ភ្នំពេញៈ រដ្ឋាភិបាលកម្ពុជាស្វាគមន៍ចំពោះផែនការពង្រីកអាជីវកម្មរបស់ក្រុមហ៊ុន Chevron (Cambodia) Limited ដែលជាបុត្រសម្ព័ន្ធរបស់ក្រុមហ៊ុនសាជីវកម្ម Chevron មានមូលដ្ឋាននៅអាមេរិកក្នុងការបង្កើនស្ថានីយប្រេងឥន្ធនៈឱ្យបាន ១០០ ទីតាំងនៅទូទាំងប្រទេសកម្ពុជា។
លោក ជៀប សួ អគ្គនាយកនៃអគ្គនាយកដ្ឋានប្រេងកាតនៃក្រសួងរ៉ែ និងថាមពលបានប្រាប់ ភ្នំពេញ ប៉ុស្តិ៍ កាលពីថ្ងៃទី ២៨ ខែកុម្ភៈថា ក្នុងជំនួបរវាង លោក ស៊ុយ សែម រដ្ឋមន្ត្រីក្រសួងរ៉ែ និងថាមពលជាមួយលោក Pongtorn Tangma-nuswong ប្រធានក្រុមហ៊ុន Chevron ប្រចាំប្រទេសកម្ពុជា កាលពីថ្ងៃទី ២៣ ខែកុម្ភៈ ក្រុមហ៊ុន Chevron បានឱ្យដឹងថា ខ្លួនមានផែនការពង្រីកស្ថានីយឱ្យបានដល់ ១០០ ដើម្បីឆ្លើយតបនឹងតម្រូវការនៅប្រទេសកម្ពុជា។ ទោះយ៉ាងណា លោកអះអាងថា ក្រុមហ៊ុនមិនបានបញ្ជាក់នូវពេលវេលាជាក់លាក់ថា តើក្នុងរយៈពេលប៉ុន្មានឆ្នាំនោះទេ។
លោកបានថ្លែងថា៖ «នេះគ្រាន់តែជាផែនការប៉ុណ្ណោះ ដោយគាត់មិនបានបញ្ជាក់ថា ១០០ ស្ថានីយនោះនឹងសាងសង់ក្នុងឆ្នាំនេះទេ ខណៈបច្ចុប្បន្នគាត់ទើបតែមាន ៣៥ ស្ថានីយ»។
«សម្រាប់រដ្ឋាភិបាល គឺស្វាគមន៍រាល់ការពង្រីកអាជីវកម្មរបស់ក្រុមហ៊ុន បើទីតាំងដែលក្រុមហ៊ុនស្នើសុំមានការអនុញ្ញាតពីអាជ្ញាធរដែនដី ហើយការរៀបចំបច្ចេកទេសរបស់គាត់ស្របតាមសារាចររបស់យើងដែលបានកំណត់ពាក់ព័ន្ធនឹងសុវត្ថិភាព»។ នេះបើយោងតាមលោក ជៀប សួ។
លោកបន្តថា មកទល់ពេលនេះលោកមិនទាន់ទទួលបានពាក្យស្នើសុំណាមួយពីក្រុមហ៊ុនទេទាក់ទងនឹងផែនការពង្រីកស្ថានីយ។ លោកបន្ថែមទៀតថា៖ «សម្រាប់ការពង្រីកស្ថានីយនេះគឺក្រុមហ៊ុនត្រូវដាក់ពាក្យស្នើសុំម្តងមួយៗដោយវាទាមទារឱ្យយើងត្រូវត្រួតពិនិត្យមើលទីតាំង និងសុវត្ថិភាពនៃការរៀបចំ។ អាជីវកម្មស្ថានីយប្រេងឥន្ធនៈ គឺខុសពីអាជីវកម្មផ្សេងៗដោយសារវាតម្រូវឱ្យយើងចុះទៅអង្កេត និងវាយតម្លៃលើផែនការសុវត្ថិភាព និងទីតាំងជាក់ស្តែង»។
កម្ពុជាបានក្លាយជាប្រទេសផលិតប្រេងមួយនៅលើពិភពលោក និងជាប្រទេសទី៨ ក្នុងតំបន់អាស៊ាន (លើកលែងប្រទេសឡាវ និងសិង្ហបុរី) បន្ទាប់ពីក្រុមហ៊ុនរុករកប្រេង និងឧស្ម័ន KrisEnergy Ltd របស់សិង្ហបុរីបានទាញយកតំណក់ប្រេងលើកដំបូងនៅប្លុក A។
លោក ហ៊ុន សែន បានថ្លែងក្នុងកម្មវិធីសម្ពោធរោងចក្រប្រព្រឹត្តិកម្មទឹកស្អាតចម្ការមន និងបើកការដ្ឋានសាងសង់រោងចក្រប្រព្រឹត្តិកម្មទឹកស្អាតបាក់ខែង កាលពីថ្ងៃទី ១ ខែកុម្ភៈថា អណ្តូងប្រេងទី១ នៅក្នុងតំបន់ប្រេងអប្សរាបូមប្រេងឆៅបាន ៤០ ៧៨៨ បារ៉ែល គិតចាប់ពីដាក់ឱ្យដំណើរការអណ្តូងប្រេងនេះដំបូងកាលពីថ្ងៃទី ២៨ ខែ ធ្នូ ឆ្នាំ ២០២០។
លោក ហ៊ុន សែន បានបន្ថែមទៀតថា អណ្តូងប្រេងទី២ ទើបដាក់ឱ្យដំណើរការខួងកាលពីថ្ងៃទី ៣០ ខែ មករា ឆ្នាំ ២០២១ ដើម្បីញែករវាងប្រេង និងល្បាប់ភក់។ លោកថ្លែងថា៖ «យើងនឹងបន្តដំណើរការបូមប្រេងអណ្តូងជាបន្តបន្ទាប់ទៀតនៅឆ្នាំ ២០២១ នេះ»៕ LA