The Phnom Penh Post Search

Search form




Logo of Phnom Penh Post newspaper Phnom Penh Post - CIMB នឹង​ច្របាច់​ជាមួយ​ធនាគារ​ពីរ​ទៀត

CIMB នឹង​ច្របាច់​ជាមួយ​ធនាគារ​ពីរ​ទៀត

អ្នក​ដំណើរ​ជិះ​កង់​កាត់​មុខ​អគារ​ការិយាល័យ​ធនាគារ​ពាណិជ្ជ CIMB នៅ​ទីក្រុង​ភ្នំពេញ។
អ្នក​ដំណើរ​ជិះ​កង់​កាត់​មុខ​អគារ​ការិយាល័យ​ធនាគារ​ពាណិជ្ជ CIMB នៅ​ទីក្រុង​ភ្នំពេញ។ CIMB Group នៅ​ម៉ាឡេស៊ី​កំពុង​ចរចា​ពី​ការ​ច្របាច់​បញ្ចូល​គ្នា​ជាមួយ​ធនាគារ​ពីរ​ផ្សេង​ទៀត។

CIMB នឹង​ច្របាច់​ជាមួយ​ធនាគារ​ពីរ​ទៀត

ភ្នំពេញៈ CIMB Group ដែល​ជា​ធនាគារ​ម៉ាឡេស៊ី​ឈាន​មុខ​គេ​ទីពីរ និង​ជា​ធនាគារ​ពាណិជ្ជ​ឈាន​មុខ​មួយ​នៅ​កម្ពុជា​ដែរ​នោះ​នឹង​ចរចា​ពី​អំពី​ច្របាច់​បញ្ចូល​គ្នា​ជាមួយ​គ្រឹះស្ថាន​ហិរញ្ញវត្ថុ​ម៉ាឡេស៊ី​ពីរ​ផ្សេង​ទៀត​គឺ ធនាគារ RHB Capital និង​ធនាគារ Malaysia Building Societty (MBSB)។

វិធានការ​នេះ​ធ្វើ​ឡើង​បន្ទាប់​ពី​ទទួល​បាន​ការ​យល់​ព្រម​ពី​ធនាគារ​កណ្តាល​ម៉ាឡេស៊ី Bank Negara Malaysia កាល​ពី​ថ្ងៃ ទី១០ កក្កដា ដើម្បី​បង្កើត​ធនាគារ​អ៊ិស្លាម​ធំ​មួយ​នៅ​ក្នុង​តំបន់​អាស៊ី​អាគ្នេយ៍។

លោក Kellee Kam ប្រធាន​ផ្នែក​គ្រប់​គ្រង​ធនាគារ RHB Capital បាន​ថ្លែង​ថា៖ «យើង​ជឿ​ជាក់​ថា នឹង​មាន​តម្លៃ​ភ្ជាប់​ជាមួយ ហើយ​ថា នឹង​មាន​ឱកាស​ច្រើន​ដែល​នឹង​កើន​ឡើង​ពី​ការ​ច្របាច់​បញ្ចូល​គ្នា​នេះ។ យើង​សង្ឃឹម​ថា នឹង​ស្វែង​យល់​បន្ថែម​ទៀត​តាម​រយៈ​ការ​ពិភាក្សា​របស់​យើង»។

លោក ប៊ុន យីន អនុ​ប្រធាន​ធនាគារ CIMB Cambodia មិន​បាន​ឆ្លើយ​តប​អ៊ីមែល​របស់ ភ្នំពេញ ប៉ុស្ដិ៍ ទេ កាល​ពី​ថ្ងៃ​ចន្ទ។

យោង​តាម​សារ​ព័ត៌មាន Bloomberg ភ្នាក់ងារ​វាយតម្លៃ Fitch បាន​ព្រមាន​កាល​ពី​ថ្ងៃ​ចន្ទ​ថា ការ​ច្របាច់​បញ្ចូល​គ្នា​នេះ​នឹង​បង្ក​ឲ្យ​ធនាគារ​ធំ​បំផុត​របស់​ប្រទេស​នេះ​ត្រូវ​ជួប​ហានិភ័យ​ដោយ​ការ​ក្លែង​បន្លំ។

