.jpg)
ភ្នំពេញ៖ ប្រធានក្រុមហ៊ុន Royal Group ដែលជាក្រុមហ៊ុនមេរបស់ Cellcard ជាប្រតិបត្តិករទូរស័ព្ទចល័តឈានមុខគេបានឱ្យដឹងថា ក្រុមហ៊ុនលោកត្រៀមខ្លួនរួចរាល់ក្នុងការដាក់ឱ្យដំណើរការប្រព័ន្ធ 5G ដែលជាវិធានការមួយរួមចំណែកដល់ចក្ខុវិស័យរបស់រដ្ឋាភិបាលសម្រាប់បដិវត្តន៍ឧស្សាហកម្មទី៤ និងការផ្លាស់ប្តូរប្រទេសនេះទៅជាសេដ្ឋកិច្ចឌីជីថលនាពេលខាងមុខ។
ការប្ដេជ្ញាចិត្តនេះត្រូវបានធ្វើឡើងក្នុងអំឡុងដំណើរទស្សនកិច្ចរបស់លោក ហ៊ុន ម៉ាណែត អគ្គមេបញ្ជាការរងនៃកងយោធពលខេរភូមិន្ទ និងក្រុមគណៈប្រតិភូរបស់លោក ក្នុងការពិភាក្សាការត្រៀមខ្លួនរួចរាល់សម្រាប់ប្រព័ន្ធ 5G។
អ្នកឧកញ៉ា គិត ម៉េង ប្រធានក្រុមហ៊ុន Royal Group បានឱ្យដឹងថា ប្រព័ន្ធ 5G គឺជាជំហានដ៏ធំមួយឆ្ពោះទៅមុខក្នុងការជំរុញសេដ្ឋកិច្ចកម្ពុជា ហើយកម្ពុជាត្រូវតែត្រៀមខ្លួនរួចរាល់ ដើម្បីចាប់យកបច្ចេកវិទ្យានេះ និងធានាថា បច្ចេកវិទ្យានេះជំរុញការអភិវឌ្ឍសេដ្ឋកិច្ច និងពង្រឹងឧស្សាហកម្មក្នុងស្រុក និងការរស់នៅរបស់ប្រជាជន។
លោកថ្លែងថា៖ «យើងចង់ឱ្យប្រទេសកម្ពុជា ក្លាយជាប្រទេសដែលមានប្រព័ន្ធ 5G ដ៏ឈានមុខគេមួយនៅអាស៊ាន និងសម្រាប់ក្រុមហ៊ុនទាំងធំទាំងតូចនៅកម្ពុជា ដើម្បីក្លាយជាអ្នកប្រើប្រាស់បច្ចេកវិទ្យានេះមុនគេ»។
លោកថា ក្នុងនាមជាក្រុមហ៊ុនដែលគ្រប់គ្រងដោយវិនិយោគិនកម្ពុជាតែមួយគត់ក្នុងចំណោមក្រុមហ៊ុនជាច្រើន ក្រុមហ៊ុន Royal Group បានប្តេជ្ញាគាំទ្រដល់រាជរដ្ឋាភិបាល និងដល់សន្ដិសុខ និងស្ថិរភាពសេដ្ឋកិច្ចជាតិ។
Cellcard បានដំណើរការ 5G សាកល្បងចាប់តាំងពីខែ តុលា ឆ្នាំ ២០១៩ ហើយនៅពេលនេះឈានដល់ល្បឿនដល់ជាង ១,៨ Gbps ដែលជាល្បឿនលឿនបំផុតសម្រេចបាននៅប្រទេសកម្ពុជា៕ LA
