.jpg)
ភ្នំពេញៈ រដ្ឋាភិបាលកាលពីថ្ងៃអង្គារបានយល់ព្រមឲ្យក្រុមហ៊ុន HK Burltex Manufactory Co., Ltd សាងសង់រោងចក្រផលិតកាបូប និងម៉ាស់មុខគ្រប់ប្រភេទ។ នេះបើយោងតាមសេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា (CDC)។
CDC បានឲ្យដឹងថា ខ្លួនបានផ្ដល់ការយល់ព្រមដល់ក្រុមហ៊ុន HK Burltex Manufactory Co., Ltd ដើម្បីសាងសង់រោងចក្រផលិតកាបូប និងម៉ាស់មុខគ្រប់ប្រភេទជាមួយនឹងទុនវិនិយោគចំនួន ៣,១ លានដុល្លារមានទីតាំងនៅតំបន់សេដ្ឋកិច្ចពិសេស Vattanak Industrial Zone II តាមបណ្ដោយផ្លូវជាតិលេខ ៣ ជាយក្រុងភ្នំពេញហើយរោងចក្រនេះនឹងស្រូបយកការងារប្រហែល ៩១៥ នាក់។
លោក លឹម ហេង អនុប្រធានសភាពាណិជ្ជកម្មកម្ពុជាបានស្វាគមន៍ការវិនិយោគថ្មីនេះ ខណៈពិភពលោកកំពុងប្រឈមនឹងកង្វះការផ្គត់ផ្គង់វេជ្ជសាស្ដ្រ ពិសេសម៉ាស់មុខ ដើម្បីការពារការរីករាលដាលជំងឺកូវីដ១៩។
លោកថ្លែងថា៖ «ពិតហើយការវិនិយោគមិនមានបំណងគ្រាន់នៅក្នុងអំឡុងការរីករាលដាលនេះទេ ខណៈពួកគេបានដាក់ពាក្យសុំរយៈពេល ២-៣ ខែកន្លងមកហើយ ហើយខ្ញុំគិតថាការវិនិយោគនេះនឹងត្រូវការពេលវេលាប្រហែលជាច្រើនខែសម្រាប់ការសាងសង់រោងចក្រនេះ ទោះយ៉ាងណាវានៅតែបង្ហាញចំណុចវិជ្ជមានថា ពួកគេអាចមានលទ្ធភាពក្នុងការផលិតការផ្គត់ផ្គង់ផ្នែកវេជ្ជសាស្ដ្រមិនកាន់តែច្រើននៅទីផ្សារក្នុងស្រុកប៉ុណ្ណោះ ហើយក៏នឹងនាំចេញទៅពិភពលោកដែលកំពុងប្រយុទ្ធប្រឆាំងនឹងជំងឺកូវីដ ១៩ ផងដែរ»។
លោកនាយករដ្ឋមន្ដ្រី ហ៊ុន សែន កាលពីថ្ងៃពុធក៏បានគំរាមថានឹងបិទឱសថស្ថានដែលលក់ដំឡើងថ្លៃលើសទីផ្សារនូវសម្ភារវេជ្ជសាស្ដ្រគ្រប់ប្រភេទ ជាពិសេសម៉ាស់មុខក្នុងអំឡុងជំងឺកូវីដ១៩។
លោកថ្លែងថា៖ «ខ្ញុំកំពុងធ្វើការសិក្សាមួយអំពីម៉ាស់មុខដែលត្រូវបានលក់នៅទីផ្សារនៅពេលនេះ។ ប្រសិនបើអ្នកនៅតែបន្តបង្កើនតម្លៃ យើងនឹងរឹបអូស និងថែមទាំងបិទហាងឱសថស្ថាននោះជារៀងរហូត។ អ្នកគួរតែទម្លាក់តម្លៃ ពេលដែលរដ្ឋាភិបាលមិនទាន់ប្រើប្រាស់កណ្ដាប់ដៃដែក»។
លោកបានបន្ថែមថា លោកបានផ្ដល់យោបល់ដល់ប្រជាជន និងក្រសួងសុខាភិបាលឲ្យជូនដំណឹងដល់រូបលោកនៅក្នុងទំព័រ Facebook របស់លោក ប្រសិនបើនរណាម្នាក់លក់តម្លៃខ្ពស់។ លោក លឹម ហេង គាំទ្រគំនិតផ្តួចផ្ដើមរបស់លោកនាយករដ្ឋមន្ដ្រីដោយសារតែប្រជាជនត្រូវបង្ខំចិត្តទិញម៉ាស់មុខក្នុងតម្លៃខ្ពស់។
លោកលើកឡើងថា៖ «វិស័យឯកជនគាំទ្រវិធានការរបស់លោកនាយករដ្ឋមន្ដ្រីប្រឆាំងរាល់ប្រជាជន ឬហាងលក់ណាមួយដែលលក់ម៉ាស់មុខលើសពីតម្លៃទីផ្សារ ខណៈប្រជាជនរបស់យើងមិនមានលទ្ធភាពទិញបាន ក្នុងអំឡុងពេលវេលាដ៏ពិបាកដោយសារតែការរីករាលដាលជំងឺកូវីដ១៩»៕LA