Fitch បាន​ឲ្យ​ដឹង​នៅ​ក្នុង​សេចក្ដី​ប្រកាស​ព័ត៌មាន​មួយ​ថា៖ «ការ​រួម​បញ្ចូល​គ្នា​ដែល​បាន​ស្នើ​ដោយ​ធនាគារ CIMB ធនាគារ RHB និង​ធនាគារ Malaysia Building Society (MBSB) គឺជា​មហិច្ឆតា​នាំ​មក​ជាមួយ​នូវ​ការ​ប្រកួត​ប្រជែង​គ្នា និង​ហានិភ័យ​សម្រាប់​ធនាគារ​ថ្មី​នេះ​ដោយ​សារ​តែ​ដំណើរការ​សមាហរណកម្ម​ដ៏​ស្មុគ​ស្មាញ»។ Fitch បាន​ព្រមាន​ថា ការ​ច្របាច់​បញ្ចូល​គ្នា​នេះ​អាច​ធ្វើ​ឲ្យ​ចុះ​ខ្សោយ​ការ​ការពារ​ដើម​ទុន​សម្រាប់ ធនាគារ CIMB ប្រសិន​បើ​មិន​ទទួល​បាន​ការ​ផ្ដល់​មូលនិធិ​តាម​រយៈ​ទ្រព្យ​សកម្ម​ថ្មី​គ្រប់​គ្រាន់​ទេ​នោះ។

យោង​តាម Bloomberg ធនាគារ​ដែល​បាន​ស្នើ​ឡើង​ថ្មី​នេះ​នឹង​ឈរ​ជា​ធនាគារ​ឈាន​មុខ​គេ​នៅ​ក្នុង ប្រទេស​ម៉ាឡេស៊ី និង​ជា​ធនាគារ​ធំ​ជាង​គេ ទី៤ នៅ​ក្នុង​តំបន់​អាស៊ី​អាគ្នេយ៍​ដែល​មាន​ទ្រព្យ​សកម្ម​សរុប ១៩៤ ពាន់​លាន​ដុល្លារ និង​មាន​ចំណែក​ទីផ្សារ ២៣ ភាគ​រយ​នៃ​កម្ចី​ក្នុង​ស្រុក ធៀប​នឹង ១៨ ភាគ​រយ​របស់​ធនាគារ Maybank ជា​ធនាគារ​ឈាន​មុខ​គេ​របស់ ប្រទេស​ម៉ាឡេស៊ី បច្ចុប្បន្ន។

ប្រធាន​សហគមន៍​អភិវឌ្ឍន៍​អ៊ិស្លាម​កម្ពុជា (CIDC) បាន​ស្វាគមន៍​សម្រាប់​ការ​កែ​លម្អ​សេវា​ហិរញ្ញវត្ថុ​សម្រាប់​សហគមន៍​អ៊ិស្លាម​នៅ​កម្ពុជា ដោយ​លើក​ឡើង​ថា បច្ចុប្បន្ន​មាន​ជន​ជាតិ​អ៊ិស្លាម​ជាង ១ លាន​នាក់​កំពុង​រស់​នៅ​ទី​នេះ។

លោក​បញ្ជាក់​ថា៖ «បច្ចុប្បន្ន​ជនជាតិ​អ៊ិស្លាម​របស់​យើង​កំពុង​ទទួល​កម្ចី​តាម​រយៈ​ធនាគារ​នេះ​សម្រាប់​ការ​ធ្វើ​ពាណិជ្ជកម្ម​របស់​ពួក​គេ។ ប៉ុន្តែ​ប្រសិន​បើ​យើង​មាន​សេវា​ពិសេស​សម្រាប់​ពួកគេ​នោះ​នឹង​មាន​ការ​ទាក់​ទាញ​ផ្សេង​ទៀត​សម្រាប់​ពួក​គេ​ក្នុង​ការ​ប្រើ​ប្រាស់​សេវា​ហិរញ្ញវត្ថុ​កាន់​តែ​ច្រើន​ឡើង»។

លោក អ៊ិន ចាន់នី ប្រធាន​នាយក​ប្រតិបត្តិ​ធនាគារ អេស៊ីលីដា បាន​ថ្លែង​ថា ធនាគារ​របស់​លោក​កំពុង​ផ្ដល់​ដល់​ជន​ជាតិ​អ៊ិស្លាម​ជាច្រើន​ក្នុង​រយៈ​ពេល​ប៉ុន្មាន​ឆ្នាំ​នេះ។

លោក​លើក​ឡើង​ថា៖ «យើង​មិន​មែន​ជា​ធនាគារ​អ៊ិស្លាម ពិសេស​នោះ​ទេ ប៉ុន្តែ​យើង​បាន​ផ្ដល់​ប្រាក់​កម្ចី​ដល់​ជន​ជាតិ​អ៊ិស្លាម​ជា​ច្រើន​ដែល​រស់​នៅ​គ្រប់​ទី​កន្លែង​នៅ​ក្នុង​ប្រទេស​របស់​យើង ពិសេស ខេត្ត​កោះកុង ខេត្ត​កំពត កំពង់ចាម។ល។

លោក​បន្ថែម​ថា៖ «ពេល​ពួក​គេ​ទទួល​កម្ចី​របស់​យើង វា​មិន​ខុស​គ្នា​ទេ ព្រោះ​ជា​ធម្មតា​ពួក​គេ​ត្រូវ​តែ​អនុវត្ត​តាម​តម្រូវ​ការ​របស់​យើង»៕

អត្ថបទគួរចាប់អារម្មណ៍