ទីស្នាក់ការក្រុមប្រឹក្សាអភិវឌ្ឍន៍កម្ពុជា CDC ដែលស្ថិតនៅក្បែរវត្តភ្នំ រាជធានីភ្នំពេញ។ រូបថត សហការី
ភ្នំពេញៈ គម្រោងវិនិយោគចំនួន ៥ ដែលមានតម្លៃសរុបជាង ១២១ លានដុល្លារ និងបង្កើតការងារបាន ១ ៣៣៤ កន្លែង ត្រូវបានក្រុមប្រឹក្សាអភិវឌ្ឍន៍កម្ពុជា (CDC) សម្រេចចុះបញ្ជីក្នុងសប្តាហ៍ទី ១ នៃខែធ្នូ ឆ្នាំ ២០២០។ នេះបើយោងតាមប្រព័ន្ធបណ្តាញសង្គមផ្លូវការរបស់ CDC។
បើយោងតាម CDC គម្រោងទាំង ៥ នោះរួមមាន គម្រោងបង្កើតរោងចក្រផលិតស្រាបៀររបស់ក្រុមហ៊ុន Inter-Mattrid Beverage (Cambodia) Co., Ltd មានទុនវិនិយោគចំនួន ៧៨ លានដុល្លារ បង្កើតការងារបាន ៥៥០ កន្លែង,គម្រោងបង្កើតរោងចក្រផលិតថ្នាំកសិកម្មក្រុមហ៊ុន Ruizexing Chemical Technology Co., Ltd មានទុនវិនិយោគ ២០,១ លានដុល្លារ បង្កើតការងារ ១៧៤ កន្លែង និងគម្រោងបង្កើតរោងចក្រផលិតផលិតផលពីប្លាស្ទិក (Preform, Cap, Bottle) របស់ក្រុមហ៊ុន Sing Fu Sun(Cambodia) Plastic Co., Ltd មានទុនវិនិយោគ ១១,៧ លានដុល្លារ និងបង្កើតការងារបាន ៥២ កន្លែង។ គម្រោងទាំង ៣ ខាងលើមានទីតាំងនៅស្រុកកៀនស្វាយ ខេត្តកណ្តាល។
ចំណែកគម្រោង ២ ទៀតមាន គម្រោងបង្កើតមជ្ឈមណ្ឌលពាណិជ្ជកម្មរបស់ក្រុមហ៊ុន Blissfull Capital Co., Ltd តាមផ្លូវជាតិលេខ ២ ក្នុងខណ្ឌមានជ័យ ក្រុងភ្នំពេញ មានទុនវិនិយោគ ៩,៥ លានដុល្លារ អាចបង្កើតការងារបាន ២០០ កន្លែង និងគម្រោងបង្កើតរោងចក្រផលិតសម្ភារពីក្រណាត់ សម្រាប់សត្វចិញ្ចឹម (ឆ្កែ និងឆ្មា) របស់ក្រុមហ៊ុន Chunteng Industrial (Cambodia) Co., Ltd នៅស្រុកគងពិសី ខេត្តកំពង់ស្ពឺ មានទុនវិនិយោគ ២,៦ លានដុល្លារ បង្កើតការងារ ៣៥៨ កន្លែង។
លោក លឹម ហេង អនុប្រធានសភាពាណិជ្ជកម្មកម្ពុជាបានប្រាប់ ភ្នំពេញ ប៉ុស្តិ៍ នាថ្ងៃអាទិត្យថា ទោះបីជាពិភពលោកកំពុងជួបនឹងវិបត្តិនៃការរីករាលដាលជំងឺកូវីដ ១៩ ក៏កម្ពុជានៅតែទទួលបានកំណើននៃការចូលមកបណ្តាក់ទុនជាបន្តបន្ទាប់។ កំណើននេះបង្ហាញថា អ្នកវិនិយោគសុទ្ធតែមានសុទិដ្ឋិនិយមចំពោះកំណើនសេដ្ឋកិច្ចកម្ពុជា ដែលកំពុងសម្រេចបាននូវកំណើនជាបន្តបន្ទាប់។
លោកនិយាយថា៖ «ក្រៅពីកំណើនសេដ្ឋកិច្ចនាពេលកន្លងមក កម្ពុជាក៏កំពុងសម្រេចបាននូវកិច្ចព្រមព្រៀងពាណិជ្ជកម្មសេរី (FTA) ជាបន្តបន្ទាប់ជាមួយ ប្រទេសដែលមានសេដ្ឋកិច្ចរីកចម្រើន ពិសេសប្រទេសចិនផងដែរ»។
ការទទួលបានកិច្ចព្រមព្រៀងសេរីជាមួយប្រទេសចិន ដែលជាទីផ្សារមានប្រជាជនច្រើនជាងគេលើពិភពលោក នឹងធ្វើឱ្យទំនិញផលិតនៅកម្ពុជាកាន់តែច្រើនមានឱកាសនាំទៅចិន ក្រោមលក្ខខណ្ឌពិសេស។
លោកលើកឡើងថា៖ «កាលពីពេលកន្លងមកមានការព្រួយបារម្ភជាច្រើនថា ការដកភាពអនុគ្រោះពន្ធ EBA ពីសហភាពអឺរ៉ុបនឹងធ្វើឱ្យការនាំចេញទំនិញរបស់កម្ពុជាជួបបញ្ហាច្រើន ប៉ុន្តែជាក់ស្តែងយើងឃើញថា វាមិនដូច្នេះទេ»។
ក្រៅពីគម្រោងទាំង ៥ ខាងលើកាលពីខែវិច្ឆិកា ក្រុមប្រឹក្សាអភិវឌ្ឍន៍កម្ពុជា ក៏បានសម្រេចចុះបញ្ជីឱ្យក្រុមហ៊ុនចំនួន ១២ ដែលមានទុនវិនិយោគសរុប ៥០,៦ លានដុល្លារ និងអាចបង្កើតការងារបាន ៧ ៤៦៨ កន្លែងផងដែរ៕ LA
