.jpg)
ទីលានវាយកូនហ្គោល នៅក្នុងតំបន់ទេសចរណ៍ឈ្មោះ «តារាសាគរ» នៅខេត្ត កោះកុង។ ភ្នំពេញ ប៉ុស្តិ៍
ភ្នំពេញៈ ក្រុមហ៊ុន Century Entertainment International Holdings ដែលមានមូលដ្ឋាននៅទីក្រុងហុងកុងបានប្រកាសថា ខ្លួននឹងពន្យារពេលបើកដំណើរការកាស៊ីណូថ្មីនៅរមណីយដ្ឋានតារាសាគរដែលគ្រប់គ្រងដោយវិនិយោគិនជនជាតិចិននៅក្នុងខេត្តកោះកុងរហូតដល់ខែមេសា ដោយសារតែការបារម្ភពីការរីករាលដាលជំងឺកូវីដ ១៩ នៅក្នុងព្រឹត្តិការណ៍សហគមន៍ ២០ កុម្ភៈ។
គិតត្រឹមថ្ងៃទី ១ ខែមេសា ប្រទេសកម្ពុជា បានរាយការណ៍ករណីឆ្លងជំងឺកូវីដ១៩ ថ្មីចំនួន ៣៧ នាក់ ដោយក្នុងចំណោមនោះ ៣៥ នាក់ ជាប់ទាក់ទងនឹងព្រឹត្តិការណ៍សហគមន៍ ២០ កុម្ភៈ។ មកដល់ពេលនេះកម្ពុជាបានបញ្ជាក់ករណីជំងឺកូវីដ ១៩ ចំនួន ២ ៤៧៧ នាក់អ្នកជំងឺជាសះស្បើយ ១ ២៤០ នាក់ និងស្លាប់ ១៦ នាក់។ នេះបើតាមសេចក្ដីប្រកាសព័ត៌មានរបស់ក្រសួងសុខាភិបាល។
ក្រុមហ៊ុន Century Entertainment បានសម្រេចផ្លាស់ប្តូរអាជីវកម្មតុលេងល្បែងរបស់ខ្លួនមកទីតាំងថ្មីពីសណ្ឋាគារ Sunshine Bay នៅក្រុងព្រះសីហនុទៅទីតាំងថ្មីប្រកបដោយសក្ដានុពលនៅអគារលេខ ៨៩ Long Bay មហាវិថីសាយ ប៊ូថង ស្រុកតារាសាគរ ខេត្តកោះកុង ហើយគ្រោងនឹងបើកប្រតិបត្តិការកាលពីខែកុម្ភៈ។
ឯកសាររបស់ក្រុមហ៊ុនកាលពីថ្ងៃទី ៣១ ខែមីនា ផ្ញើទៅផ្សារភាគហ៊ុននៅហុងកុង ឱ្យដឹងថា ក្រុមហ៊ុនបានជូនដំណឹងដោយផ្ទាល់ថា ក្រុមហ៊ុនសម្រេចចិត្តក្នុងការពន្យារពេលការងារត្រៀមរៀបចំបើកដំណើរការឡើងវិញរបស់កាស៊ីណូនេះ (ដែលរួមទាំងផ្នែកអ្នកលេងល្បែងទូទៅ) ដោយសារការរីករាលដាលជំងឺកូវីដ ១៩ ក្នុងព្រឹត្តិការណ៍សហគមន៍ ២០ កុម្ភៈ។ ក្រុមហ៊ុនកន្លងមករំពឹងថា អាចត្រូវបើកដំណើរការឡើងវិញត្រឹមខែមីនាឆ្នាំ ២០២១។
ជាអកុសលការផ្ទុះឡើងការរីករាលដាលជំងឺកូវីដ ១៩ នៅក្នុងព្រឹត្តិការណ៍សហគមន៍នៅកម្ពុជាចាប់តាំងពីថ្ងៃទី ២០ ខែ កុម្ភៈ ឆ្នាំ ២០២១ បានបន្តរារាំងដល់សកម្មភាពរបស់ក្រុមហ៊ុននៅក្នុងប្រទេសកម្ពុជា។ ដូចកាលបរិច្ឆេទក្នុងសេចក្ដីប្រកាសនេះ វិធានការបិទប្រទេសមួយចំនួនត្រូវបានធ្វើនៅតំបន់មួយចំនួនក្នុងប្រទេសកម្ពុជា ដើម្បីដោះស្រាយព្រឹត្តិការណ៍សហគមន៍ ២០ កុម្ភៈ។ នេះបើយោងតាមក្រុមហ៊ុន។
ឯកសារដែលចុះហត្ថលេខាដោយលោក Ng Man Sun ប្រធាននាយកប្រតិបត្តិក្រុមហ៊ុនឱ្យដឹងថា៖ «ក្រុមហ៊ុនបានផ្ដល់ការពន្យល់ថា ការតុបតែងរៀបចំចាំបាច់ និងការដំឡើងឧបករណ៍នានាត្រូវបានបញ្ចប់សម្រាប់តុលេងល្បែងថ្មី ប៉ុន្តែរង់ចាំការធ្វើតេស្ដប្រព័ន្ធ និងការផ្ដល់ការបណ្ដុះបណ្ដាលដល់បុគ្គលិកកាស៊ីណូ»។
ឯកសារនេះបន្ថែមថា៖ «ក្នុងទិដ្ឋភាពនៃវិធានការបិទប្រទេសដ៏តឹងរ៉ឹងដែលដាក់ដើម្បីដោះស្រាយព្រឹត្តិការណ៍សហគមន៍ ២០ កុម្ភៈ ក្រុមហ៊ុនជឿថា ព្រឹត្តិការណ៍សហគមន៍ ២០ កុម្ភៈ នឹងមិនមានរយៈពេលវែងពេកនោះទេ ហើយជាកម្មវត្ថុចំពោះការវិវត្តនៃព្រឹត្តិការណ៍សហគមន៍ ២០ កុម្ភៈ កាស៊ីណូថ្មីនេះនឹងខិតខំដើម្បីបើកដំណើរការឡើងវិញនៅ ឬមុនដំណាច់ខែមេសា ឆ្នាំ ២០២១»។
យោងតាមក្រសួងសេដ្ឋកិច្ច និងហិរញ្ញវត្ថុពន្ធដែលប្រមូលបានពីឧស្សាហកម្មនេះបានធ្លាក់ចុះជាងពាក់កណ្ដាលមកនៅត្រឹម ៤០ លានដុល្លារ កាលពីឆ្នាំ ២០២០ ធៀបនឹង ៨៥ លានដុល្លារដែលបានកត់ត្រាកាលពីឆ្នាំ ២០១៩។ បើតាមក្រសួងប្រតិបត្តិករកាស៊ីណូចំនួន ១០១ នៅប្រទេសកម្ពុជា បានដាក់ពាក្យសុំបន្តសុពលភាពអាជ្ញាប័ណ្ណរបស់ពួកគេរហូតមកដល់ថ្ងៃនេះ ក្នុងចំណោមសរុប ១៩៣ ដែលបានចុះបញ្ជីកាលពីចុងឆ្នាំមុន៕ LA
