.jpg)
ភ្នំពេញ: ក្រុមហ៊ុន Century Entertainment International Holdings បានប្រកាសថា ខ្លួននឹងផ្លាស់ប្តូរទីតាំងនៅខេត្តព្រះសីហនុទៅទីតាំងថ្មីគឺនៅតារាសាគរក្នុងខេត្តកោះកុង។
យោងតាមសេចក្ដីប្រកាសដែលបានយល់ព្រមដោយលោក Ng Man Sun ជាប្រធាន និងជាអគ្គនាយក Lion King ដែលជាក្រុមហ៊ុនបុត្រសម្ព័ន្ធគ្រប់គ្រងទាំងស្រុងដោយក្រុមហ៊ុន Cheung Shing Global Travel Entertainment Limited (CSG) បានសម្រេចចិត្តក្នុងការផ្លាស់ប្តូរប្រតិបត្តិការកាស៊ីណូនេះពីទីតាំងចាស់របស់ខ្លួននៅសណ្ឋាគារ Sunshine Bay Hotel ដែលបានបញ្ចប់កិច្ចព្រមព្រៀងកាលពីថ្ងៃទី ១ ខែតុលា ឆ្នាំ ២០២០ ទៅទីតាំងថ្មីនៅអគាររបស់ Long Bay មហាវិថី សាយភូថង ស្រុកតារាសាគរ ខេត្តកោះកុង។
សេចក្ដីប្រកាសនេះបានឱ្យដឹងកាលពីថ្ងៃទី ៣០ ខែកញ្ញា ឆ្នាំ ២០២០ ថា ក្រុមហ៊ុន CSG បានធ្វើកិច្ចព្រមព្រៀងជួល និងប្រតិបត្តិការកាស៊ីណូជាមួយក្រុមហ៊ុន LongBay Entertainment Co., Ltd ដែលជាម្ចាស់ដីនៅតារាសាគរ គិតចាប់ពីថ្ងៃទី ១ ខែតុលា ឆ្នាំ ២០២០ ដល់ថ្ងៃទី ៣០ ខែកញ្ញា ឆ្នាំ ២០៣៥។
ក្រុមហ៊ុនថា៖ «ស្រុកតារាសាគរ ខេត្តកោះកុងគឺជាស្រុកដែលមានការអភិវឌ្ឍដ៏លឿនបំផុតនៅក្នុងប្រទេសកម្ពុជា និងជាទិសដៅទេសចរណ៍ដ៏ល្បីមួយនៅអាស៊ីអាគ្នេយ៍។ ទីតាំងថ្មីក៏អមទៅដោយរមណីយដ្ឋាន សណ្ឋាគារប្រណីត និងទីលានវាយកូនហ្គោល»។
ក្រុមហ៊ុនបន្តថា៖ «ក្រៅពីនេះនៅទីនោះក៏មានព្រលានយន្តហោះអន្តរជាតិថ្មីមួយដែលអាចឱ្យយន្តហោះធំៗចុះចត និងចេញដំណើរបាន។ ព្រលានយន្តហោះនេះត្រូវបានរំពឹងថា នៅដំណាក់កាលទី ១ ដែលគ្រោងនឹងបញ្ចប់មុនដំណាច់ឆ្នាំនេះ»។
បច្ចុប្បន្នក្រុមហ៊ុន Lion King កំពុងបន្តការងារផែនការសាងសង់ និងដំឡើងឧបករណ៍នានាសម្រាប់កាស៊ីណូនេះដែលត្រូវបានគ្រោងទុកជាបឋមថា នឹងមានស្លុតម៉ាស៊ីនចំនួន ៨០ គ្រឿង តុលេងល្បែងទូទៅចំនួន ៤០ និងតុល្បែងវីអាយភីចំនួន ៥៥ រួមជាមួយនឹងភោជនីយដ្ឋានបែបចិនស្ប៉ា និងក្លិបរាត្រី។ កាស៊ីណូនេះត្រូវបានរំពឹងថា នឹងចាប់ផ្ដើមបើកដំណើរការឡើងវិញនៅថ្ងៃទី ៣១ ខែមករា ឆ្នាំ ២០២១។
គិតត្រឹមថ្ងៃទី ២៧ ខែកញ្ញា មានកាស៊ីណូ ៨ បើកដំណើរការឡើងវិញនៅក្រុងព្រះសីហនុ និង ២ ផ្សេងទៀតនៅទីក្រុងភ្នំពេញ និងក្រុងប៉ោយប៉ែត ខេត្តបន្ទាយមានជ័យ ហើយកាស៊ីណូផ្សេងទៀតនឹងអនុវត្តតាមដូចជានៅក្រុងបាវិត ខេត្ត ស្វាយរៀងជាដើម។ បច្ចុប្បន្នប្រទេសកម្ពុជាមានកាស៊ីណូជាង ១០០។ នេះបើយោងតាមទិន្នន័យបានពីក្រសួងសេដ្ឋកិច្ច និងហិរញ្ញវត្ថុ៕ LA
