.jpg)
សកម្មភាពកម្មករកំពុងពិនិត្យមើលគុណភាពផលិតផលគ្រឿងផ្គុំអេឡិចត្រូនិក នៅក្នុងតំបន់សេដ្ឋកិច្ចពិសេសភ្នំពេញ។ ហុង មិនា
ភ្នំពេញ៖ ទោះជាការរីករាលដាលជំងឺកូវីដ ១៩ មិនទាន់ត្រូវបានទប់ស្កាត់ និងកំពុងបន្តការគំរាមកំហែងដល់កំណើនសេដ្ឋកិច្ចពិភពលោក និងក្នុងតំបន់ ក៏កម្ពុជានៅតែទទួលបានការវិនិយោគថ្មីៗពីក្រុមវិនិយោគិនក្នុងស្រុក និងបរទេស។
កំណើនសេដ្ឋកិច្ចកម្ពុជាត្រូវបានធនាគារពិភពលោកធ្វើការព្យាករថា នឹងមានធ្លាក់ចុះមកនៅត្រឹមចន្លោះពី -១ ភាគរយ និង -២,៩ ភាគរយ សម្រាប់ឆ្នាំ ២០២០ នេះ។
យោងតាមក្រុមប្រឹក្សាអភិវឌ្ឍន៍កម្ពុជាគ្រាន់តែក្នុងសប្ដាហ៍ទី១ ខែកក្កដា រដ្ឋាភិបាលបានអនុម័តគម្រោងថ្មីចំនួន ៣ មានទុនវិនិយោគរួម ១៤,៤ លានដុល្លារ ដែលអាចបង្កើតការងារថ្មីបានជាង ៦២៥ កន្លែង។
លោក លឹម ហេង អនុប្រធានសភាពាណិជ្ជកម្មកម្ពុជា បានប្រាប់ភ្នំពេញប៉ុស្ដិ៍កាលពីម្សិលមិញថា ទោះបីជំងឺកូវីដ ១៩ បង្កការប៉ះពាល់ដល់សេដ្ឋកិច្ចក៏ដោយក៏រដ្ឋាភិបាលនៅតែគោរពតាមគោលការណ៍បើកចំហការវិនិយោគ ដែលជាកត្តាជំរុញដ៏សំខាន់មួយ ដើម្បីទាក់ទាញការវិនិយោគ។
លោកថ្លែងថា៖ «ទោះយើងកំពុងប្រយុទ្ធនឹងការរីករាលដាលជំងឺកូវីដក៏យើងឃើញថា រដ្ឋាភិបាលកំពុងកែលម្អការធ្វើកំណែទម្រង់ផ្ទៃក្នុង ដើម្បីទាក់ទាញការវិនិយោគ ខណៈដែលប្រទេសរបស់យើងនៅតែទទួលបានភាពអនុគ្រោះពាណិជ្ជកម្មពីបណ្ដាប្រទេសអភិវឌ្ឍន៍»។
លោកលើកឡើងថា៖ «ក្នុងពេលឆាប់ៗខាងមុខ យើងនឹងសម្រេចបានកិច្ចព្រមព្រៀងពាណិជ្ជកម្មសេរីជាមួយប្រទេសចិន និងកូរ៉េខាងត្បូង ដែលនឹងក្លាយជាទីផ្សារធំសម្រាប់ទាក់ទាញក្រុមវិនិយោគិនឲ្យចូលមកប្រទេសយើង។
ជាមួយគ្នានេះ យើងឃើញថា រដ្ឋាភិបាលបានដាក់ចេញនូវវិធានការឆ្លើយតបមួយចំនួន ដើម្បីទប់ស្កាត់ហានិភ័យចំពោះសេដ្ឋកិច្ចផងដែរ»។ លោកបន្ថែមថា ការបើកដំណើរការឡើងវិញនៃទីផ្សារនៅអឺរ៉ុប និងអាមេរិកនាពេលថ្មីៗនេះ ក៏នឹងរួមចំណែក ដើម្បីការស្ទុះងើបឡើងវិញនៃសេដ្ឋកិច្ចរបស់កម្ពុជាផងដែរ។
កាលពីថ្ងៃទី ២៥ ខែឧសភា រដ្ឋាភិបាលបានអនុវត្តវិធានការលើកទឹកចិត្តជុំទី៤ តាមរយៈការបន្ធូរបន្ថយការអនុវត្តពន្ធកាត់ទុកសម្រាប់ធនាគារក្នុងស្រុក និងបរទេស ការបន្ទាបអត្រាពន្ធកាត់ទុកលើធនាគារ និងគ្រឹះស្ថានមីក្រូហិរញ្ញវត្ថុទាំងប្រភពខាងក្រៅ និងក្នុងស្រុកមកនៅត្រឹម ១០ ភាគរយ៕LA
