.jpg)
ទីស្នាក់ការនៃក្រុមប្រឹក្សាអភិវឌ្ឍន៍កម្ពុជា (CDC)។ ហេង ជីវ័ន
ភ្នំពេញៈ ក្រុមប្រឹក្សាអភិវឌ្ឍន៍កម្ពុជា (CDC) ក្នុងរយៈពេលតែ ៣ សប្តាហ៍ក្នុងខែមីនានេះ បានអនុម័តគម្រោងវិនិយោគចំនួន ៨ ដែលមានតម្លៃជាង ៦៩ លានដុល្លារ និងមានលទ្ធភាពបង្កើតការងារថ្មី ៥ ២៤៩ កន្លែង។ នេះបើតាមសេចក្តីប្រកាសព័ត៌មានរបស់ CDC។
គម្រោងទាំង ៨ នោះរួមមាន គម្រោងបង្កើតរោងចក្រផ្គុំដំឡើងសម្ភារអេទ្បិចត្រូនិក និងគ្រឿងបន្លាស់អេឡិចត្រូនិករបស់ក្រុមហ៊ុន Yuan Shuo (Cambodia) Co., Ltd មានទុនវិនិយោគ ២,២ លានដុល្លារនៅស្រុកត្រាំកក់ ខេត្តតាកែវ, គម្រោងបង្កើតរោងចក្រផ្គុំដំឡើងគ្រឿងអគ្គិសនីរបស់ក្រុមហ៊ុន Schneitic Chint Co., Ltd នៅស្រុកក្រគរ ខេត្តពោធិ៍សាត់ មានទុន ២,៥ លានដុល្លារ គម្រោងបង្កើតរោងចក្រកាត់ដេរសម្លៀកបំពាក់របស់ក្រុមហ៊ុន Xin Wei Jie Co., Ltd. នៅខណ្ឌសែនសុខ រាជធានីភ្នំពេញមានទុនវិនិយោគ ២,៩ លានដុល្លារ និងគម្រោងបង្កើតរោងចក្រផលិតថាមពលអគ្គិសនីពីពន្លឺព្រះអាទិត្យ អានុភាព 20MW របស់ក្រុមហ៊ុន Green Sustainable Ventures(Cambodia) Co., Ltd. នៅស្រុកស្វាយទាប ខេត្តស្វាយរៀងមានទុន ១៧,៦ លានដុល្លារ ។
ចំណែកគម្រោងផ្សេងទៀតមានគម្រោងបង្កើតវារីវប្បកម្មរបស់ក្រុមហ៊ុន First Aquatic Industrial Co., Ltd នៅស្រុកកៀនស្វាយ និងស្រុកកណ្តាលស្ទឹង ខេត្តកណ្តាល មានទុនវិនិយោគចំនួន ២៥,២ លានដុល្លារ គម្រោងបង្កើតរោងចក្រកាត់ដេរសម្លៀកបំពាក់វេជ្ជសាស្ត្រ និងផលិតសម្ភារបរិក្ខារវេជ្ជសាស្ត្រ របស់ក្រុមហ៊ុន Innomed Healthcare Products (Cambodia) Co., Ltd នៅតំបន់សេដ្ឋកិច្ចពិសេស ខេមបូឌាន ចេជាង ហ្គរ័ជី ខេត្តព្រះសីហនុ មានទុនវិនិយោគ ១០ លានដុល្លារ គម្រោងបង្កើតរោងចក្រផលិតគ្រឿងបង្គុំទោចក្រយាន និងគ្រឿងបំណែកទោចក្រយានក្រុមហ៊ុន Huiquanfeng Technology (Cambodia) Co., Ltd នៅតំបន់សេដ្ឋកិច្ចពិសេស តាយសេង បាវិត ខេត្តស្វាយរៀង មានទុនវិនិយោគ ៧ លានដុល្លារ និងគម្រោងវិនិយោគរោងចក្រកាត់ដេរសម្លៀកបំពាក់ក្រុមហ៊ុន Jiangyao (Cambodia) Garments Co., Ltd នៅសួនឧស្សាហកម្ម ស៊ូចូវ ខេមបូឌា ក្នុងក្រុងតាខ្មៅ ខេត្តកណ្តាល មានទុនវិនិយោគ ២,១ លានដុល្លារ។
លោក លឹម ហេង អនុប្រធានសភាពាណិជ្ជកម្មកម្ពុជាបានប្រាប់ឱ្យដឹងថា ទោះក្នុងអំឡុងកូវីដ ១៩ កំពុងឆ្លងរាលដាល ក៏ការដាក់ពាក្យស្នើសុំវិនិយោគនៅ CDC មិនបានធ្លាក់ចុះទេ ហើយគម្រោងដែលអនុម័តកន្លងមក គឺមានគ្រប់វិស័យទាំងវាយនភណ្ឌ សំណង់ អគ្គិសនី និងការផលិតគ្រឿងបង្គុំអេឡិចត្រូនិក ជាដើម។
