.jpg)
ភ្នំពេញ: គណៈកម្មការមូលបត្រកម្ពុជា (SECC) បានផ្តល់អាជ្ញាប័ណ្ណ ចែកចាយលក់ ទិញត្រឡប់មកវិញ ឬទូទាត់សងឯកតាមូលនិធិ (Fund Distribution) ដល់ក្រុមហ៊ុន CEO Master Club Investment Plc។
ការផ្ដល់អាជ្ញាប័ណ្ណនេះធ្វើឡើងក្នុងពិធីសម្ពោធទីតាំងក្រុមហ៊ុន និងការិយាល័យផ្លូវការរបស់ខ្លួនកាលពីថ្ងៃចន្ទ។
អាជ្ញាប័ណ្ណចែកចាយលក់ ទិញត្រឡប់មកវិញអនុញ្ញាតឲ្យក្រុមហ៊ុនមានសិទ្ធិក្នុងការសហការជាមួយក្រុមហ៊ុនគ្រប់គ្រងមូលនិធិផ្សេងទៀត ដើម្បីកៀរគរទុនវិនិយោគពីសាធារណៈ និងបង្កើតផលប្រយោជន៍ប្រាក់ចំណេញដល់អ្នកវិនិយោគសាធារណៈប្រកបដោយវិជ្ជាជីវៈទំនុកចិត្ត និងតម្លាភាព។
លោក អោម សេងបូរ៉ា ស្ថាបនិក និងប្រធានក្រុមប្រឹក្សាភិបាលរបស់ក្រុមហ៊ុន CEO MASTER CLUB មានប្រសាសន៍ថា ក្រុមហ៊ុនរបស់លោកបានត្រៀមរួចជាស្រេចក្នុងការធ្វើការសហការជាមួយសហគ្រិនដែលត្រូវការទុនវិនិយោគ ដើម្បីពង្រីកអាជីវកម្ម និងចង់បានប្រាក់ចំណេញឲ្យបានឆាប់រហ័ស។
លោកថ្លែងថា៖ «ចំពោះអ្នកវិនិយោគសក្តានុពលទាំងឡាយដែលចង់ទទួលបានប្រាក់ចំណេញពីការវិនិយោគរបស់ខ្លួនដោយមិនចាំបាច់ប្រឈមនឹងការលំបាក ភាពស្មុគស្មាញ ក៏ដូចជាភាពនឿយហត់ក្នុងការដឹកនាំគ្រប់គ្រងអាជីវកម្មដោយខ្លួនឯងនោះទេ»។
លោកបន្តថា ក្រុមហ៊ុនវិនិយោគក្នុងស្រុកបានរួមចំណែកបង្កើតប្រាក់ចំណូល ប្រាក់ចំណេញជាច្រើនដល់អ្នកពាក់ព័ន្ធទាំងអស់ និងជួយជំរុញឲ្យមានការបង្កើតផលិតផលសេវាកម្មថ្មីៗការបង្កើតការងារ និងប្រាក់ចំណូលជូនប្រជាពលរដ្ឋ និងការបង់ពន្ធចំណូលជូនរដ្ឋាភិបាលបានកាន់តែច្រើន និងយូរអង្វែងថែមទៀតផង។
លោកបានបញ្ជាក់ថា៖ «ភាពរឹងមាំរបស់ក្រុមហ៊ុនវិនិយោគក្នុងស្រុកដែលមានវិជ្ជាជីវៈច្បាស់លាស់មានភាពត្រឹមត្រូវស្របច្បាប់ ប្រកបដោយទំនុកចិត្ត និងតម្លាភាពពិតប្រាកដ ជាម៉ាស៊ីនជំរុញសេដ្ឋកិច្ចមួយដ៏សំខាន់ និងរឹងមាំសម្រាប់ប្រទេសជាតិ»។
SECC ក៏បានផ្តល់អាជ្ញាប័ណ្ណក្រុមហ៊ុនគ្រប់គ្រងមូលនិធិឲ្យក្រុមហ៊ុន CEO Master Club Investment Plc កាលពីខែកញ្ញា ឆ្នាំ ២០១៩។
កាលពីខែមុន SECC បានផ្តល់អាជ្ញាប័ណ្ណឲ្យក្រុមហ៊ុនគ្រប់គ្រងមូលនិធិចំនួន ២ បន្ថែមទៀតគឺ ក្រុមហ៊ុន Fund Management Plc និងក្រុមហ៊ុន PLMP Venture Capital Co., Ltd ហើយ SECC ក៏បានផ្តល់អាជ្ញាប័ណ្ណឲ្យក្រុមហ៊ុនថែរក្សាទ្រព្យសម្បត្តិជំនួសចំនួន ៣ ផងដែរ។ គិតត្រឹមឆ្នាំ ២០១៩ មានការកើនឡើងយ៉ាងខ្លាំងនៃអ្នកចូលរួមក្នុងទីផ្សារនេះរួមមាន សមភាគីកណ្តាលចំនួន ៥ ក្រុមហ៊ុនសម្រាប់ទីផ្សារឧបករណ៍និស្សន្ទ ក្រុមហ៊ុនជើងសាឧបករណ៍និស្សន្ទ ២៧ ក្រុមហ៊ុនគ្រប់គ្រងមូលនិធិ ៧ និងក្រុមហ៊ុនធានាទុកទ្រព្យ ៨ រួចហើយដោយ SECC៕
