជាច្រើនកំពុងសាងសង់ និងត្រៀមសាងសង់ ដោយគម្រោងខ្លះអាចមានកម្ពស់ជាង ៣០ ជាន់។ ភាគច្រើននៃគម្រោងទាំងនោះគឺជាសណ្ឋាគារ និងអគារពាណិជ្ជកម្ម។ នេះបើតាមលោក សាន ស៊ានហូ។
លោកអះអាងថា៖ «ខ្ញុំគិតថារយៈពេល ៥ ឆ្នាំខាងមុខប៉ោយប៉ែតនឹងមានគម្រោងវិនិយោគ និងអគារខ្ពស់ៗយ៉ាងច្រើន»។
បច្ចុប្បន្នក្រុងប៉ោយប៉ែតមានតំបន់សេដ្ឋកិច្ចពិសេសចំនួន ៣ កំពុងដំណើរការ ខណៈ ២ ទៀតស្ថិតក្នុងដំណាក់កាលសាងសង់ហេដ្ឋារចនាសម្ព័ន្ធ។
របាយការណ៍ស្រាវជ្រាវរបស់ក្រុមហ៊ុន ស៊ីអិល រៀលធី កាលពីដើមឆ្នាំ ២០១៨ បង្ហាញថា តម្លៃដីក្នុងក្រុងប៉ោយប៉ែតមានតម្លៃចាប់ពី ១០០ ទៅ ១ ០០០ ដុល្លារ ក្នុង ១ ម៉ែត្រការ៉េ។
លោក ស៊ា ឆៃលីន អគ្គនាយកក្រុមហ៊ុនស៊ីអិលរៀលធី និយាយថាប៉ោយប៉ែត ជាច្រកទ្វារអន្តរជាតិដែលមានសក្តានុពលជាងគេរបស់កម្ពុជា ព្រោះច្រកនេះមានទាំងលំហូរភ្ញៀវទេសចរជាតិ និងអន្តរជាតិ ហើយសកម្មភាពនៃការធ្វើពាណិជ្ជកម្មក៏មានភាពមមាញឹក និងមានដង់ស៊ីតេប្រជាជនរស់នៅខ្ពស់ផងដែរ។
លោកថ្លែងថា៖ «ដោយសារលក្ខណៈអំណោយផលទាំងអស់នេះបានធ្វើឲ្យហាងឆេងដីនៅប៉ោយប៉ែតមានតម្លៃខ្ពស់ជាងតំបន់នៅតាមច្រកទ្វារអន្តរជាតិដទៃទៀតក្នុងប្រទេសកម្ពុជា»៕AL