ការទទួលបានចំណាប់អារម្មណ៍ពីបរទេសក្នុងការចូលមកបណ្តាក់ទុននៅកម្ពុជា វាអាចមកពីកត្តាសំខាន់ៗមួយចំនួនដូចជា ជម្លោះពាណិជ្ជកម្មរវាងប្រទេសមហាអំណាចចិន អាមេរិក ច្បាប់វិនិយោគកម្ពុជាមានលក្ខណៈអំណោយផល ការអភិវឌ្ឍប្រព័ន្ធហេដ្ឋារចនាសម្ព័ន្ធផ្លូវថ្នល់ និងការបង្កើតកិច្ចព្រមព្រៀងពាណិជ្ជកម្មជាមួយនឹងប្រទេសចិន ជាដើម។
លោកថ្លែងថា៖ «គ្រប់ការវិនិយោគនឹងផ្តល់កំណើនសេដ្ឋកិច្ចមួយកាន់តែរឹងមាំ»។
បន្ទាប់ពីបានចុះហត្ថលេខាលើកិច្ចព្រមព្រៀងពាណិជ្ជកម្មសេរី (FTA) ជាមួយប្រទេសចិន បច្ចុប្បន្នការចរចាជាមួយនឹងកូរ៉េខាងត្បូងក៏បានបញ្ចប់រួចរាល់ហើយដែរ។ ក្រៅពីប្រទេសកូរ៉េ កម្ពុជាក៏កំពុងចរចាបង្កើត FTA ជាមួយបណ្តាប្រទេសមួយចំនួនដូចជា រុស្ស៊ី អាមេរិក អង់គ្លេស ជប៉ុន ម៉ុងហ្គោលី ឥណ្ឌា និង EAEU (សហព័ន្ធសេដ្ឋកិច្ចដែលមាន ៥ ប្រទេសរួមមាន រុស្ស៊ី អាមេនី បេឡារុស កាហ្សាក់ស្ថាន និងកៀហ្ស៊ីស៊ីស្ថាន» ផងដែរ។
អ្នកស្រាវជ្រាវសេដ្ឋកិច្ចអន្តរជាតិនៃវិទ្យាស្ថានទំនាក់ទំនងអន្តរជាតិនៃកម្ពុជា (រាជបណ្ឌិត្យសភាកម្ពុជា) លោក ហុង វណ្ណៈ បានប្រាប់ ភ្នំពេញ ប៉ុស្តិ៍ កាលពីថ្ងៃទី ២១ ខែមីនា ថា នេះជាសញ្ញាល្អដែលបង្ហាញពីការងើបឡើងវិញជាបណ្តើរៗរបស់សេដ្ឋកិច្ចកម្ពុជា ខណៈកំណើននេះនឹងមានសម្ទុះកាន់តែខ្លាំងនៅពេលការឆ្លងរាលដាលជំងឺកូវីដ ១៩ ត្រូវបានបញ្ចប់ស្របពេលរដ្ឋាភិបាលកម្ពុជាបាននិងកំពុងផ្តោតការយកចិត្តទុកដាក់លើយុទ្ធនាការចាក់វ៉ាក់សាំងឱ្យប្រជាពលរដ្ឋ។ លោកបន្តថា គម្រោងដែល CDC អនុម័តទាំងនេះគឺមិនមែនទើបតែដាក់ពាក្យស្នើសុំក្នុងពេលថ្មីៗនេះទេ ដោយអាចដាក់ពាក្យតាំងពីមុនឆ្នាំ ២០២១ មកម្ល៉េះ។
ទោះយ៉ាងណាលោកបញ្ជាក់ថា៖ «នេះជាការវិវត្តជាវិជ្ជមានសម្រាប់កំណើនសេដ្ឋកិច្ចកម្ពុជា ខណៈសេដ្ឋកិច្ចពិភពលោក និងវិស័យទេសចរណ៍ក៏ចាប់ផ្តើមមានដំណើរការឡើងវិញជាបណ្តើរៗហើយ។ ការអនុម័តគម្រោងវិនិយោគរបស់ CDC នឹងបង្កើតការងារជាច្រើនដល់ប្រជាជនក្នុងស្រុក»។
ជាមួយគ្នានេះលោកក៏ចាប់អារម្មណ៍ថានៅរយៈពេលចុងក្រោយនេះ ការអនុម័តរបស់ CDC លើគម្រោងវិនិយោគថាមពលអគ្គិសនីក៏មានជាបន្តបន្ទាប់ផងដែរ។ លោកពន្យល់ថា កំណើននៃការវិនិយោគលើថាមពលអគ្គិសនី និងគ្រឿងបង្គុំអគ្គិសនីបង្ហាញថា កម្ពុជានឹងមានសក្តានុពលខ្លាំងសម្រាប់ការចូលមកបណ្តាក់ទុន។
លោកនិយាយថា៖ «តម្លៃអគ្គិសនីថោក ច្បាប់វិនិយោគល្អ និងហេដ្ឋារចនាសម្ព័ន្ធល្អនឹងក្លាយជាសក្តានុពលរបស់កម្ពុជាក្នុងការទាក់ទាញឱ្យមានការមកវិនិយោគផ្ទាល់ពីបរទេសនៅកម្ពុជា»។
កាលពីខែកុម្ភៈ CDC បានអនុម័តគម្រោងវិនិយោគចំនួន ១៦ ដែលមានទុន ៧០២,៥ លានដុល្លារ និងបង្កើតការងារ ១១ ៤១៤ កន្លែង៕ LA
