ភ្នំពេញៈ បណ្ដាប្រទេស CLMV (កម្ពុជា ឡាវ មីយ៉ាន់ម៉ា វៀតណាម) បានឯកភាពគ្នាលើក្របខណ្ឌការងារសម្រាប់ការអភិវឌ្ឍសេដ្ឋកិច្ចដែលនឹងត្រូវដាក់ជូនមេដឹកនាំរបស់ CLMV ដើម្បីអនុម័តនៅឆ្នាំក្រោយ។ នេះបើតាមសេចក្ដីប្រកាសរបស់ក្រសួងពាណិជ្ជកម្មកម្ពុជាកាលពីម្សិលមិញ។
សេចក្ដីប្រកាសនេះត្រូវបានធ្វើឡើងបន្ទាប់ពីកិច្ចប្រជុំរបស់រដ្ឋមន្ដ្រីសេដ្ឋកិច្ច (EMM) CLMV លើកទី ១១ ក្នុងអំឡុងនៃកិច្ចប្រជុំរដ្ឋមន្ដ្រីសេដ្ឋកិច្ចអាស៊ាន (AEM) លើកទី ៥១ ដែលត្រូវបានរៀបចំឡើងនៅថ្ងៃទី ៥ ដល់ថ្ងៃទី ៨ ខែ កញ្ញា ឆ្នាំ ២០១៩ នៅទីក្រុងបាងកក។
ក្របខ័ណ្ឌសម្រាប់ការអភិវឌ្ឍរបស់ប្រទេស CLMV នឹងត្រូវដាក់ជូនមេដឹកនាំរបស់បណ្ដាប្រទេស CLMV ដើម្បីអនុម័តនៅក្នុងកិច្ចប្រជុំកំពូល CLMV លើកទី ១០ ដែលត្រូវធ្វើឡើងក្នុងឆ្នាំ ២០២០ នៅក្នុងប្រទេស ឡាវ។
ក្របខ័ណ្ឌអភិវឌ្ឍន៍នេះផ្ដោតលើធាតុផ្សំចំនួន ៣ ដែលរួមមានការតភ្ជាប់ដើម្បីជួយសម្រួលការវិនិយោគ ពាណិជ្ជកម្ម និងកិច្ចសហប្រតិបត្តិការ ការជំរុញក្នុងការទាក់ទាញកម្មករជំនាញ និងការវិនិយោគលើវិស័យនានាដែលភាគច្រើនផ្ដោតលើវិស័យកសិកម្ម ម្ហូបអាហារ និងទេសចរណ៍។
ក្នុងអំឡុងកិច្ចប្រជុំនេះក្រុមរដ្ឋមន្ដ្រីបានពិភាក្សា និងត្រួតពិនិត្យការរីកចម្រើនក្នុងការអនុវត្តស្ថិតក្រោមផែនការសកម្មភាពឆ្នាំ ២០១៧-២០១៨ និងឆ្នាំ ២០១៩-២០២០ របស់ CLMV ជាពិសេសលើគម្រោង ២ ដែលត្រូវបានអនុវត្តប្រកបដោយជោគជ័យដែលរួមទាំងទេសចរណ៍អេឡិចត្រូនិកដែលជាដំណោះស្រាយនវានុវត្តន៍មួយចំពោះ Tourism MSMEs នៅក្នុង CLMV និងការវាយតម្លៃក្របខ័ណ្ឌការងារច្បាប់ និងបទប្បញ្ញត្តិស្ដីពីពាណិជ្ជកម្មអេឡិចត្រូនិក៕LA